Proverbios 18
18
1Ñayiu saꞌa siin mai nuu sava ka ñayiu, chi maa ni javaꞌa mai ndukui,
te kiti ini nuu ndiꞌi ni ñayiu ka xteku ña jin.
2Ñayiu vasa, chi tu junkuaan ini ja kutuaꞌi,
chi maa ni kuu vixin jin ja jini.
3Nuu vaji jakueꞌe, te suni vaji ja skexiko ña,
te nuu tu na jayiñuꞌu, te suni vaji ja kanoo.
4Tnoꞌo ja kaꞌan ñayiu kuu na kuinio ndute ja ñuꞌu kunu yute nuu jika de,
te tnoꞌo ndichi kuu na kuinio nuu kana ndute.
5Masu vatuka kuu ja chituo ñayiu kueꞌe,
te vi xtavi kuechio ñayiu ndaa nuu ndanduku niꞌnui ja jaꞌi.
6Ñayiu vasa, chi kaꞌin ninoꞌo ni tnoꞌo ja tee tnaꞌi,
te jin tnoꞌo kaꞌin yun ndukui ja kani ña inka ñayiu jin.
7Tnoꞌo kaꞌan ñayiu vasa yun kuu ja skunaa ña jin mai,
chi jin tnoꞌo kaꞌin ndatnaa mai xeyu sukuin.
8Te tnoꞌo ja kaꞌan ñayiu tnoꞌo kuu na kuinio in javixin
ja kunjino ndee kunu kunu ini anu ñayiu.
9Te ñayiu kuꞌndu ja satniui vi ñayiu jinkuaan ini ja xnai nagua nevaꞌi,
chi vi na ni kuinio ja in ni ñani ka kui.
10Sivi maa Jitoꞌo kuu na kuinio in torre ndakui,
te nuu maa ya kuaꞌankuei ñayiu ndaa, te skaku niꞌnu ña ya.
11Ñayiu kuika, chi jakuika nevaꞌi kuu na kuinio in ñuu ja ndesi guaꞌa,
te ndakani ini ja tu nagua ndoꞌo, chi ndesi guaꞌa jin muro sukun.
12Tnaꞌa ñayiu tnundoꞌo nuu saꞌa teyii mai.
Su niꞌi jayiñuꞌu nuu ja saꞌa ndaꞌui mai.
13Ñayiu kaꞌan ama ka ja konini,
chi kaꞌin tnoꞌo ja tu jiniuꞌu, te tnaꞌi ja kanoo.
14Nuu kuꞌu ñayiu, chi anui saꞌa ja ndaniꞌi ndei.
Su nuu kusuchi ini anui, ¿na in saꞌa ja ndaniꞌi ndei?
15Anu ñayiu jinkuiꞌnu ini nduku tnoꞌo ndichi,
te soꞌo ñayiu ndichi nduku ja jinkuiꞌnu ini.
16In ja skutaꞌu ni ñayiu june ichi,
te kuu kenta ni ndee nuu in tee kuu kaꞌnu.
17Nuu jino ñayiu xtnañuꞌu ja kaꞌan niꞌnui ja jaꞌi, chi kokaꞌon ja tu na kuechi tavi.
Su nuu jino ñayiu kaꞌan kuechi ja jaꞌi, te ndaxtuu ña.
18Nuu ka jitotnuni, te ka jini na in oo kuechi, na in tuu,
te yun ka sandaa nagua ka tee tnaꞌa ñayiu.
19Te in ñani ja ni ka saꞌa ña jakueꞌe jin de, chi viꞌi ka saꞌa ndee ini de saa in ñuu kaꞌnu ja ndesi guaꞌa.
Te ja ka tee tnaꞌa ñayiu yun kuu na kuinio ndakaa ja yiꞌi in yeꞌe kaꞌnu veꞌe tniuu.
20Jin tnoꞌo kaꞌan ñayiu chitu chii,
te ndenuu ini jin ja kaꞌin.
21Nuu yuꞌu ñayiu oo ja tekui vi ja kui,
te na in kaꞌan kuaꞌa, te tnaꞌa mai tnundoꞌo.
22Na in ni niꞌi ñasiꞌi, te ni niꞌi ja jinkoo vaꞌi,
chi ni niꞌi javaꞌa nuu maa Jitoꞌo.
23Ñayiu kundaꞌu, chi jikantaꞌui nuu kaꞌin.
Su ñayiu kuika, chi kaꞌan xein.
24Ka oo ñayiu ja ndeka tnaꞌa guaꞌa jion ja ñama kachi yata ñai jion.
Su ka oo sava ñayiu ndeka tnaꞌa guaꞌa jion ja ka kui ñayiu guaꞌa ja vi na kuinio in ñanio ka kui.
Currently Selected:
Proverbios 18: xtnNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
