2 Tilmolseiq 2

Yeiqsul Khali nail haqbhoil genl dev nail juq

1Ngaq nail yaq yov-ol, Yeiqsul Khali nail geeqlaoq eel jaol lavqkhoel nee gaq kav lal yaoq. 2Salkhil khanq nail tsaol-aq mao dai gaq nail sivtavq bhai ngaq-i mail cavq bhiq cov bhiq-a nail juq, naol ya gaiq-a nail ngaol. Saljial ivq khi yu bhai cavq bhiq cov bhiq nia nail tsaol-aq bhai, daoq al juq av bhiq yaoq. 3Yeiqsul Khali nail haqbhoil mao ail meeq nail genl dev nail gaq jiovq nail khe-ai, naol ngaq-ai nee mail khoeq nail jiovq nail phaq bhai daq yaoq. 4Genl dev nail tsaol-aq khul gaq maqkhaiq, yovqgavq nail aqivq gaq neekhaol sil dai nl movq nail ngel-i mail, yovqgavq nail nl jaq keiv daol nail ganl bhai maq suq saq-ail. 5Tsaoq doel pheel jaq nail aqbhee lavqkhoel, tsaoq doel pheel jaq nail tsaol-aq aivq nail aolsaolkovq jiav nail khe-ai maq tsaoq haq neq, gaq lai nail heel uq tsaoq kovpavq aivq bhai maq bivq-ail. 6Laijai khi yalgaol nl nail tsaol-aq, aqheeq al lu iqmoeq ilmoeq ya jaq nail ngaol. 7Ngal ge nail bhai saol-nvq daiq. Khul khi mail dai ngal-aq neq, yaoq phaq yaoq-ao nee bhai naol heeq nia dai, Miqyail naoq bhai neenoeq neekha bivq lavq nail ngaol.

8Ngaq-i mail lavqkhiq tsail nail geeqlaoq daoq cavq-ai thaq nail khe-ai, Daq bhil nail jeq-e jaq-a pevq nail, sil khi doevq kovq lal-a nail Yeiqsul Khali bhai, thaq nioil peivq dei-eiq. 9Lavq khiq tsail nail geeqlaoq daoq al daoq cavq-a nail bhaq da nee, haqeiv nail tsaol-aq teevq gaq bhai phee nail khe-ai, ngaq bhai phee lavq khi, haq dee aoq dee dee nail phaq bhai ngal ya daq thail thaiq nail ngaol. Thail hai ngaol-aoq, Miqyail nail daoq bhai teevq gaq ail maq pheethaiq nia-ail. 10Al heel ngel-i mail, tsel dov-ai thaq nail tsaol-aq bhai iqsanl, Yeiqsul Khali nail lavqkhoel bhai aol nail hevq kovq nail phaq ya dai, ngal yaoq phaq yaoq-ao nee bhai ol nail ngaol. Hevq kovq nail al phaq nee mail teevq gaq khe-ai, nqmaq maqluv halyeel nail seiqleiq khaoqsail iqsanl ya nail ngaol.

11Daoq niil daoq neq saljial ivq nail ngaol:

Ngadao aivq nee mail

sil haq neq,

aivq nee mail aqdoevq

ya doevq nail ngaol.

12Ngadao ol haq neq,

aivq nee mail ya

uv thaiq nail ngaol.

Ngadao aivq bhai

khaonq ha haq neq,

aivq iqsanl ngadao bhai

khaonq ha nail ngaol.

13Ngadao saljial

maq ivq khi ngaol-aoq,

aivq saljial ivq nail ngaol.

Khul khi mail dai ngal-aq neq,

aivq-i mail

ge-ai thaq nail saljial bhai

aivq maq khaonq ha-ail.

Miqyail neema tsaq nail khe-ai ganl nl nail gaq

14Ganl al juq aqivq jaqbheq juq bhai ge noeq bhiq yaoq. Daoq juq nail ganl nee thaq jil pheel jaq dai, Miqyail nail sivtavq bhai aqyu juq bhai mail ma-ail cavq bhiq yaoq. Al hai jil pheel jaq nail neq, khul teevq phaq ail ganl maq tsoiq nail nee ovqtavq, ya gaiq nail tsaol-aq bhai bhi cov ail nail ngaol. 15Naol neq, haq sil duq maq jiav dai, mal dil tsaq nail daoq daol coev dai, cavq bhiq nia nail gaq pevq nail nee ovqtavq, Miqyail neema tsaq nail khe-ai ganl nl nail gaq pevq lal dai, lai jai dee dee yaoq. 16Miqyail bhai maq ev dai, ganl maq tsoiq nail daoq bhai gail jao jao yaoq. Khul khi mail dai ngal-aq neq, al hai ganl maq tsoiq nail daoq ge nail tsaol-aq neq, Miqyail bhai maq ev nail neema teevq pov nee teevq pov mao jaiq lal nail ngaol. 17Aqyu juq-i mail cavq bhiq cov bhiq nail juq neq, malyal bhaol ail nail malkhoeq khe-ai, dul nail ngaol. Aqyu juq nail lavqkhoel bhai Huqmiqnail khi Phillail iqsanl aol nail ngaol. 18“Ngadao doevq kovq lal nail phaq neq, jel ail-aoq nail ngaol” dai, aqyu nvq gaq ge ge ail khi, mal dil tsaq nail phaq bhai gail bheeq bheeq nail ngaol. Aqyu nvq gaq neq, tsaol-aq teevq pav ga nav juq nail neema thaq tsaol nail phaq bhai lav cov nail ngaol. 19Thail hai ngaol-aoq, Miqyail-i mail kaovq-ai thaq nail daoqthaoq neq, ivq dee dee nail ngaol. “Miqyail neq, aivq nail tsaol-aq bhai heeq nia nail ngaol.” “Miqyail nail aqmil bhai juq nail yaoq gaq yaoq-ao nee maq tsaq maq daol nail phaq bhai khaonq ha yaoq” dai, daoqthaoq al bhai junq deeq-ai thaq nail ngaol.

20Il khaol il ma nail lavqkhoel-ai, phul heel-i mail teivq-ai thaq nail nlmaoq taivq-ail jiav nail maq ngel-ail. Aq bhaol-i mail lav sav-ai thaq nail khi miltsaq-i mail teivq-ai thaq nail juq iqsanl jiav nail ngaol. Nl maoq teevq pav ga nav juq neq, aqbhee lav sav-u phao taivq-ail yuq khi, teevq pav ga nav juq neq, yaoq n yaoq n nee yuq nail ngaol. 21Pultavq phao gevq-ai thaq nail aq jiivq aq cavq al juq bhai yovqgavq nail neema lavqkhoel bhai yovqgavq khaonq ha haq neq, ilheel gaq yuq nia nail meeq nail haol nail nlmaoq pevq lal nail ngaol. Al ovqtavq, aqmeeq yaoq phaq yaoq-ao nee bhai nl nail haqbhoil, lainq-ai thaq nail, aqphoiq mao ail phoiq khi ganl tsoiq nail nlmaoq iqsanl pevq lal nail ngaol.

22Yaq noil juq-i mail aqsivq haqjoil phao nee tavq nail neekhaol sil nail phaq bhai, naol gail jao jao yaoq. Neema aqhaol haol deel aol khi, Miqyail bhai hal nail tsaol-aq nee mail, tsaq nail daol nail phaq, neema thaq tsaol nail phaq, goil nail gaiq-a nail phaq khi, tsaq lai jil lai nail phaq nail haoqnao aqmeeq-ai tsao thel aivq yaoq. 23Nee noeq nee kha maq aol ail, khul teevq phaq ail ganl maq tsoiq dai, jil pheel jaq nail bhai iqsanl, gail jao jao yaoq. Khul khi mail dai ngal-aq neq, jil pheel jaq nail al neq, iqdaiq iqtsai bhi dov lal nail ngaol. 24Miqyail nail ganl nl nail tsaol-aq neq, jil pheel jil lul jaq nail tsaol-aq maq ya pevq-ail. Aivq neq, tsaol-aq iqsanl bhai neema nee nuq nee beiv aol nail tsaol-aq, cavq bhiq cov bhiq nia nail tsaol-aq khi, ol nia nail tsaol-aq ya pevq nail ngaol. 25Yovqgavq-i mail cavq bhiq nail bhai neema maq tsaq nail tsaol-aq bhai, neema nee nuq nee beiv aol nail lavqkhoel cavq bhiq nia nail tsaol-aq iqsanl ya pevq nail ngaol. Al hai cavq bhiq haq neq, al gaq mal dil tsaq nail phaq bhai heeq nia lal khi, oeqbal noeq pov lal dai, Miqyail nl bhiq ail meeq. 26Al ovqtavq, aivq nail nee noeq khe-ai bhi nl nail dai khi, neivq heeqphaq-i mail aqyu juq bhai khail phee-ai thaq khi ngaol-aoq, aqyu juq noeq lal khi aivq nail lavq phee lavqkhoel nee ya jel-ail nail ngaol.

Currently Selected:

2 Tilmolseiq 2: aeu

Highlight

Copy

Compare