Heiqbhail 11

Neema thaq tsaol nail phaq nail ganl

1Neema thaq tsaol nail neema aol nail bhaq da nee noeq thunq-ai thaq nail juq bhai mal dil ya nail ngaol dai, aqduq aqtsil bhao nail ngaol. Ngadao-i mail maq ya moel-a nail juq iqsanl, mal dil jaol naol jiav naol dai, aqduq aqtsil bhao nail ngaol. 2Milnee uqnee khe jaol-a nail tsaol-aq juq neema thaq tsaol nail neema aol nail bhaq da nee, Miqyail aqyu juq bhai neekhaol sil nail ngaol.

3Miqyail-i mail daoq bivq-a nail bhaq da nee, bhoiq bhoiq luv luv iqsanl jaol lal jiav lal-a nail ngaol dai, ngadao neema thaq tsaol nail ngel-i mail, heeq kivq nail ngaol. Al heel ngel-i mail, ngadao -i mail ya moel thail thaiq nail juq neq, maq moel kivq nail juq nail lavqkhoel nee dov lal-a nail ngaol. 4Aqbheiqlal neema thaq tsaol khi Miqyail bhai laol bhiq-a nail ngel-i mail, aivq-i mail laol bhiq-a nail phaq neq, Gaqilnav-i mail laol bhiq-a nail phaq nee maq tsil, meeq jaiq nail ngaol. Aqbheiqlal-i mail laol bhiq-a nail al bhai Miqyail hav bhoel-a nail bhaq da nee, aivq neq, tsaq nail daol nail tsaol-aq ngaol dai, Miqyail aivq nail ganl salkhil khanq-ai thaq nail ngaol. Al heel ngel-i mail, Aqbheiqlal sil khi ngaol-aoq, aivq nail neema thaq tsaol nail ganl al, Jal liq lavqkhoel bhai daoq ge thail thaiq nail ngaol.

5Iilnaov neema thaq tsaol nail bhaq da nee, Miqyail aivq bhai maq bhi sil dai, nqtavq kovtavq bhai hevq dal laivq-a nail ngaol. Miqyail aivq bhai hevq dal laivq-a nail ngel-i mail, yu aivq bhai maq hal pov moel nia-ail. Miqyail aivq bhai maq hevq dal laivq-u nee mail, “Ngal aivq bhai neekhaol sil naol” dai, Miqyail salkhil khanq-ai thaq nail ngaol. 6Tsaol-aq neema thaq tsaol nail neema maq aol haq neq, Miqyail neekhaol sil dai maq nl kivq-ail. Khul khi mail dai ngal-aq neq, Miqyail bhai hal lai nail tsaol-aq, Miqyail doevq nail ngaol dai, neema ya thaq tsaol khi, Miqyail aivq bhai hal pov nail tsaol-aq bhai geeqlaoq bivq nail ngaol dai iqsanl, neema ya thaq tsaol nail ngaol.

7Nol-avq neema thaq tsaol-a nail bhaq da nee, maq pevq lal daiq-a nail ganl juq Miqyail aivq bhai ge bhiq-u phao, ev nail lavqkhoel nee nal daiq khi, aivq nail phaq yaq ma yaq ya jel-ail dai, laovq laovq ma cov-a nail ngaol. Aivq-i mail neema thaq tsaol-a nail al neq, miltsaq yaq juq bhai yalkhaq bhi dal nail ngaol. Aivq neema thaq tsaol-a nail bhaq da nee, tsaq nail daol nail teevq gaq pevq lal-a nail ngaol.

8Aqbhaqlaqhaq neema thaq tsaol-a nail ngel-i mail, “Naoq bhai jaiq bhoil ovq nail milkhaoq bhai ail yaoq” dai, Miqyail aivq bhai khul-u phao, khaq bha ya-ail nail dai, maq heeq nia khi ngaol-aoq, Miqyail nail daoq bhai nal daiq khi, ail-a nail ngaol. 9Aivq neema thaq tsaol-a nail ngel-i mail, aivq bhai saljial jaq-ai thaq nail milkhaoq lavqkhoel, yu nail milkhaoq bhai jaol nail daq-i khe-ai, jaol-a nail ngaol. Aivq neq, milkhaoq al khaoq bhai aivq nee mail teevq gaq khe-ai, saljial ya nail gaq pevq nail Ilcav khi Yaqkov khe-ai saiqgov gov gov ail jaol-a nail ngaol. 10Khul khi mail dai ngal-aq neq, Aqbhaqlaqhaq neq, Miqyail-i mail saol-nvq khi cov-ai thaq nail daoqthaoq thaoq ivq-ai thaq nail meenq bhai noeq thunq nail ngaol.

11Aivq nail khaqma Saqlal iqsanl neema thaq tsaol nail ngel-i mail, yaq jaol lee nail aqyanq jel-ail khi ngaol-aoq, yaq ceiv lai-a nail ngaol. Khul khi mail dai ngal-aq neq, saljial jaq-a nail Miqyail saljial ivq nail ngaol dai, aivq neema thaq tsaol nail ngaol. 12Al heel ngel-i mail, yeel gil nail aqjail jail lal-aoq nail yaqyov-aq al gaq nail ovq nee, yavq kha lee thaq nail yaq juq mao dai jaol lee-a nail ngaol. Aqyu juq nqtavq bha tsaiq nail aqgil khe-ai mao khi, iqyaq iqma daol bha bhai jiav nail tsalhail khe-ai, maq ge gil tsaol dai, jaol nail ngaol.

13Tsaol-aq al juq neema thaq tsaol thaq tsaol ail sil-a nail ngaol. Miqyail-i mail saljial jaq-ai thaq nail juq bhai aqyu juq maq ya khi ngaol-aoq, al juq bhai eqyal nee ya moel khi, hav lavq-a nail ngaol. “Nv juq miltsaq bhai jaol-u phao, yaoq khaoq yaoq mil yaoq khe tsaol-aq khi daq-i jiovq thail thaiq nail ngaol” dai, aqyu juq ge nail ngaol. 14Al hai ge nail tsaol-aq juq neq, yovqgavq nail milkhaoq bhai hal pov thail thaiq nail ngaol dai, bhaq laoq khe dai, dov lal-a nail ngaol. 15Aqyu juq-i mail dov lee-a nail milkhaoq bhai noeqmoel lal haq neq, aqyu juq kovq lai nail aqyanq jiav nail ngaol. 16Thail hai ngaol-aoq, aqyu juq-i mail noeq thunq nail milkhaoq neq, a dai nee maq tsil meeq nail nqtavq kovtavq khe milkhaoq ngaol. Al heel ngel-i mail, “Naol nv juq nail Miqyail ngaol” dai, aqyu juq ge nail bhai, Miqyail maq haq sil-ail. Khul khi mail dai ngal-aq neq, aqyu juq-i mail ya jaol lai nail meenq bhai aivq-i mail lav sav-ai thaq nail ngaol.

17-18Aqbhaqlaqhaq neema thaq tsaol nail ngel-i mail, Miqyail aivq bhai laonq daiq-u phao, Ilcav hevq khi laol bhiq lai-a nail ngaol. “Ilcav nail ovq nee doevq lee nail juq bhai taivq-ail naoq nail jeq-e jaq-a dai, saol-nvq nail ngaol” dai, ge bhiq-a nail saljial ya-a nail al gaq, aivq nail yaqyov teevq gaq teevq-eel ngaol-aoq, laol bhiq nail khi ngaol. 19Khul khi mail dai ngal-aq neq, Miqyail tsaol-aq bhai bhi doevq kovq lal nia nail ngaol dai, aivq neema thaq tsaol nail ngaol. Mal dil ge haq neq, Ilcav sil jel-a nail gaoq ya kovq-a nail khe-ai, dul nail ngaol.

20Ilcav neema thaq tsaol nail ngel-i mail, “Nul nq nvq gaq yaqhao geeqlaoq ya dei-eiq” dai, Yaqkov khi Ilsaol bhai geeqlaoq bivq-a nail ngaol.

21Yaqkov neema thaq tsaol nail ngel-i mail, aivq sil nail aqjail jail lal-u phao, Yaolsai nail yaqyov nvq gaq bhai geeqlaoq bivq-a nail ngaol. Aivq aivq nail joiqniovq bhai gaqhal khi Miqyail bhai uqhuq thaoq-a nail ngaol.

22Yaolsai neema thaq tsaol nail ngel-i mail, aivq sil nail aqjail jail lal-u phao, Ilsaqleiqlav nail tsaol-aq Iljiltuv milkhaoq lavqkhoel nee ya dov-ai nail ganl ge bhi khi, aivq nail haqeeq bhai khal hai ya duq pheeq nail ganl iqsanl, ge bhiq ail ceevq-a nail ngaol.

23Maolseiq nail aqbhu aqma neema thaq tsaol nail ngel-i mail, Maolseiq doevq lee-u phao, bhala hail heeq bhee dai tsu uvq-ai thaq nail ngaol. Khul khi mail dai ngal-aq neq, yaqyov al gaq al jaiq-ail meeq nail bhai aqyu nvq maolyaq ya moel-a nail ngaol. Aqyu nvq gaq heeqphaq-i mail daoq bivq-ai thaq nail bhai maq gee sil-ail.

24Maolseiq neema thaq tsaol-a nail ngel-i mail, aivq eeq lal-u phao, heeqphaq Phaqlaol nail yaqmiq nail yaqyov dai khul nail bhai, aivq maq hav bhoel-ail. 25Oeqbal lavqkhoel-ai teevq yanq lavqkhiq ya tsail nail nee maq tsil, Miqyail nail yaq juq nee mail khoeq nail jiovq nail phaq bhai daq movq nail ngaol. 26Khali nail haqbhoil khoeq nail jiovq nail bhai ya daq nail phaq neq, Iljiltuv milkhaoq nail phul heel nlmaoq nee maq tsil phoiq jaiq nail ngaol dai, aivq noeq nail ngaol. Khul khi mail dai ngal-aq neq, aivq neq, yaqhao khe ya nail kovpavq bhai hel daiq cov-ai thaq nail ngaol. 27Aivq neema thaq tsaol-a nail ngel-i mail, heeqphaq Phaqlaol neema phail nail bhai maq gee sil dai, Iljiltuv milkhaoq nee dov ail-a nail ngaol. Khul khi mail dai ngal-aq neq, maq moel kivq nail Miqyail bhai moel-a nail khe-ai, ivq dao dai, jaol nail ngaol. 28Maolseiq neema thaq tsaol-a nail ngel-i mail, iqmoeq ilmoeq doevq lee-a nail yaq juq bhai heivq nail gaq Ilsaqleiqlav nail tsaol-aq bhai maq ya heivq dai, Bhaqsaqkhaq aqbhee lav sav khi, gov bhaq bhai aqsivq ya leivq-a nail ngaol.

29Ilsaqleiqlav nail tsaol-aq neema thaq tsaol-a nail ngel-i mail, gee lee del deel milkhaoq bhai tsao nail khe-ai, neltsaiq deel iqyaq iqma bhai ceiv-a nail ngaol. Thail hai ngaol-aoq, Iljiltuv tsaol-aq al hai ceiv lai thail thaiq-u phao, ulcuvq-i mail deq pheeq heivq gil-a nail ngaol.

30Ilsaqleiqlav nail tsaol-aq neema thaq tsaol-a nail ngel-i mail, Yeiqlilkhol meenq bhai sivq n tsao jaoq gaq-u phao, meenq nail khainl gaq peiv gil-a nail ngaol.

31Laqhal dai khul nail maimaqlal al gaq neema thaq tsaol-a nail ngel-i mail, Miqyail nail daoq maq nal daiq nail tsaol-aq nee mail maq ya luq maq ya seil ail-al. Khul khi mail dai ngal-aq neq, aivq khoiq hel daiq lee-a nail Ilsaqleiqlav nail tsaol-aq juq bhai hav-a nail ngaol.

32Al ovqtavq, ngal khul phaq gaoq ge heeq. Khul khi mail dai ngal-aq neq, Gildoq, Bhaqyail, Saqsoq, Yeiqphaqtav, Daq bhil, Saqmeqlal khi Miqyail nail haqbhoil ge dan nail juq nail ganl bhai maq ge bhiq gil tsaol-il. 33Tsaol-aq al juq neema thaq tsaol nail ngel-i mail, yu nail milkhaoq bhai gaq lai-a nail ngaol. Tsaq nail daol nail lavqkhoel nee uv thaiq nail ngaol. Miqyail-i mail daoqma saljial jaq-a nail khe-ai, ya-a nail ngaol. Allaqjaqsil nail moeqthaoq bhai iqsanl nieivq cuvq-a nail ngaol. 34Aqyu juq neema thaq tsaol nail ngel-i mail, mao ail bhaol nail miqjaq bhai iqsanl lav miv-a nail ngaol. Thaoma-i mail tsil heivq nail khi bhai ya jel ail-a nail ngaol. Gaq bhaq khi ngaol-aoq, gaq kav lal-a nail ngaol. Genl dev-u phao, gaq kav lal-a nail ngaol. Yu nail meenq khe genl dev nail juq bhai the kovq gai aivq-a nail ngaol. 35Yaqmai-aq teevq gaq ga nav juq neq, sil thaq nail aqyu juq nail aqivq jaqbheq juq doevq kovq lal nail bhai gaoq ya hav kovq-a nail ngaol. Tsaol-aq teevq gaq ga nav juq neq, meeq jaiq nail doevq kovq lal nail phaq bhai ya nia dai, yu-i mail phai dov bhiq nail bhai maq oil mail, khoeq nail jiovq nail phaq bhai daq khi sil-a nail ngaol. 36Tsaol-aq teevq pav ga nav juq, yu aqyu juq bhai khal nl movq ail nl bhi khi, deeq nail bhai ya daq-a nail ngaol. Teevq pav ga nav juq bhai hailcav-i mail pheethaiq khi thaonq bhai laol nail bhai iqsanl ya daq-a nail ngaol. 37Yu-i mail lovmav liv nail, leq-i mail leq heivq nail khi, thaoma-i mail tsil heivq nail bhai aqyu juq ya daq-a nail ngaol. Aqyu juq neq, al jaiq-ail haq nail phaq, khoeq nail jiovq nail phaq khi haq dee aoq dee dee nail phaq bhai, ya daq-a nail lavqkhoel, yaol nail bavkov khi civqmeiv nail bavkov doi khi, teevq dao nee teevq dao tsao tsao ail jaol-a nail ngaol. 38Aqyu juq haqtsoiq haqyal bha tsaol laivq khi jaol lai-a nail ngaol. Lovphail khaoq bhaoq khi khaq duq bhai tsaoq uvq tsaoq uvq ail jaol-a nail ngaol. Aqyu juq meeq nail jaq nail ngel-i mail, miltsaq niil aqyu juq bhai maq geel-nvq-ail.

39Tsaol-aq al juq yaoq gaq yaoq-ao nee, neema thaq tsaol nail ngaol dai, Miqyail salkhil khanq-ai thaq nail ngaol. Thail hai ngaol-aoq, daoqma saljial jaq-ai thaq nail khe-ai aqyu juq maq ya haq-al. 40Khul khi mail dai ngal-aq neq, Miqyail ngadao juq nail haqbhoil meeq jaiq nail phaq lav sav-ai thaq nail ngaol. Ngadao iqsanl maq aol lai haq neq, aqyu juq bhee lal nail phaq bhai maq ya nia-ai haq-al.

Currently Selected:

Heiqbhail 11: aeu

Highlight

Copy

Compare