Лука 5
5
Глава 5
Иисус Христос өмнилгэй хупкуттыӈэлгэй чакачиддан
1Өмнэкэн Иисус Генисаретский төӈэр хөлидун илаттин, бэил, ноӈман эрэлридюр, Хэвкидыв төрэм долчиддитан. 2Ноӈан дӫрбу ӈяла илаттылбу момилбу иттин. Олрачимӈал, момилдукур илридюр, анчиндулатан адалалбур тэссэддытэн. 3Ноӈан өмэндулэ момила ойчирин, тарак Симон момин бисин, Иисус ноӈман гасчирин, мө дулакантакин момирасандан. Тар моми дөдун биникэн, бэилбу хупкучидилрин. 4Төрэрий оддыди, Иисус Симонтаки гөнин:
– Момидасли улгэнтэки, адали-да усиӈдэли.
5Симон барагрин:
– Хупкучимӈэ, бу долбону чөптэрэ бэйчиривун, яв-да эчилбун бакра, тек-эси хин гөнигчинси нексодим.
6Ноӈартан адалалбур мөлэ усиӈдэритэн, хояв олрав бакритан, эсомикэн адалалтан тэкэрэстилритэн. 7Ноӈартан гяла момила бисилбэ дялбур эридилритэн. Тарал момирритан, бэлэдилритэн, дӫривэн момилбу милтэрэмкэнитэн, момилтан ургэчилритэн, мөлэ тыкэдилритэн. 8Тарав иттыди, Симон-Петр Иисус дюлдэлэн хэнӈэнди тыкрин, гөникэн:
– Мин Хунӈив, мину эмэли, эди неккил, би төнӈэкичилкэн бисэм!
9-10Петр, ноӈан дялни Зеведей нярудилни Иаков, Иоанн-да, хөнтэлдэ олрачимӈал, тардыван олрав иттыдюр, хэӈулритэн. Таракам Иисус Симонтаки гөнин:
– Эди ӈэлкил! Тек-эл хи эрэгэр бэилбу чаккараградинри.
11Ноӈартан момилбур ӈяла ирритан, эйдуӈур тала эмэнитэн, Иисусту бодаснитан.
Иисус Христос игатач бутэнрив бэю бэгдэттэн
12Иисус өмэндулэ городла биддэкэн, ноӈантакин өмэн бэй игатач бутэнри эмрин; Иисусу иттыди, Ноӈман дэпки хэнӈэнди тикрин, Ноӈман гасчидилрин, гөникэн:
– Хунӈиву! Некэмэлми, Хи мину тэсэмчис!
13Иисус ӈали алимрин, бутэнрив тэмиснин, нян гөнин:
– Тэсэбдэс некрэм.
Таракамат тарак игатан аталаптин. 14Иисус ноӈантакин гөнин, эдэн тарав ӈитки-дэ тэлэӈрэ, поптэки мэни ичукэндэн, нян коримэм тэсэвчэлий эмудэн, Моисей итучагчинни, ай очаван эйдудун ичукэн бидин. 15Нян тарбач унэт ходмарач Ноӈман тэлэӈэдилритэн, хоя-да бэил ноӈантакин ӈэнритэн. Ноӈман долчидавур, энэкэлбур-дэ бэгдэтэвур. 16Тарбач Ноӈан энтэрэн биситки төртэки хөроттэн, таду нэӈэддёттэн.
Иисус Христос осэлчэв бэю бэгдэттэн
17Өмэндулэ инэӈнэ Ноӈан хупкучиддэкэн, фарисеил, Итум-дэ хупкучимӈэл, Галилея, Иудея, Иерусалим-да төрэӈэтэн чэлэдукутэн эмчэл тала тэгэттэкэтэн, нян Хунӈит эӈин-дэ бутэнрилбу айдан ичуттэкэн, 18тар бутэнрив осэлчэв бэю инситэн, ноӈман дюла ивувсчидилритэн, Иисус дюлдэлэн нэдэвур. 19Хоя бэй бисэкэн, туркуритэн ивӈэ, дю ойлэн ойчиритан, ойгич бутэнрив бэю тэдэлкэм дю дулакандулан, ойдэвэн хаюридюр, Иисус дюлдэлэн эвукэнитэн. 20Нян Ноӈан, тарал тэдемутэн итми, тартаки бэйтэки гөнин:
– Хин төнӈэкичу овканчас аталаптан.
21Итум хупкучимӈэл, фарисеил-дэ мэр доливур укчэнэдилритэн, гөникэн: «Ӈи эрэк, Хэвкив хэӈитты? Ӈи Хэвкидук аӈили унэт төнӈэкичу аталаннан?» 22Иисус, ноӈартан тарав мулгачимутан унуриди, ноӈартакитан барагрин, гөникэн:
– Яв ху мэргэндэлэвур мулгачис? 23Яв аидьмар гөми: «хин төнӈэкичис аталаптан», эв гөми-ку: «илли, гиркасли»? 24Тарбач хун хадасан, Бэй Хутэн Оча эйдулин төрлэ төнӈэкичу аталгарадай иткалкан бисивэн, – Ноӈан осэлчилчэду гөнин: – Хинтэки гөнэм, илли, тэдэми гали, нян дюткий хөрли.
25Нян таракамат осэчилчэ ноӈартан дюлдэлэтэн илрин, тэдэми гадин, дюткий хөррин, Хэвкив эскэникэн. 26Нян эйдучэндюр ӈэлэмэч хэӈулритэн; Хэвкив хэӈуникэндэ эскэритэн, төрэритэн: «Эрэв инэӈу эливум хомив некэм иттивун».
Левию (Матфею) гөӈин
27Тадук Иисус нёрин, нян тамам чакачимӈав, Левич гэрбэлэттив, иттин. Тала Левий мэн чакачидяклай анчиндулан тэгэчиддин. Иисус ноӈантакин гөнин:
– Минду бодасли.
28Нян Левий илрин, эйду эмэниди, Ноӈандун бодаснин.
29Эгдем тойнэчэку Левий Ноӈандун овканин; хоял тамам чакамчимӈал, хөнтэл-дэ нимэгнэчэл ноӈарнюнтан тала тэгэлэӈчиритэн. 30Итум хупкучимӈэл, фарисеил-дэ иръеттитэн#5:30 Иръеттэй – здесь: роптать., Ноӈан хупкуттыӈэлтэкин гөнитэн:
– Ядавур тамам чакамчиӈалнюн төнӈэкичилкэрнюн-дэ Ху дебэдис, коладис-та? 31Иисус-нян ноӈартакитан барагрин:
– Як абгарар бэгдэчимӈэв надар, бутэнрил-тэкэр надар. 32Як айгарарил төнӈэкичур минтэки тэлэӈдэтэн би эмрив, төнӈэкичу-ткэн овканчал минтэки тэлэӈдэтэн би эмрив.
Иисусу Христосу поста як бисивэн улгимир
33Ноӈартан-аси Ноӈантакин гөнитэн:
– Ями-нян Иоанн, фарисеил-дэ хупкуттыӈэлтэн хояракан улрэв, олрав-да эстэн дебботтэ, нэӈэддёттэ-дэ, Хинӈил-нян хупкуттыӈэлси дептэ, колра-да?
34Ноӈан нонартакитан барагрин:
– Он-ка олдадякту олдадды дялбан этэс улрэв, олрав-да дебукэн, олдадды ноӈарнюнтан биддэкэн, 35ок-ка хөнтэл инэӈэл одакатан, Олдадды ноӈардукутан хөруврэкэн, таракам ноӈартан улрэв, олрав-да этэр дептэ.
36Тадук ноӈартакитан тэлэӈу тэлэӈрин:
– Ӈи-дэ анӈамтадук ойдук утыӈу гирриди, ирбэту ою тарич эсни уттоттэ, тарбач анӈамтав-да ою гиркатчин, ирбэту-тэ ою тарич этэн айра. 37Ирэмэту-дэ минэв ирбэтлэ тэпкэлэ эстэн оӈкэвэттэ; тармадит ирэмэт минэ тэпкэлбу насарукандин, мэнкэн-дэ оӈкэлбэдин, тарбач тэпкэл-дэ хоибдир. 38Ирэмэту минэв анӈамтала тэпкэлдулэ оӈкэннэтэн, таракам минэ, тэпкэлдэ одябдир. 39Тарбач ӈи-ккэ ирбэту минэв колдин, ирэмэту этэн коламалра, унэт гөндин-дэ: «Ирбэт аидьмар!»
Currently Selected:
Лука 5: eve
Highlight
Share
Copy
Want to have your highlights saved across all your devices? Sign up or sign in
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X