Heiqbhail 3

Maolseiq nee maq tsil Yeiqsul eeq jaiq nail ganl

1Al heel ngel-i mail, Miqyail-i mail khul-ai thaq nail munl nail lavqkhoel bhai jaol nail, aivq nail tsaol-aq pevq nail aqivq jaqbheq juq-ol, Yeiqsul bhai saol-nvq daiq yaoq. Aivq neq, ngadao neema thaq tsaol nail aol phao khe gaqkhoel khi mail Philma ngaol. 2Maolseiq Miqyail nail ilkhaol lavqkhoel khe ganl bhai saljial ivq nail khe-ai, Yeiqsul iqsanl aivq bhai tsel dov-a nail gaq nail sivtavq bhai saljial ivq nail ngaol. 3Il khaol cov nail gaq, ilkhaol nee maq tsil seiqleiq khaoqsail eeq nail khe-ai, Maolseiq nee maq tsil Yeiqsul neq, seiqleiq khaoqsail ya geel-nvq nail ngaol. 4Khul khi mail dai ngal-aq neq, ilkhaol yaoq il yaoq-ao nee cov-a nail aqheel jaol nail ngaol. Al hai dul dai, yaoq phaq yaoq-ao nee bhai teivq-a nail gaq neq, Miqyail ngaol. 5Maolseiq neq, Miqyail nail ilkhaol lavqkhoel saljial ivq nail yaqkav ngaol. Yaq hao Miqyail-i mail cavq lee nail ganl salkhil khanq nail neq, aivq nail ganl ngaol. 6Khali neq, Miqyail nail ilkhaol bhai hel daiq phail nail lavqkhoel saljial ivq nail Yaqyov ngaol. Ngadao juq iqsanl, gee sil nail neema maq aol nail bhai maqkhaiq, ivq dao dai, noeq thunq nail phaq bhai maqkhaiq, haoqnao nao saq-u kev dai, nieivq thaiq-ai thaq haq neq, ilkhaol al il pevq nail ngaol.

Miqyail nail yaq juq nail haqbhoil gaq naq naq duq jiav nail ganl

7Al heel ngel-i mail, Meeq nail Haol nail Aqhaqlal-i mail ge-ai thaq nail:

“Yaq n n-gaol nul juq

aivq nail daoq

ya gaiq haq neq,

8haqtsoiq haqyal bhai

jaol-u phao,

aivq bhai laonq daiq khi

neema lav phail-a nail

aqn khe-ai,

nul juq neema thaq gaol.

9A bhai, nul juq nail

aqphiq aqbhal juq

ngaq bhai laonq daiq khi,

liq tsel kovq bhee dai,

ngaq-i mail nl-a

hal-a nail juq bhai

ya moel-aoq nail ngaol.

10Al heel ngel-i mail,

ngal al yeel nail tsaol-aq bhai

neema phail lal khi

ge bhiq-a nail:

‘Aqyu juq

neema lavqkhoel bhai

khaq mao iqsanl laiq ail khi,

ngaq nail gailkhaol bhai

aqyu juq

maq heeq nia-ail’ dai,

ngal ge nail ngaol.

11‘Aqyu juq

ngaq nail gaq naq naq duq bhai

teevq thal-iq

maq ya aol lal ail’ dai,

neema phail nail

lavqkhoel nee,

ngal khanq-ai

thaq nail ngaol” dai,

ge-ai thaq nail ngaol.

12Aqivq jaqbheq juq-ol, nul juq nail neema lavqkhoel bhai haqeiv nail phaq khi neema maq thaq tsaol nail neema maq ya aol dai, yaol phaol yaoq. Al heel nail neema aol haq neq, nul juq khi aqdoevq doevq nail Miqyail nail gaiqlaq bhai pav ail nia nail ngaol. 13Oeqbal jalmul mul nail bhaq da nee, nul juq nail lavqkhoel khe teevq gaq iqsanl neema maq ya gaol lal dai, yaq n n-gaol dai ge kivq nail aqyanq niil nail lavqkhoel, yaoq n yaoq n nee nul juq teevq gaq nee teevq gaq, gaq bivq yaoq. 14Iqmoeq-u nee ngadao neema ivq nail khe-ai, haoqnao nao saq-u kev dai, neema ivq haq neq, Khali nee tavq nail tsaol-aq ngaol. 15Jal liq lavqkhoel bhai niail hai gevq-ai thaq nail ngaol:

“Yaq n n-gaol nul juq

Miqyail nail daoq

ya gaiq haq neq,

aivq bhai neema lav

phail-a nail aqn al n khe-ai,

nul juq neema thaq gaol” dai,

ge-ai thaq nail ngaol.

16Ya gaiq khi ngaol-aoq, aivq bhai neema lav phail-a nail tsaol-aq khaq sil gaq. Iljiltuv milkhaoq lavqkhoel khe Maolseiq-i mail hevq dol leevq-a nail tsaol-aq al juq, maq ngel ail laiq. 17Liq tsel kovq bhee dai, Miqyail khaq sil gaq bhai neema phail-a nail-aiq. Oeqbal nl khi haqtsoiq haqyal bhai sil-a nail tsaol-aq bhai, maq ngel ail laiq. 18“Nul juq ngaq nail naq duq bhai maq ya aol lal ail” dai, aivq khal sil gaq bhai khanq-ai thaq nail-aiq. Aivq nail daoq maq nal daiq nail tsaol-aq bhai khanq-ai thaq nail, maq ngel ail laiq. 19Aqyu juq Miqyail bhai neema maq thaq tsaol nail ngel-i mail, maq ya aol lai-a nail ngaol dai, ngadao noeq heeq noeq moel kivq nail ngaol.

Currently Selected:

Heiqbhail 3: aeu

Highlight

Copy

Compare