MATHI 6
POCHURY-BSI
6
Zanyoküthse kenüh Küsosie
1 # Mat 23.5. Nohri nüh zanyo kütsüküsuo küsa vü nyiri küüngu nti nyiri atü vünüh küsa azhüzhüluo, jütathuoüji rügi vü küpeh nohri Pa vünüh jisuo küsü nga müngu nüh sanaveh. 2Jükenüh noh nüh zanyo kütsüküsuo küsa vü küsiake küvüngüri nüh kükhurü zhe vü thi lekhuji vü azhü zia taji atütü kükhu kümüjie samütsetümü. Hi nüh nohri vü küzatoke naveh, mari thuoüji mari kümülie peh wieveh. 3Thitü noh nüh zanyoküthse vü noh ke azhie wuo vünüh saküvehwa vi noh ke azhu wuo vü müküüthsü tümü. 4Jüta thuoüji noh nüh zanyo küthsewa tü küüthi vünüh sara naveh; thi nohri Pa küüthi vünüh küngurawa ma mpa müküthiwie thuoh nüh no jisuo tsü naveh.
Kükhuo ro vi Küsosie
(Luk 11.2-4)
5 # Luk 18.10-14. Thi nohri kükhuo küsavü küsiake küvüngüri kümüjie müsa tümü, küpakenühnyunü mari thuoüji nyiri nüh küünguna küsa kenüh kükhurüzhe vü thi lekhuji nato vü tsie taji kükhuo lomü. Thitü hi nüh nohri vü küzatoke naveh, mari thuoüji mari kümülie pewieveh. 6Thitü noh nüh kükhuo küsavü no zhe lovü tu taji amükhie khemü, thi nohri ma müngu nüh küpewa vü kükhuo saluo, jüta thuoüji nohri Pa küüthi vünüh küngurawa müküthiwie thuoh nüh noh jisuo tsü naveh. 7Thi noh kükhuo küsa vü mükütsotüri kümüjie azhü müküzüküzü phratele phrateza nü müsa tümü, küpakenühnyunü mari nüh kümüshe thuoüji, azhü hozake küphra vünüh mari kükhuo künatü natünta müshesheti. 8Jükenüh nohri thuoüji mari kümüjie müsa tümü, küpakenühnyunü nohri Pa thuoüji nohri nüh momowa müvijimümühie nüh nohri nüh müjie kükhuo vünüh thsüküvehthuoh kenüh.
9Jükenüh nohri kükhuo küsa vü hakümjie khuo luo:
Hiri Pa rügi vü küpehwa:
no kümtse nyowa tü küsiakeluo;
10Noh kükajiwa küru luo;
azhih ha nga vi thajüwu vü kümüjie noh müshe saluo,
11Nosü nüh nosü avo hiri tsüluo,
12Nyuri nüh hiri vü müküle küsa hiri nüh noküja kümüjie,
hiri nüh müküle saküsari nojatsüluo,
13Hiri vi kümüramüzhi lovü müthse tümü luo;
thitü kümüsüwa vünüh hiri külole luo.
Küpakenühnyunü kajipewa thi kükhra thi kütholawa tü küsuokürho noh zhi wiethuoh, Amen.
14 # Mrk 11.25-26. Thi nohri nüh nyuri müküle nojatsü thuoüji, rügivü küpeh nohri Pawa nga nohri müküle nojatsü naveh. 15Thitü nohri nüh nyura müküle küsa nojamütsü thuoüji, nohri Pa nga nohri müküle küsa nojamütsüra nüh samü naveh.
Assa Küsa zhü Küsosie
16Jümasevü nga, nohri assa küsavü küsiake küvüngüri kümüjie lokürü atso samükütsa tümü, mari thuoüji nyuri nüh mari tü assa sa veh ta küsa küüthsüna küsa kenüh mari anyia atso saküpa nü kütsatsati. Thitü hi nüh nohri vü küzatoke naveh, mari thuoüji mari kümülie pewieveh. 17Thitü noh nüh assa sana küsavü avüjuh vi noh lü küne luo, thi noh nyia nga müzamü, ti saluo; 18jütisatajinü noh assa küsa vi anyiri atüvü mükütsa tümü, thitü nohri Pa mükünguvü küpewa vü mpa küthsüluo, thi nohri Pa küüthi vünüh küngurawa nüh müküthiwiethuoh nüh noh jisuo tsü naveh.
Rügivü Künyirhieri
(Luk 12.33-34)
19 # Jos 5.2,3. Nohri künyirhie tü azhih hala müvizhuh tümü luo, küpakenühnyunü jümari tü amükhra thi awuozüh nüh tsaküramü naveh, thi kürühuri nga nüh fekhuo wa nü rühu münaküveh kenüh. 20Thitü rügivü vizhuh luo, jüla thuoji amükhra nga thi awuozüh nga nüh mütsara, thi kürühuri nga riephie wa nü müküvira kenüh. 21Küpakenühnyunü no künyirhie khiela peveh nüh noh kümüshe nga jüla pewienaküveh kenüh.
Satsa vü Küwiewa
(Luk 11.34-36)
22Satsa vü küwiewa thuoüji notha wiethuoh; jükenüh noh notha mühie peh thuoüji noh satsa aveh wierake pe naveh. 23Thitü noh notha tü mümühie thuoüji no satsa aveh tü aküzo mpathuoh. Mükütüküzü noh satsa vü küwiewa zomthuoüji aküzo jümatü küzakele jimüthuoh lo!
Saküüwuowa thi Azhih hala Zhiri
(Luk 12.22-31)
24Nyi küsü nüh nyi künyi siepe müsarhiera, jütathuoüji ma tü nyi küsü kümüze nü nyi küpawa mürhümü naveh, nyutü ma tü nyi küsüvü akürho tsümü taji nyi küpawa vünü kulemü naveh. Nohri Saküüwuowa thi künyirhie masü siepe müsarhiera. 25Jükenüh hi nüh nohri vü küza naveh, nohri azhih hala kürho kenüh mowa tsana lo, nyutü mowa zhu na lo, nyütu nohri satsa kenüh thsümünyi mowa vü na lo ti müshe mütse tümü. Nohri kürho tü nohri kütsaküzhu nyia vünüh mümühie ülo? Thi nohri satsa tü nohri thsümünyi nyia vünüh mümühie ülo? 26Halie, rügivü prükütse amüwari kürho müshe noluo; mari tü amahtsü vüwa thsemüveh, thi kümawienga mawie müveh, nyutü mari luo lovü nga vüzhuh müveh; thitü rügivü küpeh nohri Pawa mpa nüh mari vo saküveh wie. Nohri tü mari nyia vünüh mühie she müveh ülo? 27Thinü thari nüh ma kürho kha küsü saküsuora na lo? 28Nohri tü mokenüh thsümünyi kenüh mori luoveh tsaza tse veh lo? Reza vü assanü küwuri mokümjie rhoveh ünüh müshe nonoluo, mari tü shoküshuhruvü küüroküli müsa nyutü asie küra nga müsa. 29#1 Kaj 10.4-7; 2 Kkz 9.3-6. Jükenüh hi nüh nohri vü küza naveh, Kajiwa Solomon wie nga ma tsokrü mühie she wie ketünga aküwu jümari kümüjie vi ma satsa müküteh. 30Jükenüh atovü are nosü shopewie ketünga thuohtü nü viwa anyih lovü tsokümüri wienga Saküüwuowa nüh jümari sarie nga satsü veh üji, halie, nohri kütsotü küzülari, ma tü jümari nyia vünüh nohri thsümünyi sakütsüwanyu ülo? 31Jükenüh nohri thuoüji mowa tsanaveh lo? ti mütsaza tümü. 32Mükütsotüri thuoüji jümari aveh phatseveh, thitü nohri thuoüji zanyo jüri müviji mümühie ta küsa nohri Pa rügivü küpehwa nüh thsükheh veh 33Jükenüh nohri Saküüwuowa kajipe thi ma künyitsa phakhu luo, jütathuoüji zanyo jümari aveh nga vi nohri tsü naveh. 34Tinü thuohtü kenüh müshe nohri luoveh müküraküpre tümü, küpakenühnyunü rülo küsü zhi nyia vünüh küluokümüwa thuoüji mümühie.

Pochuri Naga Bible - KÜMÜTSE BIBLE

Copyright © 2015 by The Bible Society of India
Used by permission. All rights reserved worldwide.

Learn More About Pochury Naga Bible (BSI)