1 Bheiqtuvluv 4

Miqyail nail haqbhoil aqdoevq doevq yaoq

1Khali aivq nail aqmaol lavqkhoel bhai haq nail aoq nail phaq ya daq-u phao, aivq neema thaq nia-a nail khe-ai, nul juq iqsanl thaq yaoq. Yovqgavq nail aqmaol bhai haq nail aoq nail phaq ya daq-a nail tsaol-aq, oeqbal bhai gaoqceiv ceiv-a nail ngaol. 2Al hai gaoqceiv ceiv-a nail tsaol-aq, miltsaq bhai aqdoevq doevq-u phao, aqsivq haqjoil nail neekhaol haoqnao maq doevq mail, Miqyail neema tsaq nail khe-ai, doevq nail ngaol. 3Milnee uqnee nul juq iqsanl laol kivq yaq nl nail khe-ai, nl-a nail ngaol. Aq-u phao, nul juq iqsanl maq nl maq hal heeq phaq-ail tsaq nail juq nl-a hal-a nail ngaol. Aqsivq haqjoil nail neekhaol lavqkhoel nee, khaqmiq sev nail phaq nl khi, jil pheeq daol bov nail, maq meeq maq haol nail lavqkhoel nee aqbhee lav sav nail, al jaiq jaq jel daol jel nail, al juq nl daiq-a nail nee ovqtavq, maq hel daiq nul nail thaoq phaoq aqma maolkhoel bhai uqhuq thaoq daiq-a nail ngaol. Al juq thaq gaoq nl. 4Aqyu juq al hai haqeiv nail mee nia phaq nl nail haoqnao niil aq-il nul juq maq tsao the-aoq nail ngel-i mail, aqyu juq noeq-u maq dov dai pevq-ail khi, nul juq bhai khal ge movq ail ge nail ngaol. 5Thail hai ngaol-aoq, yalkhaq dal nail Miqyail nail sivtavq bhai aqyu juq yovqgavq nail ganl yovqgavq ya ge daiq bhiq nail ngaol. Yalkhaq dal nail al gaq, aqdoevq doevq nail tsaol-aq bhai maqkhaiq, sil thaq nail tsaol-aq bhai maqkhaiq, yalkhaq dal nail dai khi, lainq-ai thaq nail ngaol. 6Al heel ngel-i mail, sil thaq nail tsaol-aq bhai iqsanl lavqkhiq tsail nail geeqlaoq daoq cavq bhiq-a nail ngaol. Khul khi mail dai ngal-aq neq, aqsivq haqjoil phi khi, aqdoevq doevq nail tsaol-aq khe-ai, aqyu juq yalkhaq dal nail bhai ya daq khi ngaol-aoq, Miqyail doevq nail khe-ai, aqyu juq aqhaqlal phao ya doevq dai, cavq bhiq-a nail ngaol.

7Yaoq phaq yaoq-ao nee haoqnao nao saq nail aqjail jail lal-aoq nail ngaol. Al heel ngel-i mail, geeqlaoq aqmeeq-ai hal kivq dai, yovqgavq nail neema bhai gaq lai khi, aqgeel geel dai ya bhi jiav nail ngaol. 8Nul juq teevq gaq nee teevq gaq gaiq-a dee dee yaoq. Daoq niil daoq neq, eeq dee dee nail daoq ngaol. Khul khi mail dai ngal-aq neq, goil nail gaiq-a nail phaq neq, mao ail mao nail oeqbal bhai doeq khaiq-ai thaq nia nail ngaol. 9Teevq gaq nee teevq gaq, daoq govq maq dov dai, daq-i bhai aqmeeq-ai hav yaoq. 10Nul juq teevq gaq nee teevq gaq aqhaqlal phao khe kovpavq ya-a nail khe-ai, teevq ga nee teevq gaq nail haqbhoil yuq yaoq. Al hai yuq haq neq, Miqyail nail geeqlaoq eel jaol mee nia phaq bhai aqmeeq-ai hel daiq phail nail tsaol-aq pevq nail ngaol. 11Yu bhai cavq bhiq cov bhiq nail tsaol-aq, Miqyail-i mail bhi cavq bhi cov lavq nail khe-ai cavq yaoq. Yu bhai tsao jao-ai nail tsaol-aq, Miqyail gaq bivq lavq nail khe-ai, tsao jao-ai bhiq yaoq. Al hai nl haq neq, Yeiqsul Khali bhaq da nee, yaoq phaq yaoq-ao nee nail lavqkhoel, yu Miqyail bhai tsiq eeq lal nail ngaol. Yeiqsul Khali nail kovtavq-ai seiqleiq khaoqsail khi bhaqaoq, nqmaq maqluv halyeel jiav dei-eiq. Aq miq.

Khali yaq pevq lal-a nail ngel-i mail, ya daq nail ganl

12Ngal mao ail gaiq-a nail aqtsaoq juq-ol, haq dee aoq dee dee nail phaq laonq daiq lal-u phao, noeq maq dov dai, thaq pevq-ail. Al neq, noeq-u maq dov heeq phaq-ail pevq nail phaq maq ngel-ail. 13Khali ya daq-a nail khe-ai, nul juq iqsanl ya daq-a nail ngel-i mail, lavqkhiq tsail yaoq. Al hai lavqkhiq tsail haq neq, aivq nail seiqleiq khaoqsail bhaq dol leevq-u phao, nul juq, a dai nee maq tsil lavqkhiq ya tsail nail ngaol. 14Khali nail aqmil bhaq da nee yu nul juq bhai khal ge movq ail ge lal haq neq, nul juq geeqlaoq eeq nail ngaol. Khul khi mail dai ngal-aq neq, seiqleiq khaoqsail eeq nail Miqyail nail Aqhaqlal nul juq nail kovtavq bhai jaol nail ngaol. 15Yu bhai lav heivq nail, yu nail nlmaoq khoiq nail, haqeiv nail phaq nl nail, yu bhai suq saq nail, niil juq bhaq da nee nul juq teevq gaq ail ya daq nail phaq, thaq bhi pevq. 16Thail hai ngaol-aoq, nul juq teevq gaq ga nav Khali yaq pevq nail ngel-i mail, ya daq-a nail phal-iq neq, thaq haq sil. Khali nail aqmil bhaq da nee Miqyail bhai tsiq eeq yaoq. 17Miqyail iqmoeq ilmoeq yalkhaq dal nail aqyanq kev lee aiq nail ngaol. Aivq aivq nail yaq juq bhai iqmoeq yalkhaq dal nail ngaol. Aivq ngadao bhai iqmoeq yalkhaq dal haq neq, Miqyail nail lavqkhiq tsail nail geeqlaoq daoq bhai maq nal daiq nail tsaol-aq nail haqbhoil, haoqnao nao saq-u phao khal hai pevq lal nail-aiq. 18Jal liq lavqkhoel bhai gevq-ai thaq nail khe-ai,

“Tsaq nail daol nail tsaol-aq

hevq kovq nail phaq

ya nail haq-a neq,

Miqyail bhai maq ev nail

oeqbal yaq juq khal hai khi

jel-ail nia nail-aiq” dai,

gevq-ai thaq nail ngaol.

19Al heel ngel-i mail, Miqyail neema tsaq nail khe-ai ya daq nail tsaol-aq, nul juq bhai teivq khi saljial ivq nail gaq nail aqlavq lavqkhoel bhai yovqgavq nail aqmaol av bhiq khi, aqmeeq phaq nl dal laivq yaoq.

Currently Selected:

1 Bheiqtuvluv 4: aeu

Highlight

Copy

Compare