Salmos 31
31
Vi kukanu inio ia Dios
Yaa ni tee David
1Nuu maa ni nduku san ja tavaꞌa ña ni, vi Jitoꞌo,
te ma kuandetu saꞌun ni ja kendoo kanoo san.
Skaku niꞌnu ña ni jin san, chi ia ndaa kuu ni.
2Konini ni joo tnoꞌo kaꞌan san, te ñama skaku niꞌnu ña ni,
te kokuu maa ni in kava ndakui ja tavaꞌa ña ni,
vi in veꞌe kaꞌnu ja skaku niꞌnu ña.
3Chi maa ni kuu in kava san vi in veꞌe sukun san,
te saꞌa ni ja na koo jayiñuꞌu nuu ni,
te kondeka ña ni jin san na ichi kaka san.
4Te skaku niꞌnu ña ni ja ma kanakau san nuu ja ni ka tayuꞌu ñayiu,
chi maa ni kuu ia tavaꞌa ña.
5Te nuu ndaꞌa maa ni xndendoo san anu san,
te ndatau ña ni, vi Jitoꞌo, chi ia Dios ndaa kuu ni.
6Skexiko san ñayiu ka chiñuꞌu chuꞌchi ja tu ka jiniuꞌu,
su maa san, chi kukanu ini ña san jin ni, vi Jitoꞌo san.
7Kusii ini ndevaꞌa san ja kundaꞌu ini ña ni jin san,
chi ni jini ni tnundoꞌo tnaꞌa san, vi ni jini ni ja kusuchi ini san.
8Te tu ni jandetu ni ja kanakau san nuu ndaꞌa ñayiu ka kaꞌan uꞌu ña jin san,
chi ni jani ña ni in nuu jite ndevaꞌa.
9Kundaꞌu ini ña ni jin san, vi Jitoꞌo, chi tnaꞌa san tnoꞌo suchi ini,
te mandesi nduchi nuu san ja ndaꞌi ndevaꞌa san,
vi makuita anu san vi yiki kuñu san.
10Chi kuaꞌan mandiꞌi san jin tnoꞌo suchi ini,
te kuaꞌan kuia san jin ja tnana ndaꞌu san,
te kuaꞌan makuita san jin tnundoꞌo tnaꞌa san vi makuita yiki kuñu san.
11Te ndiꞌi ñayiu ka kaꞌan uꞌu ña ka saꞌa kuasun ña jin san,
te ka jaku ndee ña ñayiu ka oo yatni jin san,
te ka yuꞌu ña ñayiu ka ndeka tnaꞌa guaꞌa jin san,
chi nuu ka jini ñai jin san nuu ichi, te ka jinoi.
12Te ja ni ka ndunaa saꞌun ini ña ñayiu jin san, na kuinio ja ni jiꞌi san,
te kuu san na kuinio in tindoꞌo ja ni taꞌu.
13Chi nini san ja ka kani ñayiu kuentu san,
te ndiꞌi ni nuu yuꞌu ndevaꞌa san,
chi ka ndatnoꞌo tnaꞌa ñayiu ja vi ndakoi siki san,
te ka ndakani ini ja vi kaꞌni ñai jin san.
14Su sein, chi kukanu ini ña san jin maa ni, vi Jitoꞌo,
te kachi san: “Maa ni kuu ia Dios san”.
15Te nuu ndaꞌa maa ni oo nagua kokuu jin san.
Skaku niꞌnu ña ni nuu ndaꞌa ñayiu ka kaꞌan uꞌu ña,
vi nuu ndaꞌa ñayiu ka sondikin ña jin san.
16Saꞌa ni in javii javaꞌa jin san ja jinokuechi san nuu ni,
te skaku niꞌnu ña ni jin jandaꞌu ini maa ni.
17Ma kuandetu ni, vi Jitoꞌo, ja kendoo kanoo san,
chi nuu maa ni jikan san ja chituu ña ni.
Su na vi kendoo kanoo maa ñayiu ka saꞌa jakueꞌe,
te vi saa vi kasi yuꞌi ndee chii ñuꞌu chii ndeꞌi.
18Te na vi kasi yuꞌu ñayiu inu tnoꞌo ja ka kaꞌin siki ñayiu ndaa jin tnoꞌo teyii,
vi ka skexiko ñai vi ka kaꞌan kueꞌe ñai.
19Nase vivii kaꞌnu ja kundaꞌu ini ni ñayiu ka yuꞌu niꞌnu ña jin ni,
te tavaꞌa ni jandaꞌu ini ni na kuinio in jakuika ndevaꞌa,
te vi jin nuu sava ka ñayiu, te jaꞌnde ni jiñaꞌa ni nuu ñayiu ka kukanu ini ña jin ni.
20Te ndee nuu yuꞌu ka nuu oo ndiaꞌa maa ni, tayuꞌu ni jin,
nagua ja ma vi niꞌi ña ñayiu ka ndakani ini ja vi saꞌa ñai jakueꞌe,
te tavaꞌa ni jin veꞌe nuu oo maa ni, nagua ja ma vi nani ka ña jin.
21Kaꞌnu kuu Jitoꞌo, chi ni saꞌa ya kuaꞌa tniuu naꞌnu ja kundaꞌu ini ña ya jin san,
nuu ni oo san ñuu kaꞌnu, te ni ka jionduu ña ñayiu ka kaꞌan uꞌu ña jin san.
22Su nuu ni yuꞌu san, te ni kachi san:
“Ni xtajioo ña ni, te tu ka san oo jin ni”.
Su ni onini ni tnoꞌo ni jikantaꞌu san nuu ni, nuu ni ndakuatu san.
23Ndiꞌi maa ni ja ka kuu ni ñayiu maa ia Dios, vi kokutoo ni Jitoꞌo,
chi jito jini maa ya ñayiu ndaa,
su tetniuu ya tnundoꞌo ka ndaniꞌi ka ndatnaꞌa maa ñayiu ka saꞌa teyii mai.
24Te vi koyutnu ndiꞌi maa ni ja ka kukanu ini ni Jitoꞌo,
te vi kondee ini anu ni.
Currently Selected:
Salmos 31: xtnNTplus
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
