1 Tilmolseiq 3

Khali yaq munl bhai hel daiq phail nail gaq nail ganl

1Khali yaq munl bhai hel daiq phail nail ganl bhai hal pov nail tsaol-aq, ganl aqmeeq hal pov nail ngaol dai, ge-ai thaq nail daoq al daoq neq, tsaq dee dee nail ngaol. 2Al heel ngel-i mail, Khali yaq munl bhai hel daiq phail nail gaq, oeqbal thaq duq maq jiav nail tsaol-aq, khaqma teevq gaq taivq-ail jaol nail tsaol-aq, yaol phaol nia nail tsaol-aq, neema ivq dao dai, thaq nia nail tsaol-aq, ev heeq phaq-ail tsaq nail tsaol-aq, daq-i bhai hav nia nail tsaol-aq khi, cavq bhiq cov bhiq nia nail tsaol-aq ya pevq nail ngaol. 3Aivq neq, jil pheeq daol bov khi, yu bhai deeq nail tsaol-aq maq ya pevq-ail. Neema nee nuq nee beiv aol nail tsaol-aq, yu nee maq jil pheel jaq nail tsaol-aq khi, phul bhai neekhaol maq jiav nail tsaol-aq ya pevq nail ngaol. 4Yovqgavq nail ildaoq bhai aqmeeq-ai hel daiq phail nia khi, yaqmiq yaqyov juq daoq nal daiq nail lavqkhoel nee, tsaq nail phaq bhai nl nia lal dai, cavq bhiq cov bhiq nia nail tsaol-aq ya pevq nail ngaol. 5Khul khi mail dai ngal-aq neq, yovqgavq nail ildaoq bhai maq hel daiq phail nia nail tsaol-aq, Miqyail nail Khali yaq munl bhai khal hai khi hel daiq phail nia nail-aiq. 6Aivq neq, Khali yaq aqsivq maq ya pevq-ail. Maq ngel haq neq, neema eeq lal khi, neivq heeqphaq nee mail teevq gaq khe-ai, yalkhaq dal nail bhai ya daq la geiq. 7Khali yaq munl nail lavqniil phaol jaol nail tsaol-aq nail sivtavq bhai, khul teevq phaq ail ge duq maq jiav nail tsaol-aq ya pevq nail ngaol. Maq ngel haq neq, yu-i mail khal ge movq ail ge nail bhai ya daq khi, neivq heeqphaq nail lavq phee bhai phee lai nail ngaol.

Tsao jao-ai bhiq nail gaq nail ganl

8Al hai dul dai, tsao jao-ai bhiq nail juq iqsanl, yu ev nail tsaol-aq ya pevq nail ngaol. Moevq lal lal jaiq covq nail tsaol-aq, jil pheeq daol bov nail tsaol-aq khi, maq tsaq maq daol nail lavqkhoel nee phul hal pov nail tsaol-aq maq ya pevq-ail. 9Aqyu juq neq, oeqbal thaq duq maq jiav nail heeq nia nail neema aol khi, neema thaq tsaol nail phaq bhai tavq nail daoq ceevq nav dee dee nail phaq bhai ivq dao dai nieivq thaiq-ai thaq nail tsaol-aq yaq pevq nail ngaol. 10Aqyu juq bhai iqmoeq laonq daiq yaoq. Laonqdaiq khi, oeqbal thaq duq maq jiav haq neq, tsao jao-ai nail gaq bhi jiovq yaoq.

11Al hai dul dai, yaqmai-aq juq iqsanl yu ev nail tsaol-aq ya pevq nail ngaol. Yu bhai khal ge movq ail ge doil nail tsaol-aq maq ya pevq-ail. Yaolphaol nia nail tsaol-aq, khi yaoq phaq yaoq-ao nee nail lavqkhoel saljial ivq nail tsaol-aq ya pevq nail ngaol.

12Tsao jao-ai nail gaq iqsanl, khaqma teevq gaq taivq-ail ya jaol nail ngaol. Yovqgavq nail yaq khi yovqgavq nail ildaoq lavqkhoel bhai khal jaol nail tsaol-aq bhai aqmeeq-ai hel daiq phail nia khi gaq lai nail tsaol-aq ya pevq nail ngaol. 13Khul khi mail dai ngal-aq neq, tsao jao-ai nail ganl bhai aqmeeq-ai nl nail tsaol-aq, yu-i mail thaq eeq lavq nail bhai ya daq nail nee ovqtavq, Yeiqsul Khali bhai neema thaq tsaol nail lavqkhoel nee gee sil nail neema maq aol dai iqsanl, pevq lal nail ngaol.

Miqyail bhai ev khi uqhuq thaoq nail aol nail ganl

14-15Mao ail maq maoq lal mail, naol jaol nail bha lee naol dai, ngal noeq-ai thaq nail ngaol. Thail hai ngaol-aoq, ngal lavqtsail mail maq lee kev-u nee, Miqyail nail ildaoq lavqkhoel khal hai nl heeq phaq-ail tsaq nail juq naol ya heeq nia dai, ganl niil juq ngal naoq bhai gevq bhoel-ai leevq-a nail ngaol. Ildaoq al neq, aqdoevq doevq nail Miqyail nail Khali yaq munl ngaol. Munl al neq, mal dil tsaq nail phaq nail haqbhoil ivq duq khi daoqthaoq ngaol. 16Ngadao Khali yaq juq Miqyail bhai ev khi uqhuq thaoq nail aol neq, daoq ceevq nav dee dee nail ngaol dai, ge kivq nail ngaol.

Miqyail neq, aqsivq haqjoil phi khi doevq lee-a nail ngaol. Aivq tsaq nail daol nail ngaol dai, Aqhaqlal Miqyail salkhil khanq-a nail ngaol. Nqtavq gaqkhoel aivq bhai ya moel-a nail ngaol. Aivq nail ganl yu nail jeq-e jaq-a bhai ge gaiq bhiq-a nail ngaol. Miltsaq yaq aivq bhai neema thaq tsaol lal-a nail ngaol. Aivq bhai seiqleiq khaoqsail nail lavqkhoel nee tsiqdal laivq-a nail ngaol.

Currently Selected:

1 Tilmolseiq 3: aeu

Highlight

Copy

Compare