Kata Efées 3

Bulokabu ban Ateemit asenumuu Fool boot li kaletumuu kusuwif

1Wahawu unwu újimuu ínje Fool, ammee li hukul̥ humum hata Yéesu Kilisita boot li bukuluul jaletumuu kusuwif, [ínje ummu li kal̥aw Ateemit boot li bukuluul.] 2Manooman jijanjam li kulob mata bulokabu ban Ateemit ásenommuu kakaan boot li bukuluul, humum hata másuumamu moola. 3Láhiisonhiis wahawu woola wahaasutimuu. Likiiceenuluukiic iban kulim min ilobuul jatit mata wo. 4Jijanga komuu, fan jínaanum waa lihaas tomuu li wahawu wahaasutimuu li Kilisita. 5Wahawu unwu, Ateemit áhiisut wo bukanabuku kata naanaŋ, loon láhiisum womuu muñeˈe li Buyinumabu Banabaabu bukanabuku kan al̥usumuu kulako kufootalaku kanabe. 6Wahawu unwu wahaasutimuu wata Ateemit wo wommuu unwe: bukanabuku kaletumuu kusuwif kubaje wahawu wanolawu li kusuwifaku. Muñeˈe buko bukan kano koom, ban li kóomi ló foof li wahawu wan Ateemit alobumuu kasen kusuwifaku. Wahawu unwu ubabbaj humum hata hujokoolahu hata kaletumuu kusuwif li Kilisita, habilummuu li Hulimahu Hásuumaahu.

7Leenoseeno aloka ata Hulimahu Hásuumaahu humum hata kájiyaku kata Ateemit. Sembaasu soola síjiwommuu li iyili ikaan bulokabu umbu. 8Injé jahaŋumuu matiti li bukanabuku feh kata Ateemit, ínje Ateemit asenumuu kájiyaku unku kata kawaale bukanabuku kaletumuu Kusuwif, hubajahu hata Kilisita han an ayilaatumuu ánaanum. 9Lakaanonkaan min iyili íhiis bukanabuku feh set, buu lammuu li kakaan wahawu wan an ahaaseenutumuu. Akila áwuwenumuu wahoowah feh, layolooyoloo wo kábilum no. 10Lakankaan mo, bánum li ájowum muñeˈe li ejanguwayi min áhiis kuhaanaaku feh li kujojaku feh li uyinumawu wabajumuu sembe haatiya emitayi, buu lájallomuu eeno li wahoowah feh wan akaane. 11Wahawu unwu unaboonaboo li wahawu wan Ateemit afimmuu min ayinoole kakaan tówum ajuul̥ adunaayi, ban li ákaanum wó lí Yéesu Kilisita ammuu Amaaŋenawu oololaal. 12Hujokoolahu hoololaal li Yéesu Kilisita habilummuu li káyinenaku koololaal li akila, hújimuu li uyiliyaal ukoojaal Ateemit li kákangum ló, babajut kákoli kanookan. 13Mó mújimuu, ínje ummu li kaanuul jakum jíyeko mata min emmee li sílaam boot li bukuluul. Sílaamasu unsu so sommuu máyiineniyamu mooluul.

Húbooliyahu hata Kilisita

14Wahawu unwu újimuu li íkuntuŋ min il̥aw hákil Ateemit Atuubaawu, 15an emmuu butoŋ banooban báami li emitayi li etaamayi li akila bóomum tó. 16Láyiineniyiineni ŋáa’ ban li abaj úsooniyen wáamak. Wahawu unwu újimuu lil̥awool mantee Buyinumabu boola li busenuul sembe min uyinumawu wooluul ulit. 17Lil̥awel̥aw loon muñaˈa, mantee Kilisita li akin li uyinumawu wooluul mata káyinenaku kooluul li akila kúji. Lil̥awe mantee li jibaj kuhaa’ kalite li húbooliyahu hooluul ban li jilit li ho, 18min jiyili jibaj sembe min jínaanum, bukuluul li bukanabuku feh kata Ateemit, buu Kilisita ábooliwolaamuu eeno. Lábooliwolaabooli ŋáa’, ban húbooliyahu hoola hútijut. 19Maayeet min kite eenimuu bajut an ayilo ahaas buu Kilisita ábooliwolaamuu eeno, lil̥awe Ateemit mantee li jiyili jihaas húbooliyahu unhu, bájum bóonowabu booluul li buyili bunokoo li mal̥egen li bata Ateemit.

20Ateemit layilo akaan wah wahaŋe ŋáa’ wahawu wan ul̥awaalemuu li wan uyinoolaalemuu, ban lákaanumekaan wo li sembaasu soola sammuu li bulok li uyinumawu woololaal. 21Ateemit ajow ásalumi li Yéesu Kilisita híndo Ejanguwayi, taŋootaŋ ban boot nanoonan. Aameen!

Currently Selected:

Kata Efées 3: cskDBL

Highlight

Copy

Compare