Phaodaiq 22

1A bhai nee ngal-aq, nqtavq gaqkhoel al gaq, aqdoevq bhi doevq nail laoljaol ngaq bhai cavq naq lavq-a nail ngaol. Miqyail khi Yaolyaq nail joiq jaq doiqbev nee il dov lee khi, sainl khe-ai dul nail haol taiv deel laoljaol pevq nail ngaol. 2Laoljaol al jaol neq, meenq nail gailkhaol gaoltsi nvq pav ail il khal leevq thaq nail ngaol. Laoljaol al jaol nail nvq phao bal-nvq, nvq phao bal-nvq ail, aqdoevq bhi doevq nail aqbhaol doevq nail ngaol. Aq heeq aqbhaol al bhaol neq, aqheeq tsel-nvq phaq heeq khi, bhala yaoq heeq yaoq-ao nee aqheeq heeq lee nail ngaol. Aivq nail aqpavq juq neq, jeq-e jaq-a iqsanl nail nalgoel bhai meeq lai nail haqbhoil ngaol. 3Niai nee pultavq neq, khul phaq maqkhaiq ivqkhail yavq nail bhai maq ya daq yaoq-aol. Meenq al meenq bhai Miqyail khi Yaolyaq nail joiq jaq doiqbev bev ma jiav khi, aivq nail yaqkav juq aivq bhai uqhuq thaoq nail ngaol. 4Aqyu juq aivq nail maivphaoq bhai ya moel khi, aqyu juq nail neeqthel bhai aivq nail aqmil gevq-ai thaq nail ngaol. 5Niai nee pultavq neq, nqkivq maq kivq ail yaoq-aol. Phalmanq nail aqbhaq maqkhaiq, nlma nail aqbhaq maqkhaiq, aqyu juq maq loq yaoq-aol. Khul khi mail dai ngal-aq neq, Heeqphaq Miqyail aqyu juq bhai aqbhaq bhaq bhiq nail ngaol. Aqyu juq neq, nqmaq maqluv halyeel ya uv thaiq nail ngaol. 6A bhai nee ngal-aq, nqtavq gaqkhoel al gaq teevq pov gaoq ge nail: “Daoq niil juq neq, mal dil tsaq khi saljial ivq nail daoq ngaol. Miqyail nail haqbhoil ge dan nail juq bhai Aqhaqlal Miqyail bivq-a nail Heeqphaq Miqyail neq, mao ail maq maoq lal mail pevq lal nail juq aivq nail yaqkav juq bhai phao daiq bhiq nail dai khi, aivq nail nqtavq gaqkhoel bhai khoel-ai leevq-a nail ngaol” dai, ge bhiq-a nail ngaol.

Yeiqsul lavqtsail mail yavq kha lee nail ganl

7“Ngal lavqtsail mail yavq kha lee naol dei-eiq. Haoq gavq niil nail lavqkhoel bhai gevq-ai thaq nail Miqyail nail daoq bhai nal daiq nail tsaol-aq, geeqlaoq eeq nail ngaol” dai, Yeiqsul ngaq bhai ge lavq-a nail ngaol.

8Ngal neq, Yaol haq ngaol. Ngal ganl niil juq iqsanl bhai ya gaiq ya moel-a nail ngaol. Ganl niil juq bhai ya gaiq ya moel gaq-u phao, ngaq bhai cavq naq lavq-a nail nqtavq gaqkhoel al gaq bhai uqhuq thaoq nail dai khi, aivq nail aqkhil daoqthaoq bhai peevqceevq kovdoiq doiq-a nail ngaol. 9Thail hai ngaol-aoq, aivq ge nail: “Thail hai thaq khi. Ngal iqsanl, naoq-ai kheel Miqyail nail yaqkav ngaol. Naoq nail aqivq jaqbheq pevq nail, Miqyail nail haqbhoil ge dan nail juq nee maqkhaiq, haoqgavq niil keiv nail lavqkhoel bhai gevq-ai thaq nail daoq juq bhai nal daiq nail tsaol-aq juq iqsanl nee maqkhaiq, ngal iqsanl aqyu juq kheel yaqkav ngaol. Miqyail bhai taivq-ail uqhuq thaoq yaoq” dai, ngaq bhai ge lavq-a nail ngaol.

10A bhai nee ngal-aq, aivq ngaq bhai gaoq ge lavq-a nail: “Haoq gavq nail lavqkhoel bhai gevq-ai thaq nail Miqyail nail daoq bhai junq thaq deeq. Khul khi mail dai ngal-aq neq, aqyanq kev lee aiq nail ngaol. 11Haq eiv nail phaq nl nail tsaol-aq haqeiv nail phaq nl dal laivq khi, aq jiivq aq cavq phaq nl nail tsaol-aq iqsanl aq jiivq aq cavq phaq nl dal laivq naol. Tsaq nail daol nail phaq nl nail tsaol-aq tsaq nail daol nail phaq nl dal laivq khi, meeq nail haol nail tsaol-aq juq iqmoeq phao aqmeeq aqhaol haol dai doevq dal laivq nail ngaol” dai, ge lavq-a nail ngaol.

12Yeiqsul ge nail: “Ngal lavqtsail mail yavq kha lee naol dei-eiq. Tsaol-aq yaoq gaq yaoq-ao nee bhai, yovqgavq-i mail khal nl khal hal-a nail khe-ai geel-nvq dai bivq nail dai khi, ngal kovpavq oil leevq naol. 13Ngal neq, Aqlaqphal khi Aol meiq gal ngaol. Iqmoeq ilmoeq khe khi haoqnao nao saq khe gaq iqsanl ngel naol. Iqmoeq ilmoeq iqsanl, haoqnao nao saq khe iqsanl pevq nail ngaol.

14Yovqgavq nail aqgaq aqdoi bhai tsiq haol-a nail tsaol-aq, geeqlaoq eeq nail ngaol. Aqyu juq neq, aqdoevq bhi doevq nail aqbhaol al nail aqheeq ya jaq dai maqkhaiq, meenq nail lolgov lavqkhoel nee aol lal nail aqkhaoq-anq ya-a nail ngaol. 15Thail hai ngaol-aoq, meenq nail lavqniil phao neq, kheeq khe-ai dul nail tsaol-aq, neivq bhai laol nail sail nail tsaol-aq, khaqmiq sev nail tsaol-aq, tsaol-aq bhai lav heivq-a nail tsaol-aq, thaoq phaoq aqma maolkhoel bhai uqhuq thaoq-a nail tsaol-aq khi, goiqbhaoq bhaoq nail tsaol-aq juq jaol nail ngaol.

16Ngal neq, Yeiqsul ngaol. Khali yaq munl juq bhai, ganl niil salkhil bhi khanq bhiq nail dai khi, ngal ngaq nail nqtavq gaqkhoel bhai khoel-ai leevq-a nail ngaol. Ngal neq, Daq bhil nail jeq-e jaq-a ngaol. Nqhao khe aqbhaq bhaq dee dee nail aqgil iqsanl ngel naol” dai, ge lavq-a nail ngaol.

17Aqhaqlal Miqyail khi, maol ail nail dai, lainq-ai thaq nail yaqmai-aq al gaq, “Lal yaoq” dai, khul nail ngaol. Khal ya gaiq-a nail tsaol-aq juq iqsanl mail “Lal yaoq” dai, khul nail ngaol. Ulcuvq khal moevq nail tsaol-aq lal yaoq. Khal daol movq nail tsaol-aq juq aqdoevq bhi doevq nail ulcuvq aqnieivq ail daol lal yaoq.

18Haoq gavq niil keiv nail lavqkhoel Miqyail nail haqbhoil ge dan-ai thaq nail daoq niil juq bhai ya gaiq-a nail yaoq gaq yaoq-ao nee bhai, ngal daoq niail hai bivq nail ngaol. Tsaol-aq teevq gaq ga nav haoqgavq niil nail lavqkhoel khe gevq-ai thaq nail juq bhai gaoq gevq laoq haq neq, haoqgavq niil nail lavqkhoel bhai gevq-ai thaq nail khoeq nail jiovq nail niil juq Miqyail aivq bhai bhi daq nail ngaol. 19Tsaol-aq teevq gaq ga nav haoqgavq niil keiv nail lavqkhoel Miqyail nail haqbhoil ge dan-ai thaq nail daoq niil juq bhai oil ha haq neq, haoqgavq niil nail lavqkhoel bhai gevq-ai thaq nail aqdoevq bhi doevq nail aqbhaol nail aqheeq khi meeq nail haol nail meenq lavqkhoel khe-aivq ya heeq phaq-ail tsaq nail juq bhai, Miqyail oil ha nail ngaol.

20“Ngal mal dil lavqtsail mail yavq kha lee naol” dai, ganl niil salkhil khanq nail gaq ge nail ngaol. Ngel naol. Heeqphaq Yeiqsul-ol, yavq kha lee yaoq.

21Heeqphaq Yeiqsul nail geeqlaoq eel jaol nul juq iqsanl nail kovtavq bhai bhi jiav dei-eiq.

Currently Selected:

Phaodaiq 22: aeu

Highlight

Copy

Compare