MATI 28
28
Gerepkuname
(Mk 16:1-10; Lk 24:1-12; Jn 20:1-10)
1Sabbath Gíídí méélampe, hopta kerang yalum longe lokke rokompe Magdalini Marilang akon Mari bulu ago kangkape gíto. 2Depe iduem botteruna taronko tonto, legade teyong telok Ruutumke teyong kotokiko tokla, agodelo gíla, lííbyadem kiiyapala delo duuto. 3Kaaname bí yaari kísa ido, delokke bíkke egede tapam kísa yalune ido. 4Sontori kídíde bím pesorunge ikane bulu dan-go sugeyéla sina kísape igeto.
5Teyong kotokide mime kídíem poto, “Pesomapeka, kapeila ngo kéndung, nolu pansaatonam Jisu memin matadune. 6Bí so duuyimang, bíkke ponam kísa pakpe bí gerep kaku. Aala bím yukuem kaato langka. 7Demílo nolu menape gílangkula bíkkelo luyilsuna kídíem sikepe pobi tokuka: ‘Bí sikolokke gerep kaku delokke Galillo noluke kerape gídak. Galillo nolu bím kaayé. supak ngo nolum pobito.’ ”
8Dekepe iname mime kídíde ago delokke menape, pesueku ashéngeku ilangala gíkaku delokke bíkkíng luyilsuna kídídelo pobi kakupe emla duktoku.
9Menang asak Jisu bí bulum ríksuto. “Salam” emla bí poríksuto. Bulu bíkkíng aala, bíkke alem jumdola bím kumto. 10Delo Jisu bí bulum poto, “Pesomapeka, gílangkula ngokke bíro kídíem Galillo endope poto langkaku; delo bulu ngom kaapayé.”
Sontori Kídílokke Pokuname
11Mime kídíde bedalo endung adape, sontori kídí ayokone taon delo gíla ríne kídíem kape ikadí dem takam dem poyinbito. 12Ríne kídíde miro kídídem ríksuyédem bulu budiiko ruubosuto, bulu sipaying kídídem abalem deddínako bidola, 13bulu poto, “Nolu sikepe polangka, ‘bíkkelo luyilsuna kídíe yuem aala ngoluke ipnge sudungem bím laanyok bomkaku.’ 14Si agom si gobonorkíng pííyém ngolu bím eetet moyé delokke nolumte duuk bimayé.” 15Dekepe iname sipaying kídíde murkongem laala buluke ponampe ito. Delokke ila si dooyisi supaklope Judai kídíke gooralo dung.
Jisuke Bíkkelo Luyilsuna Kídíem Lengkansukuname
(Mk 16:14-18; Lk 24:36-49; Jn 20:19-23; Tom 1:6-8)
16Delokrongem íying kolang atel luyilsunade Galillo Jisuke bulum políkko díítelo gíto. 17Bulu bím kaayédem, bím kumto; idola ayoko mííne míngoto. 18Delo Jisu bí bulukíng gíla poto, “Takam teyong among kelang tani amongke ruutum inanem ngom bitung. 19Delok legape tani takamlo gíla bulum Abu kelang, Ookelang Deena Aidke amínlok baptis bila bulum luyilsuna amipe imotoka, 20delokke bulum ngokke ngiitom tomnam takamem luyilla, ige molangka. Delokke berokrupe ngo nolukíng yéyin longelope duuyar mínyé.”
Currently Selected:
MATI 28: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
