JOAN 2
2
Kanalo Nyamran Iname
1Longum nanalo Galil lokke Kanalo nyamranko ito, Jisuke ane delo duuto, 2delokke Jisu melang bíkkíng luyilsuna kídí emte nyamran delo tomaato. 3Onggur alangem tííyin rongem, Jisuke anede bím pokane, “Bulu onggur alang kayimang” emto.
4Jisu bí poyansuto, “Ayanam ane, no ngokke legape kapeila míítídune? Ngokke moodíe píímangada.”
5Bíkke anede béérang kídíem poto, “Bí ingkuem poyédí depe ibitoka.”
6Judai kídíke arbín sunam dormo niyom inana gallon íying annyi lokke ila íying angumna asiem mekeng kédeng peking akkéko kato. 7Jisu bí béérang kídíem poto, “Kédeng peking kídíem asilok píbíítoka,” delo bulu depe iname dem alíílo bíídope purbííto. 8Delokrongem bí bulum poto, “Supak dem tupla nyamran atolo bomang bitola.” Bulu depe ibito, 9delo nyamran atode onggur alangpe ikuna asidem ikangkíto. Asi bomna béérang kídíde dem kéntuakom, bí dem ingkolok ilentodí dem kénmato. Delokrongem bí makbodem tompek supala, 10pokai, “Mipile kedíkna alang emmin orpodune delokrongem mibo kídíe tíngír surongem kedík mayana alangem ordo; idakkom nodan supaklope kedík nemte metungada.”
11Si kera yalumpe, Galillokke Kanalo Jisuke irisinyo iyod iboname. Bí dekepe bíkke angun ralnamem lengkanto, delokke bíkkíng luyilsuna kídíe bím míngke sukai.
12Sok méélampe bí bíkke anemlang, bíro kídí emlang bíkkíng luyilsuna kídíem gíbosula Kapernaumlo gíto. Delo bulu loonyi longumko duuto.
Kumkeng Ekumlo Jisuke Gíname
(Mt 21:12-13; Mk 11:15-17; Lk 19:45-46)
13Judai kídíke Gíbong gíídíe pííyébong iduem, Jisu bí Jirusalem lo gíto. 14Kumkeng Ekum gooralo ami kídíe gooru sobénem delokke parongem kola delokke ayokone tébullo duula abal líkpésula idope bí kaato. 15Depe ila bí sotkyalok boyikpe mola, kumkeng ekum delok takamem, goorudak delokke sobéndak monpak toku; bí abal líkpe sunemte abalem kuppak bila delokke buluke tébul kídarem kuppak bito. 16Parong kona kídíem bí poto, “Sikesim sokke bomgétoku! Ngokke Yayike ekumem pesikoret mokepe inamem nolu igotmanía?” 17Bíkkíng luyilsuna kídíe sim atnam sim míípa sutoku, “Nokke ekumlo erbomnamde ngom dosuyéku.”#Miri 69:9
18Delokrongem Judai amikídíe ííto, “Si tabung sim inana nokke ralnamem kangkepe ingkona irisinyo iyodem no ngolum lengkan ladon?”
19Jisu bí bulum poyansuto, “Sim kumkeng ekum sim bénpaktoka, delo ngo sim longum aralo morepyéku.”
20Judai kídíe poyansuto, “Sim kumkeng ekum sim modungem takying appi kolang takkéko ilíkto, delo nodan longum aralo sim modak kunía?”
21Jisu bí agíke amíl kumkeng ekum legasuem potuai. 22Bím sikolokke kiirep rongkuem méélamdem bíkkíng luyilsuna kídíe bíkke ponam sim míípang sutoku. Delo bulu. Dooying kitabem delokke Jisuke ponam agom kídar sim arope míítoku.
Jisuke Tani Akorem Kényin Suname
23Gíbong gíídílo Jirusalemlo bíkke duudungem, bíkke inam irí sinyo iyodem bosi borang amie kaala bíkke amínem arope míngkesuto.#2:23: Demangkom “Delokke bíkkíng arope míngkesuto.” 24Idokom Jisu bí agíe bulukíng míída sumato, kapeila bí ami takam aapíem kényinto. 25Ami legangem bím pobi penam kamang kapeila bí amie kapenedí dem kényinto.
Currently Selected:
JOAN 2: adiBSI
Highlight
Share
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.