Kata Lom 7
7
An áyinenumuu li Yéesu láfule li kuŋen kata eluwaayi
1Kutuyom, manooman jihaase waa léemi li ilobuul, mata jihaase waa eluwaayi elobe. Eluwaayi ebabbaj sembe li an akila li buloŋ. 2Anaale ayabowe li ánayine, eluwaayi ekaanookaan abaj hujokoo li ánayinaawu oola, ánayinaawu akila li buloŋ; bale ánayinaawu aketumuu, anaalaawu láfule li eluwaayi yakaanoolumuu kujokoo lí ánayinaawu oola. 3Mó mújimuu, kama anaale ayabowe abajumuu ánayine akee, ban áyinool an kufimmuu min kuyabowe okila li buloŋ, anaalaawu ummu fan ajoki anaale ahintowe li ánayine alet oola; bale áyinool aketumuu, láfule li kuŋenaku kata eluwaayi inyu. Layilo ayabo li ánayine akee, ban let lako lahintohinto li ánayine alet oola.
4Kutuyom, mo nokoomuu foof li bukuluul. Nan Kilisita aketumuu, jiketooketoo li akila hákil eluwaayi. Mó mújimuu muñeˈe akee akiluul. Anawu ummu akila ammuu Kilisita ayitowumulomuu li eketayi, bájum li ukaanaal wah wásuume Ateemit. 5Li mal̥egenamu, nan unaake uloŋaalumuu loon ufañaalumuu, eluwaayi enaanaak eyitenul kásiibowaku kajakutumuu kata eniilayi yoololaal. Kásiibowaku unku li kújiwolaal li ukaanaal wah wáŋalewul eket. 6Bale muñeˈe lúfulaale li kuŋen kata eluwaayi, mata loonowaasoono bukan kakete hákil yo, ban muñeˈe uletaal emiikeel yata yo. Luyiliyaale kama ulokaal boot li Ateemit li bakaane buwunkul babilumulo li Buyinumabu Banabaabu, ban inti loon bakaanelabu bata naanaŋ babilumulomuu li eluwaayi yakiicimuu yahallenumuu.
Eluwaayi wáa éjaliŋe?
7Kama muñowu boot min oonaal buu? Waa eluwaayi kahoofoo yoom? Maayeet! Bale eluwaayi éjimuu li ihaas kahoofoo. Li mal̥egenamu, let ihaaseen mata kásiibo wah eluwaayi baaneenut: «Jakum úsiibo wah walet wooli#Dótelonom 5:21.» 8Kahoofoolaku kúbajumbajum bútin li eluwaayi min kújiwom li ibaj kásiibo kanookan. Li mal̥egenamu, eluwaayi ebajeenutumuu, kahoofoo fan kulako wah wakete. 9Naanaŋ nan eluwaayi ebajutumuu, lilolloŋ; bale nan eluwaayi ebilumuu, kahoofoolaku li kuloŋ, 10mín ínje iket. Muñowu eluwaayi yaateenumuu éŋalul buloŋ, éjowetumommuu li eket. 11Li mal̥egenamu, kahoofoolaku li kújowum li eluwaayi min kubuntom ban li kumukumom li yo. 12Mó mújimuu eluwaayi humum yo enannab, hulimahu hata Ateemit li hunab, li hucol ban li hujak.
13Kama wahawu wajakumuu ulanlaañ wóoti újiwom li iket? Maayeet! Kahoofoolaku kújiwommuu li éeti iket. Kahoofoolaku kújowunjowum li wahawu wajakumuu, min kújiwom li iket. Kuhoofoolaaku kukankaan mo min bóonowabu bata ko bata mal̥egen buyili buhaasi. Muñowu kahoofoolaku kújowummuu li eluwaayi min kuhaŋ májakaati feh.
Kahoofoolaku kúgootengooten ál̥ahukowan
14Li mal̥egenamu, luhaasaale kaanaku eluwaayi li Buyinumabu bata Ateemit ebilumulo, ban ínje léemi an ágootowe, an áami amiikeel ata kahoofoolaku. 15Li mal̥egen ínaanumut wahawu wan ikaanemuu: wahawu wan ifañumuu, íyiliyeliit ikaan wo, ban li inaak ikaan wahawu wan ifañutumuu. 16Nokoomuu loon wahawu wan ifañutumuu wo likaanemuu, li íhaasum tó kaanaku eluwaayi ejaajak. 17Let ínje humumom kama ikaanemuu loon muñaˈa, bale kahoofoolaku kakinumuu lí ínje kukaane mo. 18Mal̥egen, lihaase een wahawu wajakumuu ulet lí ínje, yo yommuu ulet li eniilayi yúmbaam yágootomuu. Liyilo ifañ kakaan majake, bale let iyili ikaan majake. 19Li mal̥egenamu, ínje íkaaneliit wahawu wajakumuu wan ifañumuu ikaan, min inaak ikaan wajakutumuu wan ifañutumuu ikaan. 20Nokoomuu loon likankaan wahawu wan ifañutumuu ikaan, kama inti ínje humumom ikaanemuu loon muñaˈa, bale kahoofoolaku kakinumuu lí ínje. 21Muñeˈe to líhaasummuu eluwaayi inye: ínje afañumuu kakaan majake, wah wajakut bale liyilo ikaan. 22Kata láalawom, eluwaayi yata Ateemit ésuumonsuum ŋáa’. 23Bale lijuke kaanaku baje lí ínje eluwa yakee yatiiken eluwaayi yan buyinumabu búmbaam bufañumuu. Eluwaayi inyu ekaanonkaan ilako an an eluwaayi yata kahoofoolaku yammuu lí ínje, ejoke yooken. 24Iyéno, ínje ál̥ahukowan! Ayimaa aate afakenom li eniilayi inye yammuu li éjowetumom li eket? 25Ateemit ajow asali: li Yéesu Kilisita ammuu Amaaŋenawu oololaal.
Muñowu léemummuu amiikeel ata eluwaayi yata Ateemit li buyinumom, ban li éemi amiikeel ata eluwaayi yata kahoofoolaku li eniilayi yúmbaam.
Currently Selected:
Kata Lom 7: cskDBL
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
Kata Lom 7
7
An áyinenumuu li Yéesu láfule li kuŋen kata eluwaayi
1Kutuyom, manooman jihaase waa léemi li ilobuul, mata jihaase waa eluwaayi elobe. Eluwaayi ebabbaj sembe li an akila li buloŋ. 2Anaale ayabowe li ánayine, eluwaayi ekaanookaan abaj hujokoo li ánayinaawu oola, ánayinaawu akila li buloŋ; bale ánayinaawu aketumuu, anaalaawu láfule li eluwaayi yakaanoolumuu kujokoo lí ánayinaawu oola. 3Mó mújimuu, kama anaale ayabowe abajumuu ánayine akee, ban áyinool an kufimmuu min kuyabowe okila li buloŋ, anaalaawu ummu fan ajoki anaale ahintowe li ánayine alet oola; bale áyinool aketumuu, láfule li kuŋenaku kata eluwaayi inyu. Layilo ayabo li ánayine akee, ban let lako lahintohinto li ánayine alet oola.
4Kutuyom, mo nokoomuu foof li bukuluul. Nan Kilisita aketumuu, jiketooketoo li akila hákil eluwaayi. Mó mújimuu muñeˈe akee akiluul. Anawu ummu akila ammuu Kilisita ayitowumulomuu li eketayi, bájum li ukaanaal wah wásuume Ateemit. 5Li mal̥egenamu, nan unaake uloŋaalumuu loon ufañaalumuu, eluwaayi enaanaak eyitenul kásiibowaku kajakutumuu kata eniilayi yoololaal. Kásiibowaku unku li kújiwolaal li ukaanaal wah wáŋalewul eket. 6Bale muñeˈe lúfulaale li kuŋen kata eluwaayi, mata loonowaasoono bukan kakete hákil yo, ban muñeˈe uletaal emiikeel yata yo. Luyiliyaale kama ulokaal boot li Ateemit li bakaane buwunkul babilumulo li Buyinumabu Banabaabu, ban inti loon bakaanelabu bata naanaŋ babilumulomuu li eluwaayi yakiicimuu yahallenumuu.
Eluwaayi wáa éjaliŋe?
7Kama muñowu boot min oonaal buu? Waa eluwaayi kahoofoo yoom? Maayeet! Bale eluwaayi éjimuu li ihaas kahoofoo. Li mal̥egenamu, let ihaaseen mata kásiibo wah eluwaayi baaneenut: «Jakum úsiibo wah walet wooli#Dótelonom 5:21.» 8Kahoofoolaku kúbajumbajum bútin li eluwaayi min kújiwom li ibaj kásiibo kanookan. Li mal̥egenamu, eluwaayi ebajeenutumuu, kahoofoo fan kulako wah wakete. 9Naanaŋ nan eluwaayi ebajutumuu, lilolloŋ; bale nan eluwaayi ebilumuu, kahoofoolaku li kuloŋ, 10mín ínje iket. Muñowu eluwaayi yaateenumuu éŋalul buloŋ, éjowetumommuu li eket. 11Li mal̥egenamu, kahoofoolaku li kújowum li eluwaayi min kubuntom ban li kumukumom li yo. 12Mó mújimuu eluwaayi humum yo enannab, hulimahu hata Ateemit li hunab, li hucol ban li hujak.
13Kama wahawu wajakumuu ulanlaañ wóoti újiwom li iket? Maayeet! Kahoofoolaku kújiwommuu li éeti iket. Kahoofoolaku kújowunjowum li wahawu wajakumuu, min kújiwom li iket. Kuhoofoolaaku kukankaan mo min bóonowabu bata ko bata mal̥egen buyili buhaasi. Muñowu kahoofoolaku kújowummuu li eluwaayi min kuhaŋ májakaati feh.
Kahoofoolaku kúgootengooten ál̥ahukowan
14Li mal̥egenamu, luhaasaale kaanaku eluwaayi li Buyinumabu bata Ateemit ebilumulo, ban ínje léemi an ágootowe, an áami amiikeel ata kahoofoolaku. 15Li mal̥egen ínaanumut wahawu wan ikaanemuu: wahawu wan ifañumuu, íyiliyeliit ikaan wo, ban li inaak ikaan wahawu wan ifañutumuu. 16Nokoomuu loon wahawu wan ifañutumuu wo likaanemuu, li íhaasum tó kaanaku eluwaayi ejaajak. 17Let ínje humumom kama ikaanemuu loon muñaˈa, bale kahoofoolaku kakinumuu lí ínje kukaane mo. 18Mal̥egen, lihaase een wahawu wajakumuu ulet lí ínje, yo yommuu ulet li eniilayi yúmbaam yágootomuu. Liyilo ifañ kakaan majake, bale let iyili ikaan majake. 19Li mal̥egenamu, ínje íkaaneliit wahawu wajakumuu wan ifañumuu ikaan, min inaak ikaan wajakutumuu wan ifañutumuu ikaan. 20Nokoomuu loon likankaan wahawu wan ifañutumuu ikaan, kama inti ínje humumom ikaanemuu loon muñaˈa, bale kahoofoolaku kakinumuu lí ínje. 21Muñeˈe to líhaasummuu eluwaayi inye: ínje afañumuu kakaan majake, wah wajakut bale liyilo ikaan. 22Kata láalawom, eluwaayi yata Ateemit ésuumonsuum ŋáa’. 23Bale lijuke kaanaku baje lí ínje eluwa yakee yatiiken eluwaayi yan buyinumabu búmbaam bufañumuu. Eluwaayi inyu ekaanonkaan ilako an an eluwaayi yata kahoofoolaku yammuu lí ínje, ejoke yooken. 24Iyéno, ínje ál̥ahukowan! Ayimaa aate afakenom li eniilayi inye yammuu li éjowetumom li eket? 25Ateemit ajow asali: li Yéesu Kilisita ammuu Amaaŋenawu oololaal.
Muñowu léemummuu amiikeel ata eluwaayi yata Ateemit li buyinumom, ban li éemi amiikeel ata eluwaayi yata kahoofoolaku li eniilayi yúmbaam.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.