Salmos 66
66
Yaa ja ndakuantaꞌu nuu ia Dios
1Ndiꞌi maa ni, ñayiu ñuyiu, vi kata ni nuu ia Dios ja ka kusii ini ni.
2Vi kata ni yaa, ja na koo jayiñuꞌu nuu ya.
Vi kata ni yaa vii nuu ya, chi ia kaꞌnu ndevaꞌa kuu ya.
3Te vi kuñaꞌa ni nuu ya: “Nase vivii naꞌnu tniuu saꞌa ni, vi Dios,
te jin jakaꞌnu ndevaꞌa maa ni, te vi ndee ñayiu ka kaꞌan uꞌu ña ka jaꞌnu jiti nuu ni.
4Te ndiꞌi ñayiu ñuyiu ka chiñuꞌu ña jin ni, te ka jitai yaa nuu ni.
Ka jitai ja ka ndakakuneꞌe ñai jin ni.”
5Neꞌekuei ni te vi kondiaꞌa ni tniuu naꞌnu saꞌa ia Dios,
vi tniuu vii ndevaꞌa saꞌa ya ja chituu ña ya jin ñayiu.
6Chi ni jaꞌnde ya ndute mar, te ni nduu ñuꞌu yichi,
te ni ka jika jaꞌa ñayiu ñuu ya, ni ka yaꞌa nuu yute yun,
te yun kuu ja na vi kokusii inio nuu ya.
7Chi siun ni tatnuni maa ia Dios nuu ñuyiu jin jakaꞌnu ya,
te ndiaꞌa guaꞌa ya ñayiu ka oo ndiꞌi ñuu,
nagua ja ma vi ndakoo ñayiu tu ka jantnoꞌo yun siki ya.
8Te maa ni, ñayiu ndiꞌi ñuu, vi saꞌa kaꞌnu ni ia Dios,
te na kenta yaa ka jita ni ja ka saꞌa kaꞌnu ni ya ja na vi konini ñayiu.
9Chi maa ya kuu ia jito jini ña jion ja ka tekuo,
te tu ni jandetu ya ja vi kachi jaꞌo te junkueio.
10Chi ni jito tnuni ña maa ni, vi Dios, te ni ndasavii ña ni,
nagua ka ndasavii kaa kuu plata.
11Chi ni jandetu ni ja ni ka junkau san nuu ndaꞌa ñayiu kueꞌe,
te ni skuiso ña ni in ja vee ndevaꞌa ja kuu ninoꞌo tnundoꞌo.
12Te ni jandetu ni ja nani kuu ñayiu ni ka jain niꞌnu ña jin san,
te ni ka yaꞌa san nuu tnundoꞌo vijin ndevaꞌa, ja kuu na kuinio nuu ndute vi nuu ñuꞌu,
su sandiꞌi te ni ndatau ña ni yun, te ka ndatatu nuu san.
13Te kiuu san veñuꞌu ni, te teñuꞌu san kiti ja soko san nuu ni,
te skunkuu san tnoꞌo ni kee yuꞌu san,
14tnoꞌo ja ni kee yuꞌu san nuu ni, nuu ni tnaꞌa san tnoꞌo suchi ini.
15Te soko san kiti inu ndatnu ka ja teñuꞌu san ti nuu ni.
Soko san isndiki yii vi chivatu jin ñuaꞌa karneru ja kuu in xiko asin nuu ni.
16Neꞌekuei ndiꞌi ni ja ka yuꞌu niꞌnu ni ia Dios, te vi konini ni.
Na ndakani san naxa ni saꞌa ya jin san.
17Ni kana ndaꞌu san nuu ya vi ni saꞌa kaꞌnu san ya.
18Te nuu ja ni ndakani kueꞌe ini san,
te ma konini Jitoꞌo san tnoꞌo ni jikantaꞌu san nuu ya.
19Su ni onini ya, te ni saꞌa ya nagua ni jikan san
nuu ni ndakuatu san nuu ya.
20Te kaꞌnu kuu ia Dios ja tu ni skexiko ya tnoꞌo ni ndakuatu san nuu ya,
te ni xneꞌe ya ja kundaꞌu ini ña ya jin san.
Currently Selected:
Salmos 66: xtnNTplus
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
