Genesis 4
4
Iqmoeq 4
Gaqilnav dai khi Aqbheiqlav
1A bhai nee ngal-aq, Aqdaq neq, Eilbav nee mail jaol tavq-a nail ngel-i mail, Eilbav yaq ceiv lai khi, yaqyov teevq gaq bhao-a nail ngaol. "Heeqphaq Miqyail tsao jao-ai lavq-a nail ngel-i mail, yaqyov ya-a nail ngaol" dai, Eilbav ge khi, yaqyov al gaq bhai Gaqilnav#4.1 Gaqilnav Gaqilnav dai, ge nail daoqceevq neq, ya nail dai ge movq nail ngaol dai, mil bhiq-a nail ngaol.
2Haoqnao aivq nail jaqbheq Aqbheiqlav, gaoq bhao-a nail ngaol.
Aqbheiqlav neq, yaol lovq nail gaq pevq khi, Gaqilnav neq, kha jaq kha daol nail gaq pevq nail ngaol.
3Aqyanq tsaq lal-u phao, Gaqilnav neq, aqheeq allu juq, Heeqphaq Miqyail bhai laol bhiq nail galduq, oil lavq-a nail ngaol.
4Aqbheiqlav gail aivq nail yaol juq nail lavqkhoel khe iqmoeq khal moeq phaoq-a nail yaol nieil lavq khi heivq-a nail nee ovqtavq, khal meeq jaiq nail haqjoil khal dov khi, Miqyail bhai laol bhiq-a nail ngaol. Heeqphaq Miqyail neq, Aqbheiqlav dai khi aivq-i mail laol bhiq nail phaq bhai, hav bhoel-a nail ngaol.
5Thail hai ngaol-aoq Gaqilnav dai khi aivq-i mail laol bhiq-a nail phaq bhai, Heeqphaq Miqyail maq hav bhoel bhiq-al. Al heel ngel-i mail, Gaqilnav neq, neema phail dee dee lal bhiq khi, nalkhaol gaol mol-aivq-a nail ngaol.
6Aq-u phao, Heeqphaq Miqyail Gaqilnav bhai ge bhiq-a nail: "Naol khul khi mail neema phail khi nalkhaol gaol movq-ai thaq nail-aiq.
7Naol nl heeq phaq-ail tsaq nail phaq nl-al kheel nul-uq neq, naol hav bhoel tsaol nail maq ngel-ail laiq. Thail hai ngaol-aoq, naol maq tsaq nail phaq nl haq neq, oeqbal neq, haqtsoiq jaiqyaq khe-ai, naoq nail lolgov aqjail bhai khoiq phaonq thail thaiq nail ngaol. Oeqbal al naoq bhai uv thaiq movq khi ngaol-aoq, naol oeqbal bhai ya gaq lai nail ngaol" dai, ge bhiq-a nail ngaol.
8Thail hai ngaoq, Gaqilnav neq, aivq nail jaqbheq Aqbheiqlav bhai, "Daiyal bha tsao daiq-ail bhel" dai, ge bhiq khi, khul-aivq-a nail ngaol. Kev ail-a nee ngal-aq, aivq nail jaqbheq bhai deeq heivq-a nail ngaol.
9Aq-u phao, Heeqphaq Miqyail Gaqilnav bhai, "Naoq nail jaqbheq Aqbheiqlav khaq bha jaol nail-aiq" dai, nal daiq bhiq-a nail ngaol. Gaqilnav ge kovq bhiq-a nail: "Ngal maq heeq kivq ail, ngal ngaq nail jaqbheq bhai hel daiq phail nail gaq maq ngel ail" dai, ge kovq bhiq-a nail ngaol.
10Heeqphaq Miqyail ge bhiq-a nail: "Naol khul nl-a nail-aiq. Nal daiq yaoq. Naoq nail jaqbheq nail aqsivq neq, miltsaq al nee mail ngaq bhai gul-il.
11Al heel ngel-i mail, naol ivqkhail yavq nail bhai ya daq khi, miltsaq niil heeq nee mail ya bhi thel dov nail ngaol. Khul khi mail dai ngal-aq, naoq nail aqlavq bhaq da nee, naoq nail jaqbheq nail aqsivq moeqthaoq bhai il bhoel nail khe-ai, miltsaq bhai il bhoel-a nail ngaol.
12Naol neq, miltsaq bhai kha jaq kha daol khi mail ngaol-aoq, aqheeq allu juq aqmeeq dai, maq bivq lavq yaoq-aol. Naol neq, ilkhaol jil khaol maq bhao dai, haqtsoiq haqyal bhai ya tsao ga nail ngaol" dai, ge bhiq-a nail ngaol.
13Aq-u phao, Gaqilnav ge kovq bhiq-a nail: "Ngaq-i mail ya daq-a nail phaq neq, maq daq tsaol dai, aqliq liq dee dee nail niil.
14Naol neq, ngaq bhai miltsaq niil niai nee the dov lavq-ao nial. Naoq nail sivtavq nee gail the dov lavq-ao nial. Ilkhaol jil khaol maq bhao dai haqtsoiq haqyal bhai ya tsao ga-ail nial. Ngaq bhai khal moel lee nail tsaol-aq juq neq, ngaq bhai heivq lal nail ngaol" dai, ge kovq bhiq-a nail ngaol.
15Heeqphaq Miqyail gaoq ge bhiq-a nail: "Naoq bhai thail hai maq bhi kev lee-ail. Naoq bhai khal heivq nail tsaol-aq nl kovq nail phaq bhai, sivq bhoil bhee dai, gaoq ya daq kovq nail ngaol" dai, ge bhiq-a nail ngaol. Al heel ngel-i mail, Heeqphaq Miqyail neq, Gaqilnav bhai khal moel nail tsaol-aq maq ya heivq dai, savtivq bivq nail galduq, aivq bhai aqtsaq cov bhiq-a nail ngaol.
16Gaqilnav gail, Heeqphaq Miqyail nail sivtavq nee mail dov-ail khi, Eiqdeiq gaoqkhail nail nlma dov khoeq phao jiav nail Novq nail miltsaq bhai jaol ail-a nail ngaol.
Gaqilnav nee mail yavq khal lee thaq nail yaq juq
17Gaqilnav neq, aivq nail khaqma nee mail jaol tavq-a nail ngel-i mail, yaq ceiv lai khi mail, Eilnaov dai khul nail yaqyov teevq gaq bhao-a nail ngaol. Gaqilnav neq, meenq daq-n khi meenq al meenq bhai neq, Eilnaov dai mil bhiq-a nail ngaol.
18Eilnaov neq, Iqlaqdaq dai khul nail yaq teevq gaq ya-a nail ngaol. Iqlaqdaq nail yaqyov neq Meiqhulyeiqlav. Meiqhulyeiqlav nail yaqyov neq, Meiqthulseiqlav. Meiqthulseiqlav nail yaqyov neq, Laqmail ngaol.
19Laqmail neq, Aqdal dai khi Sillav dai khul nail khaqma nvq gaq nee hevq-a nail ngaol.
20Aqdal neq, Jaqbhal dai khul nail yaqyov bhao-a nail ngaol. Jaqbhal neq, jaiqyaq juq tsu khi haqphal saiqgov bhai jaol nail juq nail aqbhu pevq nail ngaol.
21Aivq nail jaqbheq neq, Yuqbhal dai khul nail nee ovqtavq, dil-nvq deeq nail juq dai khi tsillil bhaoq lao jiiv nail juq nail aqbhu pevq nail ngaol.
22Sillav neq, Thulbhaqlal Gaqilnav dai khul nail yaqyov bhao-a nail ngaol. Aivq neq, hail dai khi giqheel nail khenkha-ao lav sav nail gaq pevq nail ngaol. Thulbhaqlal Gaqilnav nail nailma neq, Naiqmav dai khul nail ngaol.
23Laqmail neq, aivq nail khaqma nvq gaq bhai:
"Aqdal dai khi Sillav-ol,
ngaq nail daoq bhai nal daiq yaoq.
Ngaq bhai lavq nal lal nail
yaqyov-aq teevq gaq bhai ngal heivq khi
deeq lal-a nail
yaqyov-aq yaqnoil teevq gaq bhai iqsanl
heivq-a nail ngaol.
24Gaqilnav bhai heivq nail gaq neq,
nl kovq bhiq nail bhai
7 bhoil ya daq nail ngel haq
ngaq bhai heivq nail gaq neq,
nl kovq bhiq nail phaq bhai
77 pov ya daq nail ngaol" dai,
ge nail ngaol.
Seiqtav bhao-a nail ganl
25Aqdaq neq, aivq nail khaqma Eilbav nee gaoq jaol tavq khi, Eilbav neq, yaqyov teevq gaq gaoq bhao-a nail ngaol. Eilbav ge nail: "Gaqilnav-i mail heivq-a nail Aqbheiqlav nail haqbhoil yaqyov teevq gaq, Heeqphaq Miqyail bivq lavq-a nail ngaol" dai, ge khi yaqyov al gaq bhai Seiqtav#4.25 Seiqtav Seiqtav dai, ge nail daoqceevq neq, bivq nail dai, ge movq nail ngaol. dai mil bhiq-a nail ngaol.
26Seiqtav gail yaqyov teevq gaq ya khi, yaqyov al gaq bhai neq, Eilnov dai mil bhiq thaq nail ngaol.
Yanq al yanq nee mail daq-n khi, tsaol-aq yaq juq iqmoeq khal moeq Heeqphaq Miqyail nail aqmil bhai khul khi, geeqlaoq hal-a nail ngaol.
Currently Selected:
Genesis 4: aeu
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.