Phaodaiq 11

Salkhil khanq nail nvq gaq nail ganl

1A bhai nee ngal-aq, tsa daiq nail phaq khe-ai dul nail lunl aqkhaoq teevq khaoq ngaq bhai bivq lavq khi ge lavq-a nail: “Thul yaoq. Miqyail nail uqhuq thaoq nail ilkhaol il ma bhai maqkhaiq, laolduq bhai maqkhaiq, tsa daiq khi, uqhuq thaoq nail ilkhaol il ma nail lavqkhoel bhai uqhuq thaoq lal-a nail juq bhai, ge daiq yaoq. 2Thail hai ngaol-aoq, uqhuq thaoq nail ilkhaol il ma nail khainl lavqkhoel jaoq jaoq dai jiav nail jaol duq#11.2 Jaol duq dai ge nail neq, yu nail jeq-e jaq-a nail uqhuq thaoq nail jaol duq. bhai neq, bhi jiav yaoq. Thaq tsa daiq. Khul khi mail dai ngal-aq neq, jaol duq al neq, yu nail jeq-e jaq-a nail aqlavq lavqkhoel bhai av bhiq-a nail ngaol. Aqyu juq meeq nail haol nail meenq bhai bhala liq tsel-nvq heeq bhee dai, ya naoq thaiq nail ngaol. 3Ngaq nail salkhil khanq nail tsaol-aq nvq gaq bhai ngal bhaqaoq bivq khi bhi lee naol. Aqyu nvq gaq daq iq doi-nq thaq khi, teevq hinl nvq yal kovq tsel n bhee dai, Miqyail nail daoq cavq bhiq nail ngaol” dai, ge lavq-a nail ngaol. 4Aqyu nvq gaq neq, miltsaq bhai uv thaiq nail iqsanl nail Heeqphaq pevq nail gaq nail sivtavq bhai doevq nail saq loq aqbhaol nvq bhaol pevq nail nee ovqtavq, phalmanq nvq heeq iqsanl pevq nail ngaol. 5Tsaol-aq teevq gaq ga nav, aqyu nvq gaq bhai khoeq bhiq jiovq bhiq nail khi-u phao, aqyu nvq gaq nail moeqthaoq nee mail miqjaq dov lal khi, aqyu nvq gaq bhai neejiav jiav nail juq bhai poiv ha nail ngaol. Tsaol-aq teevq gaq ga nav aqyu nvq gaq bhai khoeq bhiq jiovq bhiq nail dai, lai jai haq neq, al hai ya sil nail ngaol. 6Aqyu nvq gaq Miqyail nail daoq cavq bhiq thail thaiq-u phao, maoq-aol maq bhi aol lee dai, nqtavq bha lav tsoiq nia nail bhaqaoq, aqyu nvq gaq aol nail ngaol. Ulcuvq bhai aqsivq bhi pevq lal nia nail bhaqaoq iqsanl, aol nail ngaol. Aqyu nvq gaq kha dai pov nl movq khi ngaol-aoq, khoeq nail jiovq nail yaoq phaq yaoq-ao nee, miltsaq bhai kev lee dai, nl nia nail bhaqaoq aol nail ngaol.

7Aqyu nvq gaq salkhil khanq gaq haq neq, mao ail navq nail khaq duq nee dov lal-a nail haqeiv nail jaiqyaq al maol, aqyu nvq gaq bhai genl dev nail ngaol. Aivq aqyu nvq gaq bhai genl dev nail gaq lai khi heivq nail ngaol. 8Aqyu nvq gaq nail aqmaol bhai, meenq meenq ma nail gailkhaol bhai he ha-ai thaq nail ngaol. Meenq al meenq neq, aqyu nvq gaq nail Heeqphaq lavqyavq kovtavq bhai tavq heivq-a nail meenq ngaol. Aqhaqlal phao nee tsiqceiv daiq haq neq, Saoldoq meenq khi mail Iljiltuv milkhaoq ngaol. 9Aq-u phao, khul phaq nail jeq-e lavqkhoel bhai aol nail tsaol-aq juq bhai maqkhaiq, jeq-e jaq-a iqsanl nail lavqkhoel bhai aol nail tsaol-aq juq maqkhaiq, daoq khul phaq ge nail tsaol-aq maqkhaiq, milkhaoq juq nail lavqkhoel bhai jaol nail tsaol-aq maqkhaiq, tsaol-aq niil juq neq, hail n ovqtavq, teevq pav aqyu nvq gaq nail aqmaol bhai hel daiq lal-a nail ngaol. Aqyu nvq gaq bhai maq bhi duqpheeq dai, lav tsoiq-a nail ngaol. 10Aqyu nvq gaq sil-a nail ngel-i mail, miltsaq bhai khal jaol nail tsaol-aq juq lavqkhiq tsail dee dee khi aqbhee lav sav-a nail ngaol. Aqyu juq teevq gaq nee teevq gaq, kovpavq bivq nail ngaol. Khul khi mail dai ngal-aq neq, Miqyail nail haqbhoil ge dan nail al nvq gaq neq, miltsaq bhai jaol nail tsaol-aq yaq juq bhai haq dee aoq dee dee nail phaq bhi kev lee-a nail ngaol.

11Thail hai ngaol-aoq, hail n ovqtavq teevq pav bhee lal-u phao, Miqyail nee mail dov lee-a nail bhi doevq lal nia nail aqhaq aqyu nvq gaq nail lavqkhoel bhai aol lee khi, aqyu nvq gaq thul lal-a nail ngaol. A bhai ya moel-a nail juq gee sil dee dee lal bhiq-a nail ngaol. 12Aq-u phao, nqtavq nee mail aqthel meel dov-ai leevq khi, “Niilniai dav lal yaoq” dai, aqyu nvq gaq bhai khul nail bhai, aqyu nvq gaq ya gaiq-a nail ngaol. Aqyu nvq gaq, aqyu nvq gaq bhai neejiav jiav nail tsaol-aq nail sivtavq nee nqdil bhai jeeq khi nqtavq kovtavq bha dav lai-a nail bhai iqsanl aqyu juq ya moel-a nail ngaol.

13Yanq al yanq nail lavqkhoel mil luv luv dee dee lal-a nail bhaq da nee meenq al meenq tsel bhoil nee teevq bhoil cov ail khi, tsaol-aq sivq hinl gaq sil-a nail ngaol. Jail ail ceevq-a nail tsaol-aq, gee sil dee dee lal bhiq khi, nqtavq kovtavq khe jaol nail Miqyail bhai tsiq eeq tsiq heel-a nail ngaol.

14Geeq laoq aqdoil nvq phaq teevq phaq gil-aoq nail ngaol. Hel daiq dei-eiq. Geeq laoq aqdoil hail phaq teevq phaq lavqtsail mail kev lee nail ngaol.

Nqbho sivq laiq teevq laiq jiiv nail ganl

15A bhai nee ngal-aq, nqtavq gaqkhoel sivq gaq teevq gaq nqbho jiiv-u phao, nqtavq nee mail kav dee dee nail aqthel niail hai meel dol leevq-a nail ngaol:

“Miltsaq bhai

uv thaiq nail bhaqaoq neq,

ngadao nail Heeqphaq Miqyail

khi mail aivq nail Khali nail

pevq lal-a nail ngaol.

Aivq neq, nqmaq maq luv

hal yeel uv thaiq nail ngaol” dai,

meel dol leevq-a nail ngaol.

16Aq-u phao, Miqyail nail sivtavq-ai yovqgavq nail doiqbev bev ma bhai yovqgavq jaol deel-nvq thaq nail joiqmaoq mavmaoq nvq tsel liq gaq peevqceevq kovdoiq doiq nail lavqkhoel nee gaol beiv khi, Miqyail bhai uqhuq thaoq thaoq ail ge nail:

17“Aq-u iqsanl,

niil aq-il iqsanl doevq khi,

iqsanl nail kovtavq bhai

uv thaiq nail bhaqaoq eeq nail

Heeqphaq Miqyail-ol,

eeq dee dee nail

naoq nail bhaqaoq oil khi

niil aq-il uv thaiq lee-aoq nail

ngel-i mail,

naoq bhai tsiq eeq naol.

18Milkhaoq yaq juq

neema phail lal khi,

naol iqsanl neema phail

dee dee lal-a nail ngaol.

Sil-a nail tsaol-aq bhai

yalkhaq dal nail aqyanq

kev lee-aoq nail ngaol.

Naoq nail haqbhoil

ge dan nail yaqkav

juq bhai maqkhaiq,

naoq nail tsaol-aq

juq bhai maqkhaiq,

naoq nail aqmil bhai ev nail

eeq yaq nil yaq

iqsanl bhai maqkhaiq,

geeqlaoq bivq nail aqyanq

kev lee-aoq nail ngaol.

Miltsaq bhai

lav cov-a nail juq bhai

lav cov nail aqyanq iqsanl

kev lee-aoq nail ngaol” dai,

ge nail ngaol.

19A bhai nee ngal-aq, nqtavq bha jiav nail Miqyail nail uqhuq thaoq nail ilkhaol il ma phao lal khi, al nail lavqkhoel Miqyail nail daoqma saljial nail thunq ya moel-a nail ngaol. Aq-u phao, nqmeivq meivq nail phaq khi, nqjaiq jaiq nail aqthel gaiq lee-a nail nee ovqtavq, mil luv luv dee dee khi, ollov aqheeq ga dee dee nail niil juq pevq lal-a nail ngaol.

Currently Selected:

Phaodaiq 11: aeu

Highlight

Copy

Compare