JOHAN 1
1
Rilung Bomtsi
1Mangjong hiq ara mitiiq wan shaq niiphü Bomtsi ka asi dongdii. Apaiq ka Shiikeawe rai kongshi. Kiimaq apaiq ka Shiikeawe rai khum ashi maq ashi. 2Ra pha hiqwa min mishaq niiphü dongdii, Bomtsi ka Shiikeawe rai rishi siti dongdii. 3Shiikeawe raq ra nai hiq ka apaiq lümaq siisaq phansang wanto. Shiikeawe raq apaiq tlea raüta, jam lai phan min phansang mak dea. 4Apaiq ka rilung rangchong. Kiimaq ara rilung raüchong arka mangjong maiqse ma rawüli. 5Ara rawüli arka ranyaq nyang mong na siti maiqse ma liliim shatli liliim tlo. Ara rawüli arka ranyaq watlaq kra raq, nyam wan lot mak phan.
6Shiikeawe raq apaiq atsa soqti we Johan ka phiija maiqse phana tiikito. 7Apaiq ka mangjong maiqse ma, rawüli tsütsa kra chongke kai kito. Kriika maiqse angu wiita raq, apaiq raq chongkuq tlaq rawüli tsütsa kra tai raüta, mikam wan laq nguta kito. 8Apaiq ka rawü tu ka riimak. Apaiq ka rawü tu lirai tlaq kra tsütsa chongke kai ngutli kito. 9Ara chongtiikai rawüli ahata tengteng rawüli. Ara rawüli arka mangjong hiq na kiraüta, maiqphan angu tarü khu thaq na liliim tlo.
10Bomtsi ka mangjong hiq na sito. Kiimaq, Shiikeawe raq apaiq lümaq, ara mangjong hiq ara phansang wanto. Shatmaq, kra taü maq dongdii min, mangjong maiqse raq, apaiq ka juwa kra sapmak. 11Apaiq ka maiqmii mung na kito. Shatmaq, maiqmii mungti raq, apaiq ka tao mak dea riito. 12Li jiimin la, maiq wiijamti raq, apaiq ka tao wanto. Raüta, apaiq ma kam wanto. Krai mren, apaiq raq tsangshiq ma Shiikeawe setiim ma jawan miitu, arang kuqto. 13Tsangshiq Shiikeawe setiim ma jawantaq kriika, mangjong han-ngam maq rawü chhi tlaq, ikha rawü chhi raüta Shiikeawe setiim ma jawan ka riimak. Shatmaq, Shiikeawe apaiq raq tsangshiq ka, asetiim ma tiija tlo.
14Bomtsi ka maiqse ma pokito. Raüta, apaiq rilung ka kiqkap jaqshap rilung, kiimaq tingting mangchan rilung chhi wan kai. Apaiq ka nashiq rai adam maq sito. Nashiq raq apaiq khushü jonglu kra chhi kai she. Arka Awe raq sekhuq laqlaqse ma akuq, khushü jonglu kra chhi kai.
15Johan raq nokmaiqse ma, apaiq tsütsa ka chongphan kuqto. Apaiq raq chiiriim raüta, “Arwe ahata ngi raq namshiq ma, ‘Apaiq ka i jai na kitlo. Shatmaq, apaiq ka ngi nam ma ajong. Apaiq ka jamkhano ngi ma ajong ngukla, apaiq ka i rawii min michhi shaq niiphü, apaiq ka asi dongdii,’” nguta nokmaiqse ma traho kuqto.
16Apaiq kaphap mangchan tsii ka jürai ikha tümlüm tümli sitlo. Krai mren, apaiq raq nashiq ma, achu shiiman ramram jaqshamke ka tangwa jüchhang khamkai ikha, raükuqtlo. 17Shiikeawe raq Thungtri ka Mosheq lümaq kuqto. Shatmaq, kaphap mangchan nai tengteng rilung ka, Jesuq Khristo lumiitiq kuqtlo. 18Shiikeawe sham ka ümchaü niitaq, maiqse angu wa, jurmin chhi mak shaq. Ase sekhuq laqlaqse, Awe rai shamshi, Awe wokhong na siti we kra riili, Shiikeawe hon atsii ka, maiqse ma tiichhi kuqto.
Khamlamketi We Johan Traho
(Mot 3.1-12; Mak 1.1-8; Luk 3.1-18)
19Jerusalem wa Jehudinok welabi raq ramwebi nai Lewi weraü wa maiq wiijamti ka Johan ma, “Ümniika juwa?” nguta bom tiiwaikai tiikito.
20Johan raq tsangshiq ma, jam min dam paü mak maq, rairai riirii maq, “Ngi ka Khristo riimang,” nguta chongkuqto.
21“Riita, ikhiijiika, ümniika juwiita? Ümniika Elija sha?” nguta tsangshiq raq apaiq ma wai nongto.
“Riimak. Ngi ka Elija min riimang,” nguta Johan raq tsangshiq bom ka treto.
“Riita, ikhiijiika, ümniika shammi we sha?”
“Riimak,” nguta apaiq raq tsangshiq bom ka treto.
22“Riita, ikhiijiika, ümniika ju ngutiiwa tiichong tlaü?” ngutiishe tsangshiq raq apaiq ma bom ka tiitsang wai nongto. “Naishiq raq naishiq tiikaitibi welabi ma bom jang lam wan chang. Riita, ümniika ju ngutiiwa tiingo tlaü, kra naishiq ma chongkuq liina,” ngutiishe tsangshiq raq Johan ma hali tiitsang wai nongto.
23Kiijiishe, Johan raq, Isaia shammi we raq chongthütaq bomtsi kra bliiq raüta tsangshiq ma akha chongkuqto:
“Ngi ahata, ‘Tati We kai chang lam kra
liitatat hea tiije tanholi laq!’ nguta,
kumtsaiphii na agilülü rümti we,” nguta,
apaiq raq tsangshiq bom ka treto.
24Kiijiishe, Phorisinok raq athaü tsasoqti nok raq, 25Johan ma hali, “Riita, ümniika Khristo min riimaü, Elija min riimaü, kiimaq shammi we kriimin riimaü taü miika, nokmaiqse ma kham ka jam nguto lamkuq tlaü?” ngutiishe wai nongto.
26Kiijiishe Johan raq treto, “Ngi riika mungmaiqse ma kham maq lamlam miili kham ka lamkuq tiikang. Shatmaq, namshiq phong na maiq weshi asi. Apaiq ka juwa kra, ümchaü min namshiq raq sap man shaqli. 27Apaiq ka ngi jai na saühotlo, Shatmaq ngi ka, apaiq hokpa raükha kra diiketi khan min thek mang.”
28Johan nai tsasoqti nok liipan na, ara bom riiwaisotaq arka, Jordan rai maq shedong nü na, Bethani hiq na, Johan raq mungmaiqse ma kham lamke chang ba kriimaq riibomto.
Shiikeawe Skuse
29Kiimaq napjai ranaiq niishe, Johan raq Jesuq ka apaiq phanü na awarai she chhito. Kra chhi raüta, Johan raq nanok ma chongto, “Liirong laq arhata, mangjong maiqse ngarai howanti Shiikeawe Skuse! 30Apaiq ara chhi lata nang tiina, ngi raq akha ngu kang ira, ‘Ngi jai na maiq weshi kitlo. Shatmaq, apaiq ka ngi nam ma ajong. Jamkhano ngukla, apaiq ka ngi rawü min michhi shaq niiphü, asi dongdii.’ 31Ngi raq apaiq ka juwa riijiiq, kra sap mang dea riikang. Shatmaq, apaiq ka juwa kra Israilnok man na mang triisap miitu, ngi raq nanok ma kham she lamkuq wankang.”
32Krai mren, Johan raq ara hakhi ara kuqto, “Ngi raq ra wa Asii Wenyi ka haütaü kaü ikha satki raüta, apaiq khu thaq na ngakai chhikang. 33Ngi riika apaiq ka arwe arshe sham nguta sap mang shaqli riikang. Shatmaq tiina, Shiikeawe raq ngi ma, maiqse ma kham lamkuq kikiq nguta tiikitaq akhing na, ‘Ümniiraq Asii Wenyi ka ra wa satki raüta, maiqwe ashi khu thaq na angakai michhi haü. Kriiwe raq, maiqse ma Asii Wenyi maq kham milam kuq,’ nguta chongkuqto. Riita, krai mren, Asii Wenyi ka kiraüta maiqse ashi khu thaq na ngakito kra chhikang. 34Riita, kra ngi ma chongkuqtaq krai mren, ngi raq chhi kang she. Ngi chongpha, Shiikeawe Se ka apaiq dea,” nguta Johan raq mungmaiqse ma tru chong kuqto.
Jesuq Jaqshisetiim Ma Jawan Phatibi
35Kiimaq napjai ranaiq niishe hali, Johan ka ajaqshise nai wenai krai adam na kiijaq achap raü riito. 36Kra akhing na apaiq raq Jesuq ka lam na awarai chhito. Kra chhi raüta, “Liirong laq, ahata Shiikeawe Skuse!” nguta tsangnai rai riibomto.
37Krai mren, ajaqshi se nai raq apaiq bom kra taito. Kiimaq tsangnai raq Jesuq jai she phan wanto. 38Jesuq raq ajai nü na liito. Raüta tsangnai ka apaiq jai na awarai chhito. Kra chhi raüta Jesuq raq, “Nam nai raq jamlai wa rit tlan?” nguta tsangshiq ma waito.
Tsangnai raq, “Rabbi, ümniika ümbano sitlaü?” nguta apaiq ma waito. (Ara liichum ka Shrinketi we nguta ngo riito.)
39Kiijiishe, “Wrong i na. Ngi si chang ka liiwa rongkiq,” nguta apaiq raq tsangnai bom ka treto. (Kra akhing ka raji, ramwacho she riito.) Krai mren tsangnai ka apaiq rai, apaiq sichang na wawan damto. Raüta shethiq ka kiijaq haisiq damto.
40Tsangnai wenai wa weshi ka Simon Petar ma ano, Andru. 41Apaiq ka aphu Petar rai kongkhu riihumsaq raüta, “Naphu loi nainai raq Messia rai riihumkai,” nguta apaiq ma bom ka chongto. (Messia ngutlaq kriika Khristo ngo nangnga riito.) 42Raütiishe, apaiq raq aphu Simon ka, Jesuq phaniishe shea wanto. Jesuq raq Simon Petar phanü na lii raüta, “Ümniika Johan se Simon. Shatmaq, ümchaü ara miiphat she, ümmang ka Sephas she miraq.” (Sephas nai Petar ngutlaq kra liichum ka “longkaü” nguta ngo she riito.)
Jesuq Raq Philip Nai Nathaniel Hea Wanto
43Kiimaq napjai ranaiq niishe, Jesuq ka Gelili hiq nü na wawan miitu tiijeto. Kra akhing na apaiq raq Philip ka chhito. Krai mren, “Philip, ümniika ngi rai wa i!” nguta apaiq raq Philip ka hea wanto. 44(Philip ka Andru nai Petar sichang Bethsaida hiqti sii.) 45Kiimaq Philip ka Nathaniel rai riihumto. Raüta, apaiq ma chongto, “Naishiq raq Najareth hiqti Joseph se, Jesuq rai riihumkai. Apaiq miitu ka Mosheq raq Thungtri lakdap na waiq thüto. Kiimaq, shammibi riimin waiqthüto.”
46“Riita, Najareth hiq wa phanshi ra aliip apha dong chang ka asi sha?” nguta Nathaniel raq waito.
“Walaüta liiwakiq na,” nguta Philip raq apaiq bom ka treto.
47Jesuq raq Nathaniel ka apaiq phanü na awa rai kra chhi raüta, apaiq miitu akha chongto, “Arhata miikiim se ashi Israil we. Apaiq ka chiisan maiqse ashi!”
48“Ümniiraq ngi ka jamkho sap laü?” nguta Nathaniel raq Jesuq ma waito.
Jesuq raq treto, “Philip raq mihia wan shaq niiphü, ümniika phupmup chong ji na nga raü chhikang.”
49“Shrinketi we, ümniika Shiikeawe Se kha na! Israilnok Hokham we ahata!” nguta Nathaniel raq apaiq bom ka treto.
50Kiijiishe, Jesuq raq, “Ngi raq ümniika phupmup chong ji na nga raü chhikang ngu pha tiisha ngi ma kamtlaü? Ümniiraq arthaq niimin awang chang jonghea michhi haü shaq dea asi!” nguta apaiq bom ka treto. 51Kiimaq apaiq raq, “Ngi raq chongtiikang arka tengteng. Ümchaü sanha namshiq raq mungtan kilü ka tiidishat she michhi han. Kiimaq Shiikeawe rasetiim ka, Maiq Se khuthaq na akiti aki, awati awa, adü asat, akhum ashiim she michhi han,” ngutiishe tsangnai ma chong kuqto.
Currently Selected:
JOHAN 1: TANGSBSI
Highlight
Share
Copy
Want to have your highlights saved across all your devices? Sign up or sign in
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.