مَتّا 17

ایسّائے دێم و دْرۆشمئے دْرپشناکی

(مَرکاس 9‏:2‏–13؛ لوکا 9‏:28‏–36)

1شَش رۆچا رَند، ایسّایا پِتْرُس و آکوب و آییئے برات یوهَنّا همراه کرتنت و بُرزێن کۆهێئے سرا برتنت که اۆدا دگه کَسّ مبیت. 2اۆدا آیانی دێما ایسّائے رنگ و دْرۆشم بدل بوت. آییئے دێم چۆ رۆچا دْرپشناک و پۆشاک چۆ نورا اِسپێت بوتنت. 3همے وهدا آیانی دێما موسّا و اِلیاس زاهر بوتنت و گۆن ایسّایا هبر کنگا لگّتنت. 4پِتْرُسا گۆن ایسّایا گوَشت: ”او هُداوند! مئے اِدا بئیگ سکّ شَرّ اِنت، اگن تئیی رَزا ببیت، من همِدا سئے ساهگ و کاپارَ#17‏:4 کاپار، کاپَر، کَپَر. بندان، یکّے په تئو، یکّے په موسّایا و یکّے په اِلیاسا.“ 5آ همے هبران اَت که دْرپشناکێن جمبرے#17‏:5 جَمْبَر، بزان اَبر. آیانی سرا ساهێل بوت. چه جمبرا تئوارے آتک: ”اے منی دۆستیگێن بَچّ اِنت، چه اِشیا من سکّ وشّ و رَزا آن، اِشیئے هبران گۆش بدارێت.“ 6مُریدان که اے تئوار اِشکت، دلتْرکّ بوتنت و دێم په چێر کپتنت. 7ایسّا آیانی کرّا آتک، دستی پِر کرتنت و گوَشتی: ”پاد آێت، متُرسێت!“ 8وهدے آیان چمّ چِست کرتنت، اَبێد چه ایسّایا دگه کَسِّش ندیست.

9چه کۆها اێر کپگئے وهدا ایسّایا آ هُکم داتنت: ”تان هما وهدا که انسانئے چُکّا چه مُردگان جاه نجتگ#17‏:9 جاه جنَگ، بزان چه وتی جاها یکدم پاد آیگ، زندگ بئیگ، چست بئیگ.، وتی اے دیستگێن چیزّانی بارئوا هچکَسا هال مدئیێت.“ 10مُریدان جُست کرت: ”گُڑا شَریَتئے زانۆگر چێا گوَشنت که مَسیهئے آیگا پێسر، باید اِنت اِلیاس نبی بیئیت؟“ 11پَسّئوی دات: ”بێشکّ، اِلیاسَ کئیت و سجّهێن کاران گوَم و گێگَ کنت. 12بله من شمارا گوَشان، اِلیاس وَه آتک، بله آیان پَجّاه نئیاورت و هرچے که آیانی دلا لۆٹت، گۆن آییا کرتِش. همے پئیما انسانئے چُکّا هم چه آیانی دستا سکّی و سۆری سَگّگی اِنت.“ 13نون مُریدان زانت که آ پاکشۆدی دئیۆکێن یَهیائے بارئوا هبرا اِنت.

جِنّی بچکّێئے دْرهبکشی

(مَرکاس 9‏:14‏–29؛ لوکا 9‏:37‏–42)

14وهدے ایسّا و سئیێن مُرید مردمانی مُچّیئے کرّا آتکنت، مردے ایسّائے گوَرا آتک، کۆنڈان کپت و گوَشتی: 15”او واجه! منی چُکّئے سرا بزّگ کن، آییا مَریئے نادْراهی گۆن اِنت و سکّ اَزابی کرتگ، باز برا آسا کپیت و باز برا آپا. 16من تئیی مُریدانی کِرّا آورت، بله آیان دْراه کرت نکرت.“ 17ایسّایا گوَشت: ”او بێباوَر و گُمراهێن نَسل و پَدرێچ! من تان کدێنا گۆن شما بمانان؟ تان چینچُک وهدا شمارا بِسَگّان؟ چُکّا اِدا منی کِرّا بیارێت.“ 18ایسّایا جِنّ هَکّل دات، جِنّ در آتک و بچکّ هما دمانا دْراه بوت.

19رَندا مُرید اِهوَتا#17‏:19 اِهوتا، بزان دگه کَسے سهیگ مبیت. ایسّائے گوَرا آتکنت و چه آییا جُستِش کرت: ”ما چێا آ جِنّ کَشّت نکرت؟“ 20ایسّایا پَسّئو دات: ”شمئے ایمانئے نِزۆریئے سئوَبا. شمارا راستێنَ گوَشان، اگن شمئے ایمان اَرزُنێئے کِساسا#17‏:20 اَسلیگێن یونانی نبشتانکَ گوَشیت: ”ٹێلکاهئے تُهمئے کِساسا.“ ٹێلکاهئے تُهم باز گوَنڈ اَنت. هم ببیت، شما گۆن اے کۆها گوَشتَ کنێت که چه اِدا بکِنز و اۆدا برئو و کۆهَ کِنزیت. هچّ چیزّ په شما نبوتنیَ نبیت. 21بله اے ڈئولێن جِنّ، اَبێد چه دْوا کنگ و رۆچگ دارگا، دگه وڑا کَشّگَ نبنت.“#17‏:21 لهتێن دَزنبشتا بَند 21 نێست‌اِنت.

ایسّائے مَرکئے دومی پێشگۆیی

(مَرکاس 9‏:30‏–32؛ لوکا 9‏:43‏–45)

22وهدے مُرید جَلیلا یکجاه بوتنت، ایسّایا گۆن آیان گوَشت: ”انسانئے چُکّ دْرۆهگَ بیت و اَنچێن مردمانی دستا دئیگَ بیت 23که آییا کُشنت، بله سئیمی رۆچا آ زندگَ بیت و جاهَ جنت.“ چه اے هبران مُرید سَکّ گمیگ بوتنت.

مزنێن پرستشگاهئے سُنگ و مالیات

24وهدے ایسّا و آییئے مُرید کَپَرناهوما آتک و رَستنت، گڑا مزنێن پرستشگاهئے سُنگی و مالیاتگیر پِتْرُسئے کِرّا آتکنت و جُستِش کرت: ”شمئے استاد مزنێن پرستشگاهئے سُنگا ندنت؟“ 25پَسّئوی دات: ”هئو، دنت.“ وهدے پِتْرُس لۆگا آتک، ایسّایا چه آییئے گپّ جنگا پێسر همے جُست کرت: ”او شَمون!#17‏:25 پِتْرُس هما شَمون اِنت؛ بچار مَتّا 10‏:2. دنیائے بادشاه چه کئیا سُنگ و مالیاتَ گرنت؟ چه وتی چُکّان یا چه دگران؟“ 26پَسّئوی دات: ”چه دگران.“ ایسّایا گوَشت: ”گڑا چُکّان دئیگَ نلۆٹیت. 27بله نون اے کارا بکن که آ دلا مئیارنت. مَزَن‌گوَرما برئو و نَهیگے#17‏:27 نَهیگ کَسانُکێن آسِنے، کِرمے بندنتی و په ماهیگئے گِرگا آپا دئوریَ دئیَنت. آپا دئور دئے، هما ماهیگ که پێسرا نهیگا جنت، آییئے دپا پَچ کن، یکّ چارکلداری#17‏:27 اَسلیگێن یونانی نبشتانکَ گوَشیت: ”سْتاتِر“، بزان چار دِرهَم. زَرّے گِندئے، همِشیا بزور و منی و وتی سُنگا پُرّ کن.“

Currently Selected:

مَتّا 17: HPKB

Highlight

Copy