Lolmav 13

Uv thaiq nail yovkav juq nail kov-uvq bhai jaol nail ganl

1Tsaol-aq yaoq gaq yaoq-ao nee mail uv thaiq nail yovkav juq nail kov-uvq bhai aqmeeq-ai jaol yaoq. Khul khi mail dai ngal-aq, Miqyail maq bivq haq neq, uv thaiq nail bhaqaoq maq jiav nia-ail. Aqyu juq nail bhaqaoq neq, Miqyail-i mail bhi jiav-a nail ngaol. 2Al heel ngel-i mail, uv thaiq nail yovkav bhai lav tsoiq nail tsaol-aq, Miqyail-i mail nl-ai thaq nail phaq bhai lav tsoiq nail tsaol-aq ngaol. Lav tsoiq nail tsaol-aq neq, yalkhaq dal nail bhai ya daq nail ngaol. 3Aqmeeq phaq nl nail tsaol-aq neq, uv thaiq nail yovkav juq bhai gee sil duq maq jiav-ail. Maq meeq nail phaq nl nail tsaol-aq neq, gee sil duq jiav nail ngaol. Uv thaiq nail yovkav juq bhai gee sil duq maq jiav nail tsaol-aq pevq movq ail laiq. Pevq movq haq neq, aqmeeq phaq nl yaoq. Nl haq neq, aqyu juq naoq bhai neema tsaq nail ngaol. 4Naol aqmeeq phaq ya nia dai, Miqyail aqyu juq bhai khul-ai thaq nail ngaol. Thail hai ngaol-aoq, naol haqeiv nail phaq nl haq neq, gee sil yaoq. Khul khi mail dai ngal-aq neq, aqyu juq thaoma aqnieivq ail haq-nvq thaq nail maq ngel-ail. Haq eiv nail phaq khal nl nail tsaol-aq bhai yalkhaq dal nail dai khi, Miqyail-i mail aqyu juq bhai khoel-ai thaq nail ngaol. 5Al heel ngel-i mail, uv thaiq nail yovkav juq nail kov-uvq bhai aqmeeq-ai jaol yaoq. Thail hai ngaol-aoq, yalkhaq dal nail phaq bhai gee sil nail ngel-i mail taivq-ail jaol nail phaq thaq bhi pevq. Yovqgavq bhai yovqgavq heeq kivq khi, nul juq nail neema iqsanl nee sal ovq dai, aqmeeq-ai jaol yaoq. 6Al bhaq da nee, nul juq khaon ya dov bhiq nail ngaol. Khul khi mail dai ngal-aq, aqyu juq yovqgavq nail ganl nl-a nail al neq, Miqyail nail haqbhoil nl-a nail phaq pevq nail ngaol. 7Al heel ngel-i mail, aqyu juq yaoq gaq yaoq-ao nee bhai teevq gaq nee teevq gaq bhai geel-nvq nail khe-ai, bivq heeq phaq-ail tsaq nail juq bhai bivq yaoq. Khaon tavq nail tsaol-aq juq bhai khaon tavq bhiq yaoq. Ev heeq phaq-ail tsaq nail tsaol-aq juq bhai ev bhiq yaoq. Thaq eeq thaq heel heeq phaq-ail tsaq nail tsaol-aq juq bhai, thaq eeq thaq heel bhiq yaoq.

Teevq gaq nee teevq gaq gaiq-a nail ganl

8Teevq gaq nee teevq gaq gaiq-a nail gailjiov maq ngel haq neq, naoq nail kovtavq bhai gailjiov teevq phaq ail thaq bhi bavq. Khul khi mail dai ngal-aq, aqjail bhai jaol nail tsaol-aq bhai gaiq-a nail juq neq, aoldaoq kovqdaoq bhai nl bhee-a nail tsaol-aq khe-ai, dul nail ngaol.

9“Yu nee thaq bheeq thaq leel. Tsaol-aq yaq bhai thaq lav heivq. Yu nail nlmaoq thaq khoiq. Yu nail nlmaoq bhai maiv jeel thaq jeel” dai, ge-ai thaq nail aoldaoq kovqdaoq bhai maqkhaiq, bivq-ai thaq nail daoq yaoq daoq yaoq juq iqsanl mail, “Naoq nail aqmaol bhai gaiq-a nail khe-ai, naoq nail aqjail bhai jaol nail tsaol-aq bhai gaiq-a yaoq” dai, ge-ai thaq nail daoq al daoq nail lavqkhoel bhai aol gil nail ngaol.

10Yu bhai gaiq-a nail neema aol haq neq, maq meeq nail phaq maq nl bhiq-ail. Al heel ngel-i mail, gaiq-a nail phaq neq, aoldaoq kovqdaoq bhai nl bhee-a nail ngaol.

11Al ovqtavq, yanq niil yanq neq, iq noeq noeq lal nail yanq nial dai, nul juq heeq nia nail ngaol. Khul khi mail dai ngal-aq neq, ngadao iqmoeq ilmoeq neema thaq tsaol lal-u nee maq tsil, niil aq-il ngadao bhai hevq kovq nail phaq aqjail jail lee-aoq nail ngaol. 12Nqkiv lima nail yanq jel-ail khi, nqbhaq bhaq lal nail yanq kev lal aiq naol. Al heel ngel-i mail, aqnav phaq bhai tavq nail nl nail hal nail phaq bhai khaonq ha khi, aqbhaq bhai tavq nail phaq bhai nl bhel. 13N gaol phao nl heeq phaq-ail tsaq nail phaq bhai nl bhel. Maq tsaq maq daol nail phaq bhai aqbhee lav sav khi jil pheeq daol bov nail phaq thaq nl. Yu nail khaqma bhai bheeq nail leel nail phaq khi mail khaqmiq sev nail phaq thaq nl. Yu nee mail iqdaiq iqtsai thaq dov. Yu bhai maivjeel thaq jeel. 14Aqgaq aqdoi doi nail khe-ai, Heeqphaq Yeiqsul Khali bhai doi yaoq. Aqsivq haqjoil nail nee noeq neelov haoqnao tsao the naol dai, teevq phaq ail thaq lainq.

Currently Selected:

Lolmav 13: aeu

Highlight

Copy

Compare