زَبور 23

هُداوند منی شپانک اِنت

داوودئے زَبور.

1 هُداوند منی شپانک اِنت،

هچ چیزّئے مهتاجَ نبان.

2منا سرسبزێن چَراگاهانَ واپێنیت و

په آرامێن آپان سرَ کنت.

3منی اَرواها تازگَ کنت و

په وتی نامئیگی پهرێزکاریئے راهان منا دێما بارت.

4اگن چه مرکئے تهارترێن شێپ و دَرَگان هم بگوَزان

چه هچ بیمّ و بلاها نترسان،

چیا که تئو گۆن من گۆن ائے،

تئیی لٹّ و اَسا منا تسلّا بَکشیت.

5دژمنانی چمّانی دێما پَرزۆنگے په من پَچَ کنئے،

په شَرَپ دئیگا منی سَرَگا ٹێلَ جنئے و

منی جاما مُدام پُرّ کنان ائے.

6اَلّما، مِهر و نێکی زِندئے سجّهێن رۆچان منی پد و رندا اَنت و

هُداوندئے کلاتا جهمنندَ بان، تان اَبد.

Currently Selected:

زَبور 23: HPKB

Highlight

Copy

Compare

Want to have your highlights saved across all your devices? Sign up or sign in