Mattá 26
26
Issáay koshagay pandal o sázesh
(Markás 14:1–2; Luká 22:1–2; Yuhanná 11:45–53)
1Wahdé Issáyá é habar halás kortant, gón wati moridán gwashti: 2“Shomá wassha zánét ke do róchá rand Sargwazay Aida#26:2 Eshiá Sargwazay Aid paméshká gwashant ke, cha Mesriáni chérdastiá Yahudiáni ázátiay wahdá, markay préshtag cha Yahudi chokkáni koshagá sar gwast. bit o Ensánay Chokk pa salib kasshagá geráénaga bit.” 3Hamé wahdá, mazanén dini péshwá o kawmay kamáshán, masterén dini péshwá Kayápáay márhiá diwán kort o 4é pandal jórhént ke Issáyá pa yakk repk o honaré begeráénant o bekóshárénant. 5Bale gwashtesh: “Aiday róchán na, chosh mabit ke mardom áshóp bekanant.”
Janéné Issáyá atra moshit
(Markás 14:3–9; Yuhanná 12:1–8)
6Wahdé Issá Bayt-Anyáyá hamá Shamunay lógá at ke cha jozámay nádráhiá dráh butagat, 7yakk janéné gón sengmarmarén atrdánéá ke gránbaháén atri mán at, Issáay gwará átk. Issá parzónagay sará neshtagat o hamódá Issáay sari atr per mosht. 8Gón é káray gendagá, Issáay morid delá nawassh butant ke “Chéá é atr zawál kanag but? 9Agan é bahá kanag butén, mazanén zarré rasetagat o garib o nézgárán dayag butagat.” 10Issáyá moridáni é nawasshi sarkech wárt, paméshká gwashti: “Chéá shomá é janéná ranjénagá ét? Eshiá gón man nékié kortag. 11Garib o nézgár modám shomay kerrá hast, bale man harwahd gón shomá gón naán. 12É janén pésh kaptag o pa mani kabr kanagay tayáriá, maná atri per moshtag. 13Shomárá rásténa gwashán, sajjahén donyáyá, har kondhé ke mani wasshén mestág jár janaga bit, é janén o eshiay kár ham yát kanaga bit.”
Yahudá wahd o móhéay shóházá ent
(Markás 14:10–11; Luká 22:3–6)
14Randá cha dwázdahén moridán yakké, ke námi Yahudá Eskaryuti at, mazanén dini péshwáyáni kerrá shot o 15gwashti: “Agan man Issáyá shomay dastá bedayán, shomá maná ché dayét?” Áyán si nograhén korsh#26:15 Asligén Yunáni nebeshtánka gwashit: “si árguriá”. Korsh Balócháni kwahnén zarr ent. hesáb kort o áiay dastá dát. 16Cha hamá wahdá o rand, Yahudá pa Issáay áyáni dastá dayagá gwam o gégén wahd o móhéay shóházá at.
Sargwazay Aiday tayári
(Markás 14:12–21; Luká 22:7–14; Yuhanná 13:21–30)
17Béhomirén Naganay Aiday#26:17 Béhomirén Naganay Aid, Sargwazay Aidá rand hapt róchay tahá geraga bit. awali róchá, moridán cha Issáyá jost kort: “Ché lóthay, Sargwazay Aiday shámay tayáriá kojá bekanén ke taw bwarayi?” 18Áiá passaw dát: “Shahrá berawét o pelán mardomá begwashét ke ‘ostáda gwashit, mani wahd nazzikk ent, mani dela lóthit gón wati moridán Sargwazay shámá tai lógá bwarán.’” 19Gorhá moridán Issáay gwashagay sará Sargwazay shám tayár kort.
20Bégáh ke but, Issá gón wati dwázdahén moridán parzónagay sará neshtagat. 21Waragay wahdá áiá gón moridán gwasht: “Báwar kanét, cha shomá yakké maná dróhit o dozhmenáni dastá dant.” 22Morid báz paréshán o deltaparkah butant o bárig bárigá cha áiá jost kanagá laggetant: “Oo Hodáwand! Man wa naán, na?” 23Áiá passaw tarrént: “Á ke annun gón man hamkásag but, hamá maná dróhit.” 24Hamá dhawlá ke nebisag butag, Ensánay Chokk cha é donyáyá rawagi ent, bale bazhn o apsóz pa hamáiá ke Ensánay Chokká dróhit. Pa áiá sharter at ke hechbar cha mátá pédá mabutén. 25Gorhá Yahudáyá, hamá ke Issái dróhagi at, gwasht: “Oo ostád! Man wa naán, na?” Issáyá passaw dát: “Taw wat gwasht.”
Goddhi shám
(Markás 14:22–26; Luká 22:15–20; Korentiáni Awali Kágad 11:23–25)
26Wahdé shám waragá atant Issáyá nagané zort, Hodáay shogri gept, chondh chondh kort o moridáná dáti. Gwashti: “Bezurét o bwarét, é mani jesm ent.” 27Padá jámé zorti, Hodáay shogri gept, moridáná dát o gwashti: “Shomá sajjahén cha eshiá benóshét. 28É mani ahd o karáray hón ent, ke pa bázénéay gonáháni bakshagá réchaga bit. 29Man shomárá gwashán, nun dega baré anguray dahl o samará nanóshán, hamá róchá padá nósháni ke wati Petay bádsháhiá, gón shomá hóra bán.” 30Hodáay sepat o sanáyá#26:30 Bezán Zabur 115–118. rand, dém pa Zaytunay kóhá ráh geptant.
Petrosay enkáray péshgói
(Markás 14:27–31; Luká 22:31–34; Yuhanná 13:36–38)
31Gorhá Issáyá gón moridán gwasht: “Shomá sajjahén, hamé enshapi thagala warét o maná yalaha kanét, chéá ke nebisag butag: Man shepánká janán o ramagay pas sheng o shánga bant.#26:31 Zakaryá Nabiay Ketáb 13:7. 32Bale zendag bayag o jáh janagá rand, cha shomá pésar Jalilá rawán.” 33Gorhá Petrosá darráént: “Agan sajjahén thagal bwarant o tará yalah bedayant, man hechbar thagala nawarán.” 34Issáyá gwasht: “Tará rásténa gwashán, hamé enshapi cha korósay bángá pésar, mani pajjáh áragá say randá enkára kanay.” 35Bale Petrosá gwasht: “Agan gón taw mani sar ham berawt, cha tai pajjáh áragá hechbara nabajján.” É dega sajjahén moridán ham anchosh gwasht.
Issáay dwá
(Markás 14:32–42; Luká 22:39–46)
36Randá Issá gón wati moridán Jetsimáni námén jágahéá shot o gón áyán gwashti: “Hamedá bedárét, man kammé démterá rawán o dwá kanán.” 37Zebdiay doén chokk o Petrosi wati hamráh kortant. Anágat yakk mazanén andóh o bétáhirié#26:37 Bétáhiri, bezán béárámi, békarári. áiay jesm o jáná nesht. 38Gón áyán gwashti: “Sakk paréshán án, gam o andóhán maná markig kortag, shomá edá bedárét, mawapsét o mani hamráhiá ágah o hozzhár bét.” 39Randá kammé démterá shot, dém pa chér kapt o dwá kanáná gwashti: “Oo mani Pet! Agan buta kant, cha man é sakkiáni jám o pyálahá bethagalén, bale á dhawlá na ke mana lóthán, hamá dhawlá ke taw lóthay.”
40Wahdé per tarret o wati moridáni kerrá átk, disti ke á wáb ant. Gón Petrosá gwashti: “Nabut yakk sáhaté ham gón man ágah bemánét? 41Hozzhár bét o dwá kanét tánke ázmáesh o chakkásá makapét. Ruh, tayár o morádig ent, bale jesm nezór o nátwán.” 42Domi bará pa dwá kanagá shot o dwái kort: “Oo mani Pet! Agan é pyálah bé nóshagá cha man thagalénaga nabit, gorhá harché ke tai razá ent hamá dhawlá bebit.” 43Wahdé per tarret, disti padá wáb ant. Áyáni chamm rohézag#26:43 Rohézag, bezán wábá porr. o wábénag atant. 44Yalahi dátant o sayomi randá padá pa dwá kanagá shot o hamá dwái kort. 45Gorhá moridáni kerrá per tarret o gwashti: “Angat ham waptag o árám kanagá ét? Nun á wahd o sáhat nazzikk ent ke Ensánay Chokk dróhag o gonahkáráni dastá dayaga bit. 46Pád áét berawén. Á ke maná dróhit, pédák ent.”
Issáay dazgir kanag
(Markás 14:43–50; Luká 22:47–53; Yuhanná 18:3–12)
47Issá angat habará at ke cha dwázdahén moridán yakké, bezán Yahudá, átk o raset. Áiá mazanén rombé hamráh at ke zahm o latthesh gón at. É romb, cha mazanén dini péshwá o kawmay kamásháni némagá ráh dayag butagat. 48Issáay dróhóká#26:48 Dróhók, bezán hamá ke wati hamráhá rada dant o bahá kant. áyáná é nesháni dátagat: “Hamáiá ke mana chokkán, Issá hamá ent. Áiá dazgir kanét.” 49Gorhá Yahudá tachkátachk Issáay kerrá átk o gwashti: “Oo ostád! Salám o drót!” Randá Issái chokket. 50Issáyá gwasht, “Oo hambal! Pa hamá kárá ke átkagay, bekani.” Gorhá démá átkant, Issáesh gept o dazgir kort. 51Hamá damáná, Issáay hamráhán yakkéá wati zahm kasshet o masterén dini péshwáay nawkaray góshi sest. 52Issáyá gón áiá gwasht: “Wati zahmá jotká#26:52 Jotk, bezán zahm yá kárchay jeld, pósh, nyám. kan. Á kas ke zahma kasshit, cha zahmá merit. 53Záná, taw nazánay agan cha wati Petá belóthán, á pa mani komakká hamé annun dwázdah lashkará#26:53 Asligén Yunáni nebeshtánka gwashit: “dwázdah ligiun”. Har ligiuná 6000 sepáhig hastat. géshter préshtag ráha dant. 54Bale gorhá Pákén Ketábáni nebeshtagén hamá habar ke báyad ent sarjam bebant, chón pa sara rasant?” 55Nun démi mardománi mocchiay némagá tarrént o gwashti: “Záná man yági o rahzané án ke shomá gón zahm o latthán pa mani geragá átkagét? Man har róch mazanén parasteshgáhá neshtag o mardom dars o sabakk dátagant o shomá maná nageptag. 56Bale é paymá paméshká but ke Nabiáni Ketábáni péshgói, rást o paddar bebant.” Gorhá sajjahén moridán á yalah dát o jestant.
Issá, sarókáni diwáná
(Markás 14:53–65; Luká 22:54–55, 63–71; Yuhanná 18:13–14, 19–24)
57Issáay dazgir kanókán, Issá zort o masterén dini péshwá Kayápáay kerrá bort ke ódá Sharyatay zánóger o kawmay kamásh mocch atant. 58Petros ham dur durá, Issáay randá rawán at tán masterén dini péshwáay lógay péshgáhá raset, tahá potert o gón hezmatkárán nesht tán bezánt ke chónén shawré borraga bit. 59Mazanén dini péshwá o sarókáni diwánay sajjahén básk,#26:59 Básk, bezán ozw, membar. pa Issáay markay sezá dayagá drógén sháhediay shóházá atant, 60chónáhá bázén drógén sháhed pa gwáhi dayagá pád átk, bale hecchesh dastá nakapt. Godhsará do mardom démá dar átk o 61gwashtesh: “É mardá gwashtag ke ‘man Hodáay parasteshgáhá próshta kanán o say róchá padá bandáni.’” 62Gorhá masterén dini péshwá pád átk o cha Issáyá josti kort: “Tai bárawá chónén sháhedi dayagá ant? Esháni hecch passawa nadayay?” 63Bale Issáyá passaw nadát. Masterén dini péshwáyá padá gón áiá gwasht: “Man tará namiránén Hodáay sará sawgenda dayán, márá begwash, bárén, taw hamá Masih, Hodáay Chokk ay?” 64Issáyá darráént: “Taw wat gwasht. Bale shomá sajjahénán hála dayán, démterá gendét ke Ensánay Chokk zóráwarén Hodáay rástén némagá neshtag. Cha ásmánay jambaráni sará ham kayt.” 65Gorhá masterén dini péshwáyá wati gwaray jámag dert o gwashti: “Eshiá kopr kort, angat ham márá sháhed pakár ent? Shomá eshiay kopr wat eshkot. 66Nun shomay shawr o saláh ché ent?” Áyán passaw dát: “Eshiay sezá mark ent.” 67Randá áyán Issáay dap o démá tokk jat#26:67 Tokk janag, bezán toh janag. o lahténá mosht o shahmát ham jat. 68Nun gwashtesh: “Oo Masih! Pa má paygambari kan o begwash tará kayá jat.”
Petrosay enkár
(Markás 14:66–72; Luká 22:56–62; Yuhanná 18:15–18, 25–27)
69Á wahdá Petros dhanná péshgáhá neshtagat, móledé áiay kerrá átk o gwashti: “Taw ham Jalili Issáay hamráh butagay.” 70Bale áiá sajjahénáni démá namannet o gwashti: “Mana nazánán taw ché gwashagá ay.” 71Wahdé dém pa mazanén darwázagá rawagá at, dega móledéá dist o gón mardomán gwashti: “É mard Issá Náseriay hamráh butag.” 72Petrosá sawgend wárt o domi randá namannet o gwashti: “Man é mardá nazánán.” 73Damánéá rand, ódá óshtátagén mardom Petrosay kerrá átkant o gwashtesh: “Allamá taw cha hamáyán ay, cha tai gálwárá anchosh jáha kayt.” 74Petrosá pa nálaté sawgend wárt o gwasht: “Man é mardá nazánán.” Hamá damáná korósá báng dát. 75Gorhá Petros yátá kapt ke Issáyá gwashtagat: “Korósay bángá pésar, taw say randá mani pajjáh áragá enkára kanay.” Nun dhanná dar átk o sakk gréti.
Currently Selected:
Mattá 26: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.