1 Gaolliqthu 15
15
Khali gaoq doevq kovq lal-a nail ganl
1Aqivq jaqbheq juq-ol, ngaq-i mail nul juq bhai cavq bhiq-a nail lavqkhiq tsail nail geeqlaoq daoq al bhai, niil aq-il gaoq ge noeq bhiq nail ngaol. Nul juq geeqlaoq daoq al bhai hav bhoel khi al nail lavqkhoel-ai jaol ivq-ai thaq nail ngaol. 2Geeq laoq daoq al bhaq da nee, nul juq hevq kovq nail phaq ya nail ngaol. Thail hai ngaol-aoq, nul juq ngaq-i mail cavq-a nail daoq bhai neema thaq tsaol nail phaq ivq dao dai, maq aol haq neq, nul juq nail neema thaq tsaol nail phaq aqnieivq ail pevq-ail nail ngaol.
3Ngaq-i mail ya-ai thaq nail eeq dee dee nail ganl, ngal nul juq bhai bivq-a nail ngaol. Ganl al neq, Jal liq lavqkhoel bhai gevq-ai thaq nail khe-ai, Khali neq, ngadao nail oeqbal nail haqbhoil khanqsil-a nail ngaol. 4Luqdaol bhai duq pheeq-a nail ngaol. Jal liq lavqkhoel bhai gevq-ai thaq nail khe-ai, hail n kev lal-a ngal-aq neq, aivq doevq kovq lal-a nail ngaol. 5Aivq nail aqmaol Bheiqtuvluv bhai bivq moel gaq-al ngal-aq neq, gaqkhoel tsel-nvq gaq bhai bhi moel-a nail ngaol. 6A bhai nee ngal-aq, ngadao nail aqivq jaqbheq ngaq yal gaq jaiq dai bhai aivq nail aqmaol teevq pov bhi moel-a nail ngaol. Tsaol-aq al juq mao dai teevq pav, niil aq-il kev dai, aqdoevq doevq-ai haq nail ngaol. Thail hai ngaol-aoq, teevq pav ga nav juq neq, sil-aoq nail ngaol. 7A bhai nee ngal-aq, aivq nail aqmaol Yaqkov bhai bhi moel-a nail ngaol. Al nail haoqnaol phao taivq-ail gaqkhoel iqsanl bhai, aivq nail aqmaol bhi moel-a nail ngaol. 8Ngal neq, bhala aqheeq maq lovq nail yaqbeiv khe-ai dul khi ngaol-aoq, haoqnao nao saq khe pov aivq nail aqmaol ngaq bhai iqsanl bhi moel lavq-a nail ngaol.
9Ngal neq, gaqkhoel nail lavqkhoel yu nee maq tsil theq nail gaq ngaol. Miqyail nail Khali yaq munl bhai khoeq bhi jiovq bhiq daiq-a nail ngel-i mail, yu ngaq bhai gaqkhoel dai khul nail bhai, ngal maq geel-nvq-ail. 10Thail hai ngaol-aoq, ngal gaqkhoel jiovq thail thaiq nail neq, Miqyail nail geeqlaoq eel jaol bhaq da nee mail ngaol. Ngaq-i mail ya-a nail geeqlaoq niil aqnieivq ail maq ngel-ail. Gaq khoel yaoq juq yaoq nee maq tsil ngal ganl nl nail ngaol. Mal dil dai, ge haq neq, ngaq-i mail nl-a nail maq ngel-ail. Miqyail nail geeqlaoq eel jaol ngaq nail lavqkhoel bhai aol khi nl nail ngaol. 11Ganl al bhai, ngal maqkhaiq, aqyu juq maqkhaiq, cavq nail cov nail ngaol. Nul juq iqsanl ganl al bhai neema thaq tsaol lal-a nail ngaol.
Ngadao gaoq doevq kovq lal nail ganl
12Khali gaoq doevq kovq lal nail ngaol dai, nv juq daoq cavq cavq haq neq, sil nail tsaol-aq maq doevq kovq lal ail dai, nul juq teevq pav ga nav juq khul khi mail ge nail-aiq. 13Sil nail tsaol-aq maq doevq kovq lal haq neq, Khali iqsanl maq doevq kovq lal-ail. 14Khali maq doevq kovq lal-a nail nul neq, nv juq-i mail daoq cavq daoq cov cov nail neq, aqnieivq ngaol. Nul juq neema thaq tsaol nail iqsanl aqnieivq ngaol. 15Al taivq-ail maq ngel ail haq-al. Nv juq neq, Miqyail nail ganl maq tsaq nail salkhil khanq nail tsaol-aq ngaol. Khul khi mail dai ngal-aq neq, Miqyail Khali bhai bhi doevq kovq lal-a nail ngaol dai, nv juq Miqyail nail ganl salkhil khanq nail ngaol. Thail hai ngaol-aoq, sil nail tsaol-aq bhai mal dil maq bhi doevq kovq lal haq neq, Khali bhai iqsanl Miqyail maq bhi doevq kovq lal-ail. 16Sil nail tsaol-aq bhai maq bhi doevq kovq lal haq neq, Khali bhai iqsanl bhi doevq kovq lal-a nail maq ngel-ail. 17Khali maq doevq kovq lal-a nail kheel nul neq, nul juq neema thaq tsaol nail phaq aqnieivq ail pevq-ail khi, nul juq neq, nul juq nail oeqbal nail kov-uvq bhai jaol-ai haq nail ngaol. 18Al ovqtavq, Khali bhai neema thaq tsaol khi sil-a nail tsaol-aq juq iqsanl, luq ail seil ail gil nail ngaol. 19Ngadao aqdoevq doevq-u phao taivq-ail, Khali nail lavqkhoel bhai noeq thunq nail phaq ya-ail teevq-eel phal-iq neq, ngadao neq, tsaol-aq iqsanl nee maq tsil gaoq haq lal heeq phaq-ail pevq nail juq ngaol.
20Thail hai ngaol-aoq, Khali neq, mal dil doevq kovq lal-a nail ngaol. Aivq neq, sil-a nail tsaol-aq nail lavqkhoel khe iqmoeq ilmoeq doevq kovq lal-a nail gaq ngaol. 21Khul khi mail dai ngal-aq neq, tsaol-aq teevq gaq bhaq da nee, sil nail phaq kev lee-a nail khe-ai, tsaol-aq teevq gaq bhaq da nee doevq kovq lal nail phaq jiav lal-a nail ngaol. 22Tsaol-aq iqsanl mail, Aqdaq bhaq da nee sil-a nail ngaol. Al hai dul dai tsaol-aq iqsanl mail, Khali bhaq da nee doevq kovq lal nail ngaol. 23Tsaol-aq yaoq gaq yaoq-ao nee, yovqgavq nail aqyanq tsaq lal-u phao, doevq kovq lal nail ngaol. Khali neq, iqmoeq ilmoeq doevq kovq lal-a nail ngaol. Yaq hao Khali yavq kha lee-u phao, aivq nail tsaol-aq khal ngel nail juq doevq kovq lal nail ngaol. 24A bhai nee ngal-aq neq, haoqnao nao saq khe aqyanq kev lee nail ngaol. Aq-u phao Khali neq, maq moel kivq nail uv thaiq nail juq bhai maqkhaiq, niil yeel nail lavqkhoel aqnav-i mail uv thaiq nail juq bhai maqkhaiq, bhaqaoq eeq nail juq bhai maqkhaiq, gaq lai gaq haq neq, aivq-i mail uv thaiq nail aqkhaoq-anq juq Aqbhu Miqyail bhai av bhiq nail ngaol. 25Aivq bhai neejiav jiav nail juq iqsanl bhai Miqyail aivq nail aqkhil kov-uvq bhai bhi jaol-u phao kev dai, Khali ya uv thaiq nail ngaol. 26Aivq bhai neejiav jiav nail juq nail lavqkhoel khe, sil nail phaq bhai aivq haoqnao nao saq lav cov nail ngaol. 27Khul khi mail dai ngal-aq neq, “Miqyail neq, iqsanl bhai aivq nail aqkhil phaq yal kov-uvq bhai bhi jaol bhi jiav nail ngaol” dai, Jal liq lavqkhoel bhai gevq-ai thaq nail ngaol. Iqsanl mail dai, ge nail daoq al daoq nail lavqkhoel bhai, Miqyail maq kheq-ail. Aivq neq, iqsanl bhai Khali nail aqkhil kov-uvq bhai bhi jaol bhi jiav dai, nl nail gaq ngaol. 28Yaoq phaq yaoq-ao nee, Yaqyov nail kov-uvq bhai bhi jiav gaq haq neq, yaoq phaq yaoq-ao nee aivq nail kov-uvq bhai bhi jaol bhi jiav-a nail Miqyail nail kov-uvq bhai Yaqyov iqsanl jaol lai nail ngaol. Al heel ngel-i mail, Miqyail yaoq phaq yaoq-ao nee bhai uv thaiq gil nail ngaol.
29Sil nail tsaol-aq mal dil maq doevq kovq lal haq neq, khul khi mail tsaol-aq teevq pav ga nav juq sil-a nail tsaol-aq nail haqbhoil ulcuvq saol nail-aiq. Khul khi mail sil-a nail tsaol-aq nail haqbhoil ulcuvq ya saol nail-aiq. 30Khul khi mail nv juq iqsanl naqli yaoq lavq yaoq-ao nee, gee sil lal nail phaq bhai yaq daq nail ngel-ail. 31Aqivq jaqbheq juq-ol, ngadao nail Heeqphaq Yeiqsul Khali nail lavqkhoel nul juq bhaq da nee, ngal neema eeq duq mal dil ya nail khe-ai, yaoq n yaoq n nee sil nail phaq bhai iqsanl mal dil thaoq phuq nail ngaol. 32Tsaol-aq nail nee noeq neelov nee ya ge haq neq, niil aq-il Eilpheilsu meenq lavqkhoel-ai haqeiv nail jaiqyaq juq khe-ai dul nail juq nee ngal deeq pheel jaq haq neq, ngaq nail haqbhoil khul nail geeqlaoq bhao nail-aiq. Sil nail tsaol-aq juq bhai maq bhi doevq kovq lal nia nail phal-iq neq,
“Niaohao ya sil nail bhaq da nee
jaq tavq daol tavq bhel” dai,
gevq-ai thaq nail daoq al daoq, tsaq nail ngaol.
33Nul juq thaq noeq laiq dei-eiq. Tsaol-aq aqmeeq teevq gaq, maq meeq nail tsaol-aq nee aqtsaoq tsaoq haq neq, maq meeq ail pevq-ail nail ngaol. 34Noeq lal khi neema phal yaoq. Oeqbal thaq gaoq nl. Khul khi mail dai ngal-aq neq, nul juq nail lavqkhoel bhai jaol nail tsaol-aq teevq pav ga nav juq Miqyail bhai maq heeq nia-ail. Nul juq bhi haq sil nail dai khi, ngal niail hai ge nail ngaol.
Gaoq doevq kovq lal nail aqmaol nail ganl
35“Sil nail tsaol-aq khal hai khi doevq kovq lal nail-aiq. Doevq kovq lal-u phao, khalheel nail aqmaol” dai, nul juq teevq gaq ga nav nal daiq movq ail jaol-aq. 36Maq noeq dov nia nail tsaol-aq-ol, naoq-i mail kha-a nail aqiq maq sil haq neq, maq doevq lal nia-ail. 37Gov gov iq maq ngel haq neq, yaoq phaq yaoq-ao nail aqiq naol haiq-u phao, nul juq-i mail haiq-a nail al neq, aq neev teevq-eel ngaol. Doevq lal meeq lal thaq nail aqbhaol haiq-a nail maq ngel-ail. 38Miqyail neema tsaq nail khe-ai, aqiq bhai aqbhaol bhi bhaol lal nail ngaol. Aqiq yaoq phaq yaoq-ao nee bhai iqsanl, yovqgavq nail aqbhaol bhi bhaol lal nail ngaol. 39Haqjoil khal ngel nail juq, teevq phaq teevq-eel maq ngel-ail. Tsaol-aq nail haqjoil, jaiqyaq nail haqjoil, keivq-avq nail haqjoil, delgil nail haqjoil dai, al hai bhao nail ngaol. 40Nqtavq bhai tavq nail aqmaol juq jiav nail ngaol. Miltsaq bhai tavq nail aqmaol juq iqsanl jiav nail ngaol. Nqtavq bhai tavq nail aqmaol juq nail khaoqsail neq, teevq phaq ngaol. Miltsaq bhai tavq nail aqmaol nail khaoqsail iqsanl teevq phaq ngaol. 41Nl ma nail aqbhaq teevq phaq, bhala nail aqbhaq teevq phaq, aqgil nail aqbhaq teevq heeq nee, teevq heeq aqbhaq bhaq nail bheeq-n nail ngaol.
42Sil nail tsaol-aq doevq kovq lal nail neq, al hai dul nail ngaol. Duqpheeq-a nail aqmaol neq, buvq ail tsiq ail nail ngaol. Doevq kovq lal nail aqmaol neq, maq buvq maq tsiq ail yaoq-aol. 43Duqpheeq nail aqmaol neq, seiqleiq khaoqsail maq jiav-ail. Doevq kovq lal nail aqmaol neq, seiqleiq khaoqsail jiav nail ngaol. Duqpheeq nail aqmaol neq, gaq teevq peivq ail maq aol-ail. Doevq kovq lal nail aqmaol neq, gaq teevq bhee aol nail ngaol. 44Duqpheeq nail aqmaol neq, aqsivq haqjoil teevq-eel ngaol. Doevq kovq lal nail aqmaol neq, aqhaqlal nail aqmaol pevq lal nail ngaol. Aqsivq haqjoil nail aqmaol jiav haq neq, aqhaqlal nail aqmaol iqsanl jiav nail ngaol. 45Khul khi mail dai ngal-aq neq, “Tsaol-aq yaq pevq nail Aqdaq iqmoeq khe gaq bhai, aqdoevq bhi doevq nail haqbhoil teivq-ai thaq nail ngaol” dai, Jal liq lavqkhoel bhai gevq-ai thaq nail ngaol. Thail hai ngaol-aoq, haoqnao nao saq khe Aqdaq#15.45 Haoqnao nao saq khe Aqdaq neq, Yeiqsul pevq nail ngaol. yaoq gaq yaoq neq, aqdoevq bhi doevq nail phaq bivq nail aqheel pevq nail ngaol. 46Aqhaqlal bhai tavq nail doevq nail phaq iqmoeq jiav lee-a nail maq ngel-ail. Aqsivq haqjoil bhai tavq nail doevq nail phaq jiav lee khi pultavq, aqhaqlal bhai tavq nail doevq nail phaq jiav lee-a nail ngaol. 47Iqmoeq khe Aqdaq gaq neq, miltsaq nee teivq khi miltsaq nee pevq dov lal-a nail ngaol. Aqdaq nvq gaq teevq gaq neq, nqtavq kovtavq nee dov lee-a nail ngaol. 48Miltsaq bhai tavq nail tsaol-aq juq neq, miltsaq nee mail pevq dov lal-a nail gaq khe-ai dul nail ngaol. Nqtavq kovtavq bhai tavq nail tsaol-aq juq neq, nqtavq kovtavq nee dov lee-a nail gaq khe-ai dul nail ngaol. 49Ngadao neq, niil aq-il miltsaq nee pevq dov lal-a nail gaq nail aqmaol khe-ai dul nail aqmaol bhao nail khe-ai, yaqhao nqtavq kovtavq nee dov lee-a nail gaq nail aqmaol khe-ai dul dai, aqmaol bhao lal nail ngaol.
50Aqivq jaqbheq juq-ol, ngal nul juq bhai niail hai ge bhiq nail ngaol. Aqsivq haqjoil nail aqmaol neq, Miqyail Milkhaoq lavqkhoel bhai maq jaol lai nia-ail. Buvq ail tsiq ail nia nail phaq neq, maq buvq maq tsiq ail nia nail phaq nail lavqkhoel bhai maq aol lai nia-ail. 51Oil tsail-ai thaq nail daoq teevq daoq ngal nul juq bhai ge lavq bhel dei-eiq. Ngadao iqsanl mail ya sil nail maq ngel-ail. Ngadao iqsanl mail phal lal nail ngaol. 52Haoqnao nao saq khe nqbho jiiv-u phao, teevq yanq nee taivq-ail, maivneev maiv tav teevq tav nail lavqkhoel bhai taivq-ail ngadao iqsanl mail phal lal nail ngaol. Nqbho al jiiv lal-u phao, sil thaq nail tsaol-aq maq buvq maq tsiq ail nail lavqkhoel nee doevq kovq lal khi, ngadao iqsanl phal lal nail ngaol. 53Khul khi mail dai ngal-aq neq, buvq ail tsiq ail nia nail niil niai, maq buvq maq tsiq ail nia nail phaq-i mail aqgaq aqdoi doi nail khe-ai, ya doi nail ngaol. Sil nail phaq iqsanl, maq sil nia nail phaq-i mail aqgaq aqdoi doi nail khe-ai, ya doi nail ngaol. 54Buvq ail tsiq ail nia nail niil niai, maq buvq maq tsiq ail nia nail phaq-i mail aqgaq aqdoi doi nail khe-ai doi khi, sil nail phaq iqsanl, maq sil nia nail phaq-i mail aqgaq aqdoi doi nail khe-ai doi gaq-u phao, Jal liq lavqkhoel-ai gevq-ai thaq nail daoq niil daoq bheeq lal nail ngaol:
“Gaq lai nail phaq neq,
sil nail phaq bhai
moevq bhoel-aoq nail ngaol.
55Sil nail phaq-ol,
naoq-i mail gaq lai-a nail
phaq neq, khaq.
Sil nail phaq-ol,
naoq nail
dovq neq, khaq” dai,
gevq-ai thaq nail ngaol.
56Bhiq sil nia nail dovq neq, oeqbal ngaol. Oeqbal nail bhaqaoq neq, aoldaoq kovqdaoq ngaol. 57Thail hai ngaol-aoq, ngadao nail Heeqphaq Yeiqsul Khali bhaq da nee, ngadao bhai bhi gaq lai lavq-a nail Miqyail bhai tsiq eeq bhel. 58Al heel ngel-i mail, ngal mao ail gaiq-a nail aqivq jaqbheq juq-ol, gaq maq bhaq mail, ivq dao dai thul phaol nail lavqkhoel nee, Miqyail nail ganl bhai lai jai lai jai ail nl yaoq. Khul khi mail dai ngal-aq, nul juq Miqyail nail haqbhoil nl nail hal nail neq, aqnieivq ail maq ngel ail dai, heeq kivq yaoq.
Currently Selected:
1 Gaolliqthu 15: aeu
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
