MATTHEW 2
2
Kulkung Lhangrei Mukhei Thimirap
1 #
Lk 2.4-7; 1.5. Heirouri Herod'ne Krung hoiyeinung Judea ramra klei Bethlehem Krungkulla Jesu'ya pukkur. Thilak, heihil tallengne kulkung lhangrei sorwaei ngamra kmu thimi rapne Jerusalem'ra wa'tlungbi heirou yane kngai, 2#Jer 23.5; Zec 9.9; Mk 15.2; Jn 1.49; Msh 24.17. “Jehudia rapbei Krung hoinanungei naoshen khat pukkurri bi koutam'rouwo? Kane aiyei ngamrou sorwa khat kulkung lhangra mulhakurnei ngamrou, kani aya khrumnungei yenraphakheime.” 3Heirou Krung Herod'ne tlou heiwaya myeklhakurnei ngamrou, kalthi uksakur, heirou aiyei ukningra plangurbi kou bisokhi naimakne leikur, heinakne Jerusalem'ra klei thimi namyerwakhi ukningra plangkur. 4Heitounei ngamrou ani Suipipu raple, Chaylamei uparap namyerya ungmartilbi yanungei kngai, “Messiah heiri bi koutamrou pukrouweiyo?” 5#Jn 7.42. Heirou yane, “Judia ramrei klei Bethlehemei Krungkul rilra puktlengrou. Kouweiyo toulanungri, Thimkhui khatne asitoubi mayekhou leilei,” toubi loumallangkur. “Kouweiyo toulanungri asitoubi mayekhoubi leilei: 6#Mic 5.2. ‘Judahyei ram, Bethlehem Krungkul, nangri Judah krungkul rapbei hangra yul mandiya hoiyanungkhi; neirouwei Ruipipu khat hungthukeirou Ane Keiyei Israel thimi rapya ruipirou!’ ”
7Heisi tounei ngamrou Herod'ne kulkung lhangrei mhei'khei thimi rapya munchani ungmartilbi, ‘sorwa heiri koukallei mukurro’ toubine ngaithikur. 8Heitoubi ani yaya, “Nane wabine mukheine nao heiya lhangaine raphalak, heirou nane nao heiya rapha mulanungri keinungkhi pao mallengpilak, keinekhi wabi nao heichaya khrummeise,” toubi shunmatubi heiyilkur.
9Heisi tounarou yane aiyei shunmatuya mayekloubi rapharou wayeinung hallei sorwa heihakri hanuikhi kulkung lhangrei yane muwurthu. 10Heirou yane heiwaya muwurthunarouri beimakne nungwaikur! Heirou sorwa heini yaya loutladuiwurbi nao heiya pukna bihakrou loukarngeikur. 11#Mt 1.18; 12.46. Heirouri yane cheemwaira polhakyeinung naoshen heichari aiyei pui Maryle kalhonne louklei yane wamukur, heirou yane khuklu kanthrunchabi Aya wakhrumkur. Yane yaiyei heimanruikhei sinale frankincense hutthul rapya anungei makatkur.
12 #
Mt 2.22; Pao 10.22; Heb 11.7. Heirouri yane lam lehni chawurbi yai ramranung shaalkur, ngamri Dunpune yanungei rmongra loumuyerbi Herodei leina lhangra kallengmakna'nungei loushunpikur.
Egyptbei Ramra Kartleibi Yulkur
13Heirou yai shaalkur hillouri, Josephbei rmongra Dunpune muyerbi loushunpikur, “Herod'ne naoshen heiya hatnungei ngaakbine leilei. Heiyei ngamne nangne kanthoubine chawurlaka, heitoubi aiyei puiya ruilouheibine Egyptbei ramra yulwurlaka, heitoubi keine nanungei shaalkur yawaroume toubi shunbongyen bi'heirou heisi louleiniya.” 14Heirouri Joseph'ne kanthoubi, naoshen heichale aiyei puiwi yakhuntaya ruilouheibi, masanung yane Egyptbei ramranung chakur. 15#Hos 11.1; Hoy 4.22. Bi heirou Ane Herod hibongyen leiwurkhou. Tloubom awari Dunpune Thimkhui rapnung shunthutpikhou heiwaya chimne hungtlungnanungei. “Keine Keiyei Chanapawa heiya Egypt ram'rouwei ungthutkhou,” toubine thukyerkur.
Douwa rapya Hatkur
16Herod'ne kulkung lhangrei mheikhei thimi rapne aya mandalwulra touya munarouri, a heiri meithukne malungkhakur. Heitounei ngamrou Ane Bethlehem heirou ram heiyei karhillei klei yulthung namyerwarei naoshun-naopar kum-khniyei daakrei klei napawacha touwei'mkhei namyerya hatdurna'nungei chay pikur- lhou awari ane kulkung lhangrei mheikhei thimi raprouwei mayekkur sorwa munei tlaini heirouwei waiyoubi heihilthungei thukkur. 17Asitoubi Thimkhui Jeremiah'ne shunthutkhou heiwaya chimne hungthukkur. 18#Jer 31.15. “Ramah khorilla hou lungkur mayeklei; Kalthi kanrellei chapnei houni thimmura. Rachelni aiyei chanao rapnung'tlim chapbine leilei; Chapya dongalo toubi malung damnanungei manelkhi yamaklei. Koungameiyo toulanungri douwa rapri namma hiwurchiya.”
Egypt Ramrei Yenkalleng
19 #
Mt 1.20; 2.13. Krung Herod hikur hillouri, Joseph'ne Egyptbei ramra leiyeinang Dunpuei Thangringni aiyei rmongra loumuyerbine shunkur, 20“Kanthoubi naole, aiyei puiwiya ruilouheibi Israellei ramra kallenglaka, ngamri naoshen heiya hatnungei rapha thimi rapri hiyura.” 21Heisi tounarouri Joseph'ne kanthoubi, nao heile aiyei puiya ruilouheibine Israel ramra yenkallengkur. 22Heisiya hoiyanungkhi, Archelaus'ne aiyei pa Herodei rungkhlang khoine Judea ramra krung hoileime toubi Joseph'ne mayeknarouri, ane ram heirou kallenglhakrou chikur. Heisiya hoiyanungkhi aiyei rmongra duine loushunmatupi, heisi tounei ngamrou ane Galilee khokulra kallenglhakur, 23#Lk 1.26; 2.39; Isa 11.1; Mk 1.24; Jn 1.45. heitoubi ani ram heirou Nazareth yulthungra cheem khat sabaangbi leikur. Asitoubine Thimkhui rapbei, “A heiri Nazarethrei thimime toubine ungrou,” toubi shunthutkhou tlourap heiri hungchimkur.
Currently Selected:
MATTHEW 2: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.