MALAKI 1
1
1Israel ami kídíem lupang bidope, Malaki kíng Ruutum ke lulígnam agom kídíe:
Jakobme Ayaname Delokke Esaume Akname
2 Ruutum bí sipe podung, “Nolum ngo agínpe ayato.”
Idola ami kídíe bíme poyansuto, “Ngolum no kape kísa ayaton?”
Ruutum bí poyansuto, “Esau bí Jakob ke abíng mangía? Idola ngo Jakob melang bíkke otíng kídíem ayayato, 3delokke Esau melang bíkke otíng kídíem ngo akla, bíkke adi among kídíem mooruk amongpe imola; bíkke yébom-dakbomnam ekuserang kídíem ménsurung kídílo melíkto.”
4Esauke otíng Edom ami kídíe, “Ngolume atung-aréérupe imotuakom, ngolu doolung kídíem irepyéku,” emla podagakom Maglíngke Ruutum bí sipe podung, “Bulu irepladoku, idola ngo ekum kídíem bénpak yéku. Buluke amongdem atímana amonge emla, delokke ami kídíem, Ruutum ke agínpe marlíng bomnam opíne emla manyé. 5Nolu agí amigsue deke takamem kaapala, ‘Israelke among rísu luyu kídí loote Ruutum bí miga-miram runako emla yidgeyé.’ ”
Miri Kídíem Ruutumke Luname
6Maglíngke Ruutum bí sipe podung, “Ue abuem, delokke abíle ruutumem míída sudung. Ngo abuemílo ingko loda ngome míída subomname? Ngo Ruutume mílo, ngom kape rogemangkan? Miri kídar nolu, ‘Ngolu kape kísa nokke amínem míngge madun?’ emla nolu íngkídung.
7“Nolu ngokke deena runggulo belumnam donam-tíínamem melíkdung. Idola nolu Ruutumke runggudem deema modokom aiyé míídola, ‘Kape kísa ngolu nome deema moton?’ emla íngkídung. 8Edílo nolu mikmana, delokke lebyana, demangkom kina-ramna simon-sili kídíem ipakpe ilíkdope ngokkíng bomadudí, de atí imem kamang emla nolu míídunía? Noluke gobonor ruutumlo dekena ato-siroem bomang kítol! Bí nolum ashépe kaaríksula, dekedem toríksuyédí, demangke bíkkelok mííbaanamko paayédí?”
9Supage miri kídí nolu, ngoluke teyolo Shédíke ayange duudope rogu gugap kítoka. Idola noluke alag kídí delok dekena aman kídíem bí torík suyénía? 10Maglíngke Ruutum bí podung, “Noluke aralokke akone, Kumkeng Ekum lokke eyabem sittum duamílo, emla ngo míídungai. Depe inamko kamílo ngokke runggulo noluke agér bimana ememe parlík moyimayai. Ngo noluke teyolo aipe míímang; delokke ngo amanem noluke alag delok torík sumayé. 11Doonyi sangko lokke ila uangko loope, ngokke amíne opín-buang takamlo botte aloodung. Yéta takamlo ngome ami kídíe, arí namponem rombila, delokke toríksubaanam amanem bomla bidung. Kapeila opín-buang takamlo ngok amíne duula ngom mínggedung. 12Idola, ‘Ruutumke runggude agér kamang,’ delo ‘Donam-tíínam kídarde deemang,’ emla noluke pokolok nolu ngok amínem deema modung. 13Depe emko teyoloteng, ‘Sikesim itíla apéé alongkai,’ emla lubosula ngok ponamem ipéésutídung. Nolu doppyonam mér sobén kídíem, kina-ramna, delokke lebya-lakbyana kídíem ngokkíng ipakpe ilíkdope bomadung. Dekedem ngo torík suyé emla nolu míídunía? 14Dekena are kamana mér sobén atíem bomala, agíke arasulo gainem leesisula, ngokkíng tolík sutula yatna kídí teyolo ngokke péname kayé. Kapeila ngo bottena Rojako, delokke opín-buang daadi takame ngome peso soyindung.” Sikepe Maglíngke Ruutum bí podung.
Currently Selected:
MALAKI 1: adiBSI
Highlight
Copy
Compare
Share
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
