Maqthaiq 7
7
Yu nail kovtavq bhai oeqbal thaq thaq
1Yeiqsul gaoq ge nail: “Nul juq yu nail kovtavq bhai oeqbal thaq thaq. Maq thaq haq neq, nul juq iqsanl, oeqbal thaq nail bhai maq ya daq-ail. 2Khul khi mail dai ngal-aq neq, nul juq yu nail kovtavq bhai oeqbal thaq nail khe-ai, nul juq iqsanl oeqbal thaq nail bhai ya daq nail ngaol. Nul juq yu bhai phaiq bhiq hav bhiq-a nail khe-ai, nul juq bhai iqsanl phaiq kovq hav kovq lavq nail ngaol.
3Nul juq nail maivneev lavqkhoel bhai aol nail thaiq bhai maq saol-nvq mail, khul khi mail nul juq nail aqivq jaqbheq nail maivneev lavqkhoel bhai aol nail maiv peivq bhai hel daiq nail-aiq. 4Yovqgavq nail maivneev lavqkhoel bhai thaiq aol khi ngaol-aoq, ‘Naoq nail maivneev lavqkhoel khe aol nail maiv peivq koev dov lavq bhel’ dai, khul khi mail naoq nail aqivq jaqbheq bhai ge bhiq nail-aiq. 5Goiq bhaoq bhaoq nail tsaol-aq juq-ol, naoq nail maivneev lavqkhoel khe aol nail thaiq bhai iqmoeq bavq dov yaoq. Al hai bavq dov gaq haq neq, naoq nail aqivq jaqbheq nail maivneev lavqkhoel khe aol nail maiv peivq bhai khal hai ya koev dov bhiq nail-aiq dai, naoq bhai aqmeeq-ai moel lal nail ngaol.
6Meeq nail haol nail phaq kheeq bhai thaq bivq. Bivq haq neq, kheeq naoq bhai keivq lal nail ngaol. Laoq pav laol pav nail sainl wavq nail sivtavq bhai thaq liv ha-ai thaq. Liv ha-ai thaq haq neq, wavq sainl al bhai, naoq thaiq nail ngaol” dai, ge bhiq-a nail ngaol.
Hal yaoq, hal pov yaoq, lolgov bhai kov yaoq
7Yeiqsul gaoq ge nail: “Hal yaoq. Hal haq neq, ya nail ngaol. Hal pov yaoq. Hal pov haq neq, moel nail ngaol. Lol gov bhai kov yaoq. Kov haq neq, phao lavq nail ngaol. 8Khul khi mail dai ngal-aq neq, hal nail tsaol-aq yaoq gaq yaoq-ao nee ya nail ngaol. Hal pov nail tsaol-aq iqsanl moel nail ngaol. Lol gov bhai kov nail tsaol-aq nail haqbhoil iqsanl, lolgov phao lavq nail ngaol.
9Nul juq nail lavqkhoel tsaol-aq khul gaq maqkhaiq, yovqgavq nail yaq khaqmul hal nail bhai, lovmav gov bhiq nail tsaol-aq jaol naol laiq. 10Del gil hal nail bhai, eellel nieivq bhiq nail tsaol-aq jaol naol laiq. 11Nul juq haqeiv nail tsaol-aq pevq khi ngaol-aoq, yovqgavq nail yaq bhai yalkav aqmeeq phaq bivq nail ngaol. A dai nee maq tsil, nqtavq kovtavq bhai jaol nail nul juq nail Aqbhu pevq nail Miqyail bhai khal hal nail tsaol-aq bhai aivq aqmeeq phaq bivq lavq nail ngaol.
12Yu nul juq bhai bhi nl lavq movq nail khe-ai, nul juq iqsanl yu bhai al hai nl bhiq yaoq. Khul khi mail dai ngal-aq, al hai nl haq neq, aoldaoq kovqdaoq khi Miqyail nail haqbhoil ge dan nail juq nail haoqgavq lavqkhoel bhai gevq-ai thaq nail khe-ai nl bhee lal nail ngaol” dai, ge bhiq-a nail ngaol.
Gov khoiq khoiq yaq
13Yeiqsul gaoq ge nail: “Gov khoiq khoiq yaq bhai aol lai yaoq. Luq ail seil ail nail gailkhaol nail govkhoiq neq, eeq dee dee khi, gailkhaol iqsanl sal laiv dai daol nail ngel-i mail, a bhai aol lai nail tsaol-aq iqsanl mao nail ngaol. 14Thail hai ngaol-aoq, aqdoevq bhi doevq nail bhai aol lai nail gailkhaol khi govkhoiq neq, al thaiq thaiq dee dee nail ngaol. Al heel ngel-i mail, hal pov moel khi aol lai nail tsaol-aq neq, micil teevq-eel ngaol” dai, ge bhiq-a nail ngaol.
Aq heeq bhai hel daiq haq neq, aqbhaol bhai heeq nia nail ganl
15Yeiqsul gaoq ge nail: “Miqyail nail haqbhoil ge dan naol dai ge khi ngaol-aoq, mal dil maq ngel nail juq bhai yaol phaol yaoq. Aqyu juq neq, lavqkhoel phao mao ail haqeiv nail oel nel pevq khi ngaol-aoq, lavqniil phao neq, yaol yaq nail bavkov doi khi nul juq jaol nail bha lal nail ngaol. 16Aqyu juq-i mail nl nail hal nail bhai hel daiq haq neq, aqyu juq nail neema bhai heeq lal nail ngaol. Aq goe jiavbuv bhai, aqheeq tsilju nail aqheeq ya koevq daiq-a naol laiq. Aq goe aqbhaol bhai heeq guq aqheeq ya koevq daiq-a naol laiq. 17Aq bhaol aqmeeq ngel haq neq, aqheeq aqmeeq heeq lee nail ngaol. Aq bhaol maq meeq haq neq, maq meeq nail aqheeq heeq lee nail ngaol. 18Aq bhaol aqmeeq ngel haq neq, maq meeq nail aqheeq maq heeq lee nia-ail. Al hai dul dai, aqbhaol maq meeq haq neq, aqheeq aqmeeq maq heeq lee nia-ail. 19Aq heeq aqmeeq maq heeq lee nail aqbhaol yaoq bhaol yaoq-ao nee thul ha khi, miqjaq lavqkhoel bhai bavq poiv nail ngaol. 20Al hai dul dai, Miqyail nail haqbhoil ge dan nail goiqbhaoq bhaoq nail juq bhai aqyu juq nl dol hal dol lavq nail bhai hel daiq haq neq, aqyu juq nail neema bhai heeq lal nail ngaol” dai, ge bhiq-a nail ngaol.
Goiq bhaoq bhaoq nail juq bhai yalkhaq dal nail ganl
21Yeiqsul gaoq ge nail: “Ngaq bhai, ‘Heeqphaq-ol, Heeqphaq-ol’ dai, khal khul nail tsaol-aq yaoq gaq yaoq-ao nee mail Nqtavq Milkhaoq bhai ya aol lai nail maq ngel-ail. Nqtavq kovtavq bhai jaol nail ngaq nail Aqbhu neema tsaq dai, khal nl nail tsaol-aq juq taivq-ail ya aol lai nail ngaol. 22Yalkhaq dal nail aqn kev lal-u phao, ‘Heeqphaq-ol, Heeqphaq-ol, nv juq naoq nail aqmil bhai juq juq ail khi, naol nail haqbhoil ge dan nail maq ngel ail laiq. Naoq nail aqmil bhai juq juq ail neivq bhai iqsanl the dov khi, bhaqaoq eeq dee dee nail mee nia phaq nl-a nail maq ngel ail laiq’ dai, tsaol-aq mao dai gaq ngaq bhai ge lal nail ngaol. 23Thail hai ngaol-aoq, aqyu juq al hai ge lal-u phao, ‘Ngal nul juq bhai teevq peivq ail maq heeq kivq. Haq eiv nail phaq nl nail tsaol-aq juq-ol, ngaq-ai nee pav ail yaoq’ dai, ngal aqyu juq bhai daol coev dai, ge bhiq-a nail ngaol.”
Il khaol cov nail nvq phaq nail ganl
24Yeiqsul gaoq ge nail: “Ngal cavq nail cov nail daoq gaiq-u phao, nal daiq khi tsao the nail tsaol-aq yaoq gaq yaoq-ao nee mail, khaq duq aqnavq navq dai duq khi, lovmav kovtavq bhai ilkhaol cov nail, neenoeq neekha aol nail tsaol-aq khe-ai dul nail ngaol. 25Maoq-aol aol lee khi ulcuvq eeq lee-a nail ngaol. Al ovqtavq, lilmoel lil ma bhoe lal khi, ilkhaol al il bhai tsiq thaoq tsiq tuv lal khi ngaol-aoq, ivq dao dai cov-ai thaq nail ngel-i mail, ilkhaol al il maq tsuq ail nia-ail.
26Ngal cavq nail cov nail daoq gaiq-u phao, maq nal daiq maq tsao the nail tsaol-aq neq, tsalhail kovtavq bhai ilkhaol cov nail neenoeq neekha maq aol nail tsaol-aq khe-ai dul nail ngaol. 27Maoq-aol aol lee khi, ulcuvq eeq lee-a nail ngaol. Al ovqtavq, lilmoel lil ma bhoe lal khi, ilkhaol al il bhai tsiq thaoq tsiq tuv lal-u phao, ilkhaol al il tsuq ail nail ngaol. Tsuq ail nail al neq, tsuq peiv tsuq leiv gil ail nail ngaol” dai, Yeiqsul cavq bhiq cov bhiq-a nail ngaol.
Bhaq aoq eeq nail lavqkhoel nee cav bhiq cov bhiq-a nail ganl
28Yeiqsul al hai cavq bhiq cov bhiq gaq-u phao, aivq cavq nail cov nail daoq bhai ya gaiq-a nail tsaol-aq juq noeq-u maq dov dai, pevq dee dee ail-a nail ngaol. 29Khul khi mail dai ngal-aq, Yeiqsul neq, aqyu juq nail aoldaoq kovqdaoq cavq nail cov nail juq khe-ai cavq bhiq cov bhiq-a nail maq ngel-ail. Bhaq aoq aol nail lavqkhoel nee cavq bhiq cov bhiq-a nail ngaol.
Currently Selected:
Maqthaiq 7: aeu
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.