Juan 3
3
Ri Jesús y ri Nicodemo
1Kꞌo jun achi fariseo rubꞌiniꞌan Nicodemo, y ri achi riꞌ jun chikikajal ri achiꞌaꞌ israelitas kꞌo uchuqꞌaꞌ pa kiqꞌaꞌ. 2Pa jun tokoqꞌaꞌ, xbꞌeqaqa apeꞌ kꞌo ri Jesús y xubꞌij chare: Tijonel, qetaman chi rat jun tijonel taqon pe roma ri Dios,#Jn. 9:16, 33; Hch. 2:22 porque ri retal ruchuqꞌaꞌ ri Dios ngaꞌabꞌanalaꞌ, nixta jun wineq nditiker ndubꞌen, si maneq ri Dios rikꞌin.#Hch. 10:38
3Y ri Jesús xubꞌij chare: Kin qetzij nibꞌij chawa, si jun wineq ma ndalex ta chik jumbꞌey,#Jn. 1:13; Stg. 1:18 maneq cheꞌel ndok pa ru-reino ri Dios.
4Ri Nicodemo xubꞌij chare ri Jesús: ¿Achike modo xtalex chik jumbꞌey jun wineq riꞌj chik? ¿Nditiker kami ri ruteꞌ ndiralaj chik jumbꞌey?
5Ri Jesús xubꞌij: Kin qetzij nibꞌij chawa, si jun wineq ma ndalex ta rikꞌin yaꞌ y rikꞌin ri alaxik nduyaꞌ ri Espíritu Santo,#Tit. 3:5 ri wineq riꞌ maneq cheꞌel ndok pa ru-reino ri Dios. 6Ri ngeꞌalex chikiqꞌaꞌ ri kite-kitataꞌ, xaxe ri aj rochꞌulew kꞌaslen kikꞌuan, pero ri kikꞌuan ri alaxik ri nduyaꞌ ri Espíritu Santo, kin ja ri kꞌakꞌakꞌ kꞌaslen pataneq rikꞌin ri Espíritu Santo kikꞌuan. 7Ma tisach akꞌuꞌx rikꞌin ri xinbꞌij chawa, chi ndikꞌatzin ngatalex chik jumbꞌey. 8Ri kaqiqꞌ ndiwujuj xa apejeꞌ na, y maske ndawakꞌaxaj chi ndiwujuj, ma awetaman ta apeꞌ pataneq y apeꞌ ndibꞌa wi. Keriꞌ ndibꞌanatej kikꞌin ri wineq ri kikꞌuan ri kꞌakꞌakꞌ alaxik. Ma qꞌalej ta achike modo ndisamej ri Espíritu Santo pa kánima chin ndujel kikꞌaslen.
9Ja atoq riꞌ ri Nicodemo xubꞌij chare ri Jesús: ¿Achike modo ndibꞌanatej ri alaxik ri ndabꞌij?
10Ri Jesús xubꞌij chare: Rat, rat jun nimalej kitijonel ri israelitas, y ¿ma awetaman ta rubꞌeyal re nibꞌij chawa? 11Kin qetzij nibꞌij chawa, chi ja ri qetaman y ri qatzꞌeton ri ndiqatzijoj,#Jn. 3:32 pero rix ma ndiwojoꞌ ta nditaqij ri ndiqabꞌij chiwa. 12Riyin ja ri achike ngebꞌanatej chochꞌulew ri nutzijon pe chiwa y ma nginitaqij ta. ¿Achike modo xkinitaqij si nitzijoj ta chiwa ri ngebꞌanatej chikaj?
13Ma jun wineq chochꞌulew ri bꞌaneq ta e chikaj#Jn. 6:38; 16:28 apeꞌ kꞌo ri Dios, chin ta ndurubꞌij achike rubꞌeyal nojel chiriꞌ, xa kin xe ri jun qajneq pe, y riꞌ ja riyin ri aj chikaj ri xinuꞌalex chiꞌikajal. 14Y achel xubꞌen ri Moisés pa chaqiꞌj y tzꞌiran ulew, xujotobꞌaꞌ chikaj ri rachibꞌel jun kumetz#Nm. 21:9 chutzaꞌ jun cheꞌ, keriꞌ chuqaꞌ ndikꞌatzin chi riyin ri aj chikaj ri xinuꞌalex chiꞌikajal ngijotobꞌex chikaj.#Jn. 8:28 15Chin keriꞌ, xa achike na ri nditaqin wichin, ndiril ri kꞌaslen ma ndikꞌis ta,#Jn. 3:36; 6:40, 47 xchajeꞌ ri Jesús.
Ri Dios ndirajoꞌ chi konojel wineq ngekolotej
16Porque ri Dios santienta xerajoꞌ#Ro. 5:8; Tit. 3:4 ri wineq, y romariꞌ xuteq pe ri junayon Rukꞌajol chochꞌulew, chin keriꞌ xa achike na wineq ri xtitaqin chi ja rijaꞌ ri rukolonel, ma ndibꞌa ta chupan ri kamik, xa kin ndiril ri kꞌaslen#1Jn. 4:9 ma ndikꞌis ta. 17Ri Dios ma chin ta nduruyaꞌ castigo pa kiwiꞌ ri wineq xuteq pe ri Rukꞌajol chochꞌulew, xa kin xuteq pe chin ngekolotej#1Jn. 4:14 ri wineq roma ri Rukꞌajol.
18Ri castigo ri nduyaꞌ ri Dios ma ndiqaqa ta pa ruwiꞌ#Ro. 8:1 jun wineq ri xtutaqij chi ja ri Rukꞌajol ri Dios ri rukolonel, pero ri ma xtutaqij ta, kin kꞌo chik ri castigo pa ruwiꞌ, porque ma rutaqin ta chi rukolonel ri junayon Rukꞌajol ri Dios. 19Ri achike roma ri Dios nduyaꞌ castigo pa kiwiꞌ ri wineq, jareꞌ: Ri Jun ri ndiyikꞌan kikꞌaslen ri wineq xuqaqa chochꞌulew,#Jn. 1:9 pero ri wineq más xkajoꞌ xekꞌojeꞌ pa qꞌequꞌ, porque xa kin itzel wi ri ngetajin rikꞌin. 20Porque konojel ri ngekibꞌanalaꞌ itzel teq achike, ma ndikajoꞌ ta ndiyikꞌex kikꞌaslen y ma ngejel ta apu rikꞌin ri Jun ri ndiyikꞌan kikꞌaslen, chin ma tiqꞌalajin pe ri itzel teq achike ngekibꞌanalaꞌ. 21Pero ri wineq ri ja ri qetzij ndubꞌen pa rukꞌaslen, ndijel apu rikꞌin ri Jun ri ndiyikꞌan rukꞌaslen, chin keriꞌ nditzꞌetetej chi ri ngerubꞌanalaꞌ, ja ri Dios ukꞌuayon richin chin ndubꞌen.
Ri Juan ri Bautista kꞌo chꞌaqa chik jabꞌel teq tzij xubꞌij pa ruwiꞌ ri Jesús
22Atoq xbꞌanatej yan nojel reꞌ, ri Jesús junan kikꞌin ri ru-discípulos xebꞌa pa rochꞌulew Judea, y chiriꞌ xuqꞌasaj jun tiempo kikꞌin, y ngerubꞌen bautizar#Jn. 4:2 ri wineq. 23Chupan ri tiempo riꞌ ri Juan ri Bautista ndubꞌen chuqaꞌ bautizar pa rochꞌulew Enón, chunaqaj ri jun lugar rubꞌiniꞌan Salim, porque chiriꞌ santienta yaꞌ kꞌo, y ri wineq ngebꞌeqaqa chiriꞌ y rijaꞌ ngerubꞌen e bautizar. 24Nojel riꞌ xbꞌanatej atoq kꞌajani tiyoꞌox pa cheꞌ#Mt. 14:3; Lc. 3:19, 20 ri Juan ri Bautista.
25Pero jujun ru-discípulos ri Juan ri Bautista xkichuquchaꞌ kiꞌ chi tzij rikꞌin jun israelita pa ruwiꞌ ri achike chi chꞌajchꞌojrisanik ri más utz. 26Rejeꞌ xebꞌa apeꞌ kꞌo ri Juan ri Bautista y xkibꞌij chare: Tijonel, ri jun achi ri xchꞌaꞌa awikꞌin ri jukꞌan chik apu ruchiꞌ ri raqen yaꞌ Jordán, ri achoq pa ruwiꞌ rat kin utz xachꞌaꞌa wi, wokami ndubꞌen bautizar y konojel ri wineq ngebꞌa apu apeꞌ kꞌo rijaꞌ.
27Ri Juan xubꞌij chake ri ru-discípulos: Ma jun achike nditiker ndubꞌen jun wineq, si ma ja ta ri Dios ndiyoꞌon qꞌij chare chi ndubꞌen. 28Y rix iwakꞌaxan ri xinbꞌij chi ma ja ta riyin ri Jun ri taqon pe roma ri Dios chukolik ri rutinamit, xa yin taqon pe nabꞌey chin nuyaꞌ utzulej rutzijol#Mal. 3:1 rijaꞌ. 29Pa jun kꞌulubꞌik ri kꞌajol ndikꞌuleꞌ jariꞌ ri ndok rachijil ri xten, y ri kꞌajol peyon chin ndikꞌojeꞌ pa ruwiꞌ ri nimaqꞌij chin ri kꞌulubꞌik, santienta ndikikot atoq ndirakꞌaxaj chi ri aj kꞌulubꞌel ngetzeyaj chikiwech. Keriꞌ kꞌa chuqaꞌ riyin santienta ngikikot roma niwakꞌaxaj chi wokami santienta wineq ngebꞌa apu apeꞌ kꞌo ri Jun taqon pe roma ri Dios chukolik ri rutinamit. 30Porque ndikꞌatzin chi rijaꞌ ndinimer ruqꞌij, jakꞌa riyin ndikꞌatzin ndichꞌutiner nuqꞌij.
Ri Jun ri qajneq pe chikaj
31Ri Jun ri qajneq pe chikaj más nimalej ruqꞌij ke chikiwech konojel wineq, y aj chikaj nojibꞌel ndurutzijoj chiqakajal. Jakꞌa ri rusamajel ri kꞌo chochꞌulew, kin aj rochꞌulew wi, y xaxe ok ri achike kꞌutun chuwech ndutzijoj. Ri Jun ri qajneq pe chikaj#Jn. 8:23 más nimalej ruqꞌij ke chikiwech konojel.#Mt. 28:18 32Ri Jun ri qajneq pe chikaj, ja ri rakꞌaxan y rutzꞌeton pe chikaj ri nduyaꞌ rutzijol,#Jn. 8:26 pero ri wineq ma ndikitaqij ta ri ndubꞌij.#Jn. 3:11 33Jakꞌa atoq jun wineq ndutaqij ri nojibꞌel ndutzijoj ri Jun ri qajneq pe chikaj, rikꞌin riꞌ ndiqꞌalajin chi ri Dios jumul ndubꞌij ri qetzij.#1Jn. 5:10 34Porque ri Jun ri taqon pe roma ri Dios, ja ri tzij rakꞌaxan pe rikꞌin ri Dios ndutzijoj,#Jn. 7:16 porque ri Dios nduyaꞌ ri Espíritu Santo y ma ndukꞌekꞌej ta nduyaꞌ. 35Ri Tataꞌaj Dios santienta ndirajoꞌ ri Rukꞌajol, y nojel rujachon pa ruqꞌaꞌ.#Dn. 7:14 36Ri nditaqin chi ja ri Rukꞌajol ri Dios ri Kolonel, kꞌo ri kꞌaslen ma ndikꞌis ta rikꞌin. Pero jun ri ma ndunimaj ta ri ndubꞌij ri Rukꞌajol ri Dios, ma ndikꞌojeꞌ ta ri kꞌaslen ma ndikꞌis ta rikꞌin, xa kꞌa keriꞌ kꞌo chuxeꞌ ri nimalej royowal ri Dios.
Currently Selected:
Juan 3: cakX
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.