Lolmav 3

Miqyail saljial ivq nail ganl

1Al heel ngel-i mail, yu nee maq tsil Yuldav nail tsaol-aq khul nail geeqlaoq ya jaiq nail-aiq. Bavkov uqjaq oev nail aol nl nail, khul nail ganl tsoiq nail-aiq. 2Yaoq phaq yaoq-ao nee nail lavqkhoel ganl tsoiq nail ngaol. Iqmoeq neq, Miqyail aivq nail daoq aqyu juq bhai bivq khi bhi hel daiq phail-a nail ngaol.

3Aqyu juq teevq pav ga nav juq saljial maq ivq khi ngaol-aoq, khul ge duq jiav nail-aiq. Aqyu juq saljial maq ivq nail ngel-i mail, Miqyail nail saljial ivq nail phaq bhai lav cov nia nail laiq. 4Mal dil maq lav cov nia-ail. Tsaol-aq iqsanl mail goiqbhaoq bhaoq khi ngaol-aoq, Miqyail neq, saljial ivq nail ngaol. Jal liq lavqkhoel bhai gevq-ai thaq nail khe-ai,

“Naoq-i mail ge-a nail

daoq bhaq da nee

naol tsaq nail

daol nail ngaol dai,

yu ge nail ngaol.

Yalkhaq dal nail

phaq bhai

ya daq-u phao,

naol gaq

lai nail ngaol” dai,

gevq-ai thaq nail ngaol.

5Thail hai ngaol-aoq, ngadao maq tsaq maq daol nail phaq nl-a nail bhaq da nee, Miqyail nail tsaq nail daol nail phaq bhi dov lal haq neq, ngadao khal hai ge heeq. Miqyail ngadao bhai khoeq lavq jiovq lavq haq neq, aivq maq tsaq maq daol nail phaq nl lavq-a nail ngaol dai, ngadao ge nail laiq. (Ngal niail hai ge nail neq, tsaol-aq yaq juq ge nail khe-ai taivq-ail, ge nail ngaol.) 6Al hai maq ngel-ail. Daoq al daoq tsaq haq neq, Miqyail miltsaq yaq bhai yalkhaq khal hai khi dal nia nail-aiq. 7Ngal saljial maq ivq nail ngel-i mail, Miqyail nail mal dil tsaq nail phaq bhai seiqleiq khaoqsail bhi dov jaiq lal haq neq, khul khi mail Miqyail ngaq bhai oeqbal yaq niil dai, yalkhaq dal lavq nail-aiq. 8“Aqmeeq phaq dov lal dai, maq meeq nail phaq nl la” dai, tsaol-aq teevq pav ga nav juq ge nail ngaol. Paolluv iqsanl al hai nl nail ngaol dai, aqyu juq teevq pav ga nav juq ge doil nail ngaol. Al hai ge nail juq, khoeq nail jiovq nail phaq bhai ya daq nail tsaq nail ngaol.

Tsaq nail daol nail tsaol-aq teevq gaq ail maq jaol ail

9Thail hai phal-iq neq, ngadao Yuldav nail tsaol-aq yu nee maq tsil meeq jaiq nail laiq. Maq ngel-ail. Khul khi mail dai ngal-aq neq, Yuldav nail tsaol-aq maqkhaiq, yu nail jeq-e jaq-a juq maqkhaiq, tsaol-aq iqsanl mail oeqbal nail bhaqaoq kov-uvq bhai jaol nail ngaol dai, ngal nul juq bhai teevq pov ge bhiq-ao nail ngaol. 10Jal liq lavqkhoel bhai niail hai gevq-ai thaq nail ngaol:

“Tsaq nail

daol nail tsaol-aq

maq jaol-ail.

Teevq gaq iqsanl

maq jaol-ail.

11Nee noeq nee kha

aol nail tsaol-aq

teevq gaq ail

maq jaol-ail.

Miqyail bhai hal pov nail

tsaol-aq iqsanl

teevq gaq ail maq jaol-ail.

12Tsaol-aq iqsanl mail,

Miqyail bhai

khaonq ha khi,

gail bheeq bheeq

ail-a nail ngaol.

Aqyu juq iqsanl mail

ganl maq tsoiq nail

tsaol-aq pevq

lal-a nail ngaol.

Aqmeeq phaq

nl nail tsaol-aq

maq jaol-ail.

Teevq gaq iqsanl

maq jaol-ail.

13Aqyu juq nail

khoeqma neq,

phao-ai thaq nail

luqdaol khe-ai,

dul nail ngaol.

Aqyu juq nail

moevqlal neq,

goiqbhaoq bhaoq

jaq nail ngaol.

Aqyu juq nail

moeqkov bhai neq,

mail ma-ail kav nail

eellel nail dovq

aol nail ngaol.

14Aqyu juq nail

moeqthaoq

lavqkhoel bhai

ivqkhail yavq nail daoq

khi mail,

yu bhai neema

nal lai dai,

ge nail daoq

teevq bhee

aol nail ngaol.

15Yu bhai

heivq nail haqbhoil

aqyu juq nail aqkhil

aqphai ngaol.

16Aqyu juq khal

ail nail phao,

yu bhai lav luq

lav seil khi,

lav haq lav aoq

bhiq nail ngaol.

17Aqyu juq

nee sal ovq nail gailkhaol

maq heeq nia-ail.

18Al ovqtavq,

aqyu juq nail

neema lavqkhoel nee

Miqyail bhai

maq ev ail” dai,

gevq-ai thaq nail ngaol.

19Aol daoq kovq daoq lavqkhoel bhai khal gevq-ai thaq nail daoq juq neq, aoldaoq kovqdaoq-i mail uv thaiq-ai thaq nail kov-uvq bhai jaol nail tsaol-aq bhai ge bhiq-a nail ngaol dai, ngadao heeq kivq nail ngaol. Al heel ngel-i mail tsaol-aq iqsanl mail ge kovq duq maq jiav-ail. Miltsaq yaq iqsanl mail Miqyail nail sivtavq bhai yalkhaq dal nail bhai ya daq nail ngaol. 20Aol daoq kovq daoq bhai gevq-ai thaq nail khe-ai nl-a nail ngel-i mail, tsaol-aq teevq gaq iqsanl Miqyail nail sivtavq bhai tsaq nail daol nail tsaol-aq maq pevq lal nia-ail. Khul khi mail dai ngal-aq neq, ngadao oeqbal aol nail ngaol dai, aoldaoq kovqdaoq bhi heeq kivq lal ail teevq-eel ngaol.

Neema thaq tsaol nail bhaq da nee tsaq nail daol nail tsaol-aq pevq lal-a nail ganl

21Thail hai ngaol-aoq, niil aq-il aoldaoq kovqdaoq bhai maq tavq ail, Miqyail nee mail dov lee-a nail tsaq nail daol nail phaq bhai ya moel-a nail ngaol. Ganl niil neq, aoldaoq kovqdaoq lavqkhoel khi mail Miqyail nail haqbhoil ge dan nail juq nail haoqgavq lavqkhoel bhai salkhil khanq-ai thaq nail ngaol. 22Yeiqsul Khali bhai neema khal thaq tsaol nail tsaol-aq iqsanl mail aqyu juq neema thaq tsaol nail ngel-i mail, Miqyail nail tsaq nail daol nail phaq bhai ya-a nail ngaol. Miqyail neq, tsaol-aq yaq bhai maq tsel pav-ail. 23Khul khi mail dai ngal-aq neq, tsaol-aq iqsanl mail oeqbal nl-a nail ngel-i mail, Miqyail nail seiqleiq khaoqsail bhai maq ya nia-ail. 24Thail hai ngaol-aoq, Miqyail nail geeqlaoq eel jaol bhaq da nee aqphoiq maq bivq ail, tsaq nail daol nail tsaol-aq pevq lal-a nail ngaol. Tsaq nail daol nail tsaol-aq pevq lal-a nail neq, Yeiqsul Khali-i mail ul kovq lavq-a nail ngel-i mail ngaol. 25Miqyail neq, Yeiqsul bhai laol bhiq nail phaq bhi pevq lal-a nail ngaol. Yeiqsul khanq sil-a nail bhaq da nee, aivq bhai neema khal thaq tsaol nail tsaol-aq nail oeqbal bhai Miqyail phaiq bhiq-a nail ngaol. Aivq al hai nl-a nail neq, “Ngal tsaq nail daol nail Miqyail ngaol” dai, dov lal-a nail ngaol. Miqyail ol nia nail bhaq da nee, jel lal-u phao tsaol-aq-i mail nl-a nail oeqbal bhai aivq yalkhaq maq dal-ail. 26Miqyail neq, tsaq nail daol nail ngaol. Al ovqtavq, aivq Yeiqsul bhai neema khal thaq tsaol nail tsaol-aq bhai tsaq nail daol nail tsaol-aq bhi pevq lal-a nail ngaol. Miqyail al hai nl-a nail neq, “Ngal tsaq nail daol nail ngaol” dai, yanq niil yanq nail lavqkhoel yu bhai phao daiq bhiq-a nail ngaol.

27Al heel ngel-i mail, ngadao khul bhai neema eeq duq jiav nail-aiq. Neema eeq duq maq jiav-ail. Khul khi mail dai ngal-aq, aoldaoq kovqdaoq nail haoqnao nl-a hal-a nail bhaq da nee tsaq nail daol nail phaq ya-a nail maq ngel-ail. Neema thaq tsaol nail bhaq da nee ya-a nail ngaol. 28Aol daoq kovq daoq bhai maq tavq dai, neema thaq tsaol nail bhaq da nee taivq-ail, tsaq nail daol nail tsaol-aq pevq lal nail ngaol dai, nv juq heeq kivq nail ngaol. 29Maq ngel haq neq, Miqyail neq, Yuldav nail tsaol-aq nail Miqyail teevq-eel laiq. Aivq neq, yu nail jeq-e jaq-a nail Miqyail iqsanl maq ngel ail laiq. Ngel naol. Yu nail jeq-e jaq-a nail Miqyail iqsanl ngel nail ngaol. 30Khul khi mail dai ngal-aq neq, Miqyail teevq gaq taivq-ail jaol nail ngaol. Bavkov uqjaq oev nail aol thaoq-ai thaq nail tsaol-aq neema thaq tsaol nail ngel-i mail, aqyu juq bhai tsaq nail daol nail tsaol-aq ngaol dai, Miqyail saol-nvq-ai thaq nail ngaol. Bavkov uqjaq oev nail aol maq thaoq nail tsaol-aq iqsanl, neema thaq tsaol nail ngel-i mail, aqyu juq bhai iqsanl, tsaq nail daol nail tsaol-aq ngaol dai, Miqyail saol-nvq-ai thaq nail ngaol. 31Ngadao neema thaq tsaol nail phaq bhai juq juq ail aoldaoq kovqdaoq bhai lav cov nail ngel ail laiq. Maq ngel ail dei-eiq, aoldaoq kovqdaoq bhai bhi ivq jaiq lal nail ngaol.

Currently Selected:

Lolmav 3: aeu

Highlight

Copy

Compare