Kata Lom 8

Buyinumabu bata Ateemit busenemuu buloŋ

1Muñeˈe kama bajut katek boot li bukanabuku kata Yéesu Kilisita; 2Li mal̥egenamu, eluwaayi yata Buyinumabu Banabaabu yasenemuu buloŋ babilumulo li hujokoolahu hoololaal li Yéesu Kilisita, efakenolaafaken li kuŋen kata eluwaayi yata kahoofoolaku, li eketayi. 3Wahawu wan eluwaayi yata Móyiis eyilaatumuu ekaan, mata búgootowabu bata ál̥ahukowan búhihhi yo ébajum sembe, Ateemit lakankaan wo: láboñuuboñul Añoolool min aŋa’ bóono banokoole li bata ál̥ahukowan ammuu ahoofoola, ban li akaanool aket boot káfulen kahoofoolaku, min ájowum tó atek kahoofoolaku kammuu li bóonowabu bata ál̥ahukowan. 4Ateemit lakankaan loon muñaˈa mantee macolamu man eluwaayi elobumuu mata mo, li mubaj li alolaal jáloŋeliitaamuu naboo li bóonowabu boololaal, bale jaloŋaalemuu loon Buyinumabu Banabaabu bufañumuu. 5Li mal̥egenamu, bukanabuku kaloŋemuu naboo li bóonowabu booliil, kuŋaŋŋa’ kayinooliil feh kukaan li wahawu wan eniilayi ésiibowemuu; bale bukanabuku kaloŋemuu naboo li Buyinumabu Banabaabu, buko kayinooliil feh li wahawu wan Buyinumabu Banabaabu bufañumuu koom. 6Kayinoo mata kásiibowaku kata eniilayi, kumukemuk; bale kayinoo mata wahawu wan Buyinumabu Banabaabu bufañumuu, kusenesen buloŋ li kásuumaay. 7Wahawu unwu újimuu, bukanabuku kan kásiibowaku kata eniilayi kuhaŋumuu sembe kulatoola kata Ateemit koom. Kúkaaneliit loon eluwaayi yata Ateemit elobumuu, ban kufinut min kuyilo kukaan mo. 8Mó mújimuu, bukanabuku kanabemuu li bóonowabu booliil, kuyilaat kúsuum Ateemit.

9Bukuluul jilet li buloŋ naboo li bóonowabu booluul, bale loon Buyinumabu Banabaabu bufañumuu, nokoomuu loon mal̥egen Buyinumabu bata Ateemit bumbu min bukine li bukuluul. An abajutumuu Buyinumabu bata Kilisita, anawu ummu alet ata Kilisita. 10Maayeet min Kilisita áami li bukuluul, eniilayi yooluul yo manooman fan eket humum hata kahoofoolaku, bale Buyinumabu bo busenuusen buloŋ humum hata min Ateemit ajokuulumuu bukan kacole hákilool. 11Nokoomuu loon Buyinumabu bata Ateemit ayitenumulomuu Yéesu Kilisita li eketayi, bumbu min bukine li bukuluul, Ateemit ayitenumuloomuu li eketayi fan ájowum li Buyinumabu umbu Banabaabu bakinumuu li bukuluul, min asen buloŋ eniilayi yooluul yammuu li ebil eket.

12Kutuyom, mó mújimuu lubajaale wahawu wan óotimuu ukaanaal. Ootutaal uloŋaal naboo li bóonowabu boololaal li kásiibowaku koololaal. 13Jiloŋumuu naboo li bóonowabu booluul, fan jiket; bale jíjowummuu li Buyinumabu Banabaabu min jimuk bakaanelabu bajakutumuu bata eniilayi, fan jiloŋ. 14Bukanabuku feh kaloŋemuu naboo li Buyinumabu Banabaabu, bañiil bata Ateemit koom. 15Buyinumabu ban Ateemit asenuulumuu, bukaanutuul jilako emiikeel yaloŋe li ebaj ekole, bale bukaanuukaan jilako bañiil bata Ateemit, ban li bújiwolaal li uyiliyaal ulobaal butiya oonaal: «Abba, Faafa!» 16Buyinumabu bata Ateemit humum bo, bulollob buyinumabu boololaal kaanaku bañiil bata Ateemit loomaal. 17Oomaalumuu bañiil bata Ateemit, fan foof uyabaal wahawu wan alobumuu kasen bukanabuku koola, ban fan uyabaal wo li Kilisita ló. Nokoomuu loon li mal̥egen lúlaamaalaam sílaamasu sata Kilisita lí ákila ló, fan foof ulakowaal li máyiineniyamu moola lí ákila ló.

Ateemit lafañe min ulakowaal li máyiineniyamu moola mabilemaa

18Lenseen sílaamasu soololaal sata muñeˈe sitookut min sikittenooli li máyiineniyamu mata Ateemit, man ammuu li abil áhiisolaal. 19Li mal̥egenamu, búwuwenumabu foof bo feh bumbu li kakob li esommen ló taŋayi nan Ateemit ammuu li áhiis máyiineniyamu mata bañoolool. 20Búwuwenumabu bulolo li kuŋen kata sembaasu sakaanemuu wah úbajaati jáliŋ yanooyan, ban inti eeniseen li húnongum hata búwuwenumabu humum bo, bale li húnongum hata Ateemit abet bomuu li kuŋenaku kata sembaasu unsu. Bale loŋe li baj kákangum boot li búwuwenumabu umbu: 21búwuwenumabu humum bo fan bubil bufak li kuŋen kata sembaasu sata kakajenaku sajok bomuu sikaan amiikeel, min bo foof bulako li máyiineniyamu mata bañiilabu bata Ateemit. 22Luhaasaale li mal̥egenamu kaanaku boot yo muñeˈe, búwuwenumabu foof bo feh bumbu min búl̥iilemuu, ban li boono li sílaam loon sata anaale anokene li éluŋun. 23Bale inti búwuwenumabu bale bo bóomi li sílaam. Alolaal foof jabajaalumuu Buyinumabu Banabaabu bammuu bútinaa li újiyawu wata Ateemit, ummuwaal min úluulenaalemuu kata láalawolaal, min ukobaal min Ateemit áhiis kaanaku bañoolool loomaal, li afaken eniilayi yoololaal. 24Li mal̥egenamu, Ateemit lafakenolaafaken, bale li kákangum bale. Ujukaalumuu wahawu wan úkangumaalumuu li wo, let ulaañ ulako kákangum. Ayimaa aate abaj kákangum kata min ajuk wah wan ajuke aban? 25Bale úkangumaalumuu li wah wan ujukolutaal, fan ukobaal wo li húmuñ ló.

26Li manolamu foof, Buyinumabu Banabaabu bulambenewolaalamben mata lúgootowaagooto. Li mal̥egenamu, uhaasutaal buu lootaalumuu unaak ul̥awaal eeno, bale Buyinumabu Banabaabu humum bo bul̥awel̥aw Ateemit boot li alolaal li kálund ló kan butum buyilaat bulob. 27Ateemit ajukemuu wahawu wammuu li uyinumawu, lahaase waa Buyinumabu Banabaabu bufañe bul̥aw, mata Buyinumabu bul̥awel̥aw loon Ateemit afañumuu, boot li bukanabuku koola.

28Luhaasaale foof oonaal wahoowah feh wabaje, ubabbaj boot li majakaamu mata bukanabuku kafañumuu Ateemit, bukanabuku kan ahooñumuu naboo li húnongumahu hoola. 29Bukanabuku kan Ateemit al̥usumuu yaan no ákibben, lajoojok yaan no foof min akaaniil kunokoo li Añoolool, bájum li alako añiil átiyaa abaje kutuyaay kameeŋe. 30Bukanabuku kan Ateemit al̥usumuu yaan no, lahooñiihooñ foof. Bukanabuku kan ahooñumuu, lakaaniikaan foof kulako bukan kacole hákilool. Bukanabuku umbuku kan akaanumuu kulako bukan kacole hákilool, lakaanikaan foof kulako li máyiineniyamu moola.

Maluukamu mata húbooliyahu hata Ateemit

31Waa lóomi li ulobaal ufamenaal li wahawu unwu? Nokoomuu loon Ateemit boololaal lalaañe, ayi ayilo aŋiiŋo hákilolaal? 32Akila afanutumuu akat bo Añoolool humumool, bale li abetool li eket boot mata ololaal foofolaal feh: buu emmuu nokoo let asenolaal wahawu feh boot li Añoolool ló? 33Ayimaa aate al̥oof bukanabuku kan Ateemit al̥usumuu? Maayeet ano! Ateemit humumool lajokiijok bukan kacole. 34Ayimaa ayilo atiibiil min abetiil li katek? Maayeet ano! Yéesu Kilisita okila aketumuu, ban aketut bale, layitowuuyitowul li eketayi, ban muñeˈe ummu kaŋen káli kata Ateemit, min anaak al̥aw boot li alolaal. 35Ayimaa ayilo ágaatuloololaal li húbooliyahu hata Kilisita? Waa fíle búyiik, bale waa buyina, mantee waa jálaaten, bale waa bucaa, bale waa fíle bugay, mantee waa wah wákoyileniye, bale waa fíle eket? 36Loon Bakiicelabu bulobumuu:

«Awu újimuu áloli li jinaak jimuki li etihunakaayi feh,

li kúkaanoli loon kúgalalaan kan kujowe boot jálaamul#Ukijenawu 44:23.»

37Bale li wahawu unwumaa feh, li uhaŋaal mabaj kaheek kabilumulo li Kilisita ábooliwolaamuu. 38Lihaase li mal̥egenamu kaanaku bajut wah wayilo úgaatuloolom li húbooliyahu hoola: let eketayi, let buloŋabu, let emalakaayi, let uyinumawu wajakutaawu wágootenemuu bukan, let wahawu wata muñeˈe, let foof wahawu wabilemaa, let sembe sanoosan, 39let sata wahawu wammuu haatiya, let foof sata wammuu li etaam, let búwuwenum banooban. Wahawu unwumaa feh uyilaat úgaatuloololaal li húbooliyahu hata Ateemit, han áhiisummuu li Yéesu Kilisita ammuu Amaaŋenawu oololaal.

Currently Selected:

Kata Lom 8: cskDBL

Highlight

Copy