Gaqlaqtil 5

Bhuq ail-a nail tsaol-aq ngel-i mail, ivq dao dai jaol yaoq

1Ngadao bhuq ail-a nail tsaol-aq pevq lal dai, Khali ngadao bhai bhi bhuq ail lavq-a nail ngaol. Al heel ngel-i mail, ivq dao dai jaol yaoq. Aol daoq kovq daoq nail Yaqkav thaq gaoq jiovq.

2Ngal neq, Paolluv ngaol. Ngal nul juq bhai ge lavq bhel. Nul juq bavkov uqjaq oev nail Yuldav nail tsaol-aq nail aol thaoq haq neq, Khali nul juq nail haqbhoil ganl maq tsoiq-ail. 3Bavkov uqjaq oev nail aol khal thaoq nail tsaol-aq bhai ngal teevq pov gaoq ge lavq bhel. Aol al thaoq nail tsaol-aq Yuldav nail tsaol-aq nail Aol daoq Kovqdaoq iqsanl bhai, ya nl bhee nail ngaol. 4Aol daoq kovq daoq bhaq da nee, tsaq nail daol nail tsaol-aq pevq lal naol dai, nul juq khal noeq nail juq, Khali bhai gaoq ceiv ceiv-aoq nail ngaol. Nul juq neq, Khali nail geeqlaoq eel jaol nail lavqniil phao jiiv dol aivq khi jaol nail tsaol-aq pevq nail ngaol. 5Ngadao juq Yeiqsul bhai neema thaq tsaol nail bhaq da nee, tsaq nail daol nail tsaol-aq pevq lal dai, noeq thunq khi, Aqhaqlal Miqyail bhai juq nail lavqkhoel nee daonq thail thaiq nail ngaol. 6Khul khi mail dai ngal-aq neq, Yeiqsul Khali nail lavqkhoel bhai jaol nail tsaol-aq juq nail haqbhoil neq, bavkov uqjaq oev khi ngaol-aoq, maq oev khi ngaol-aoq, teevq phaq ail ganl maq tsoiq-ail. Goil nail gaiq-a nail phaq nl dol hal dol lavq nia dai, neema thaq tsaol nail al phaq taivq-ail ganl tsoiq nail phaq pevq nail ngaol.

7Iqmoeq-u neq, nul juq aqmeeq-ai tsaol-aivq-a nail ngaol. Mal dil tsaq nail haoqnao bhai maq ya tsao thel aivq dai, khaq sil gaq nul juq bhai lav tsoiq nail-aiq. 8Nul juq bhai jalmul mul nail al neq, nul juq bhai khul-a nail, Miqyail nail lavqkhoel nee dov lee-a nail, maq ngel-ail. 9Daoq ma uqhuq daoq teevq dao ge-ai thaq nail khe-ai, deqtsiq micil cil teevq-eel ngaol-aoq, khaqmul teevq heeq heeq lao bhai bhi bhaonq lal nia nail ngaol. 10Ngal noeq nail khe-ai nul juq iqsanl mail noeq dai, ngal Yeiqsul bhai juq juq ail, neema thaq tsaol naol. Thail hai ngaol-aoq, nul juq nail neema bhai lav suq saq lal nail khul gaq maqkhaiq, Miqyail-i mail yalkhaq dal nail bhai ya daq naol. 11Aqivq jaqbheq juq-ol, bavkov uqjaq oev nail aol thaoq yaoq dai, ngal cavq nail cov nail ngel haq neq, khul khi mail khoeq nail jiovq nail bhai ngal ya daq thail thaiq nail ngel-ail. Ngal al hai cavq nail cov nail ngel haq neq, lavqyavq nail ganl ngal cavq thail thaiq nail daoq al juq neq, yu nail haqbhoil phaq thiq thiq nail daoq juq maq ngel yaoq-aol. 12Nul juq nail neema bhai lav suq saq lal nail tsaol-aq al juq bhai, yovqgavq bhai yovqgavq bhi oev ha gil movq ail nial.

13Aqivq jaqbheq juq-ol, nul juq bhuq ail lao ail-a nail tsaol-aq ya pevq dai, Miqyail nul juq bhai khul-a nail ngaol. Thail hai ngaol-aoq, bhuq ail lao ail-a nail al bhai yovqgavq nail aqsivq haqjoil khal pevq movq nail khe-ai, thaq yuq. Goil nail gaiq-a nail lavqkhoel teevq gaq nail yaqkav teevq gaq jiovq yaoq. 14Khul khi mail dai ngal-aq neq, “Naoq nail aqmaol bhai gaiq-a nail khe-ai, naoq nail aqjail bhai jaol nail tsaol-aq bhai gaiq-a yaoq” dai, bivq-ai thaq nail daoq al daoq nail lavqkhoel bhai, aoldaoq kovqdaoq iqsanl mail bhee lal-a nail ngaol. 15Thail hai ngaol-aoq, nul juq khaq pheel jaq khi, teevq gaq nee teevq gaq keivq heivq jaq haq neq, nul juq pav ail sav ail khi cov ail nail bhai yaol phaol yaoq.

Aqhaqlal Miqyail nail aqheeq juq

16Aqhaqlal Miqyail hel aivq lavq nail khe-ai, ail yaoq dai, ngal ge movq ail nial. Al hai ail haq neq, nul juq aqsivq haqjoil nail nee noeq neekhaol haoqnao maq ail yaoq-aol. 17Khul khi mail dai ngal-aq neq, aqsivq haqjoil nail neekhaol neq, Aqhaqlal Miqyail bhai lav tsoiq khi, Aqhaqlal Miqyail iqsanl aqsivq haqjoil nail neekhaol bhai lav tsoiq nail ngaol. Nul juq nl movq nail khe-ai maq ya nl dai, al nvq gaq teevq gaq nee teevq gaq genl dev nail ngaol. 18Aqhaqlal Miqyail hel aivq lavq nail bhai nul juq ail haq neq, nul juq aoldaoq kovqdaoq nail kov-uvq bhai, maq jaol yaoq-aol.

19Aqsivq haqjoil nail neekhaol bhaq da nee nl-a nail ganl juq neq, niail hai bhaq laoq kheq dai, moel lal-a nail ngaol. Khaqmiq sev nail, maq meeq maq haol nail phaq nl nail, maq tsaq maq daol nail lavqkhoel nee iq thaiq tavq jaol tavq nail. 20Thaoq phaoq aqma maolkhoel bhai uqhuq thaoq nail, laol nail sail nail, teevq gaq nee teevq gaq neejiav jiav nail, khaq pheel jaq nail, yu bhai neekhaol maq sil nail, neema phail dee dee nail, yovqgavq nail haqbhoil taivq-ail saol-nvq nail, gaoq ail gail ail nail munl bhoilpav nail. 21Yu bhai maivjeel jeel nail, jil pheeq daol bov nail, maq tsaq maq daol nail aqbhee lav sav nail, al hai nl nail juq ngaol. Al heel phaq nl nail tsaol-aq, Miqyail Milkhaoq bhai maq ya aol lai ail dai, iqmoeq-u khe pov ngal nul juq bhai ge bhiq-a nail khe-ai, niil aq-il thal khe pov iqsanl ge lavq bhel.

22Thail hai ngaol-aoq, Aqhaqlal Miqyail nail aqheeq neq, goil nail gaiq-a nail, lavqkhiq tsail nail, nee sal ovq nail, nee noeq heelma ma dai noeq nail, gaoq haq gaiq-a nail, aqmeeq phaq aol nail, saljial ivq nail. 23Neema nee nuq nee beiv aol nail, yovqgavq nail neema bhai gaq lai nail, niil juq ngaol. Niil juq thaq nl dai, gevq-ai thaq nail aoldaoq kovqdaoq teevq daoq iqsanl maq jiav-ail. 24Yeiqsul Khali bhai khal tavq nail tsaol-aq, yovqgavq nail aqsivq haqjoil phao maqkhaiq, aqsivq haqjoil nail nee noeq neekhaol khi maivjeel jeel nail juq bhai maqkhaiq, lavqyavq kovtavq bhai tavq heivq-ao nail ngaol. 25Ngadao Aqhaqlal Miqyail bhai juq juq ail aqdoevq doevq nail ngel haq neq, Aqhaqlal Miqyail-i mail hevq daiq lavq nail phao, ail bhel. 26Neema eeq nail maqkhaiq, iqdaiq iqtsai dov lal dai nl nail maqkhaiq, teevq gaq nee teevq gaq maivjeel jeel nail maqkhaiq niil juq bhai khaonq ha bhel.

Currently Selected:

Gaqlaqtil 5: aeu

Highlight

Copy

Compare