Matayo 1
NTN62
1
Esyondengo sya Yosefu iba wa Maria
1Ekitabu kyesyondengo sya Yesu Kristo, mugala wa Dawidi, mugala wa Abrahamu.
2Abrahamu abya ise wa Isaka, na Isaka abya ise wa Yakobo, na Yakobo abya ise wa Yuda na bagala babo, 3na Yuda abya ise wa Parezi na Zera uku Tamari, na Parezi abya ise wa Hesironi, na Hesironi abya ise wa Ramu, 4Ramu abya ise wa Aminadabu, na Aminadabu abya ise wa Nasoni, Nasoni abya ise wa Salmoni, 5Salmoni abya ise wa Boazi uku Rahaba, Boazi abya ise wa Obedi uku Ruta, Obedi abya ise wa Yese, 6Yese abya ise womwami Dawidi. Dawidi abya ise wa Solomono okwoyo wabya mukali wa Uria, 7Solomono abya ise wa Reheboamu, Reheboamu abya ise wa Abiya, 8Abiya abya ise wa Asa, Asa abya ise wa Yosafati, Yosafati abya ise wa Yoramu, Yoramu abya ise wa Uzia, 9Uzia abya ise wa Yotamu, Yotamu abya ise wa Ahazi, Ahazi abya ise wa Hezekia, 10Hezekia abya ise wa Manase, Manase abya ise wa Amoni, Amoni abya ise wa Yosia, 11Yosia abya ise wa Yekonia na bagala babo, oko mugulu werihumiribwa eBabeli.
12Nenyuma werihumiribwa eBabeli: Yekonia abya ise wa Saltieli, Saltieli abya ise wa Zerubali, 13Zerubali abya ise wa Abihudi, Abihudi abya ise wa Eliakimu, Eliakimu abya ise wa Azoro, 14Azoro abya ise waSadoki, Sadoki abya ise wa Akimu, Akimu abya ise wa Elihudi, 15Elihudi abya ise wa Eleazari, Eleazari abya ise wa Matani, Matani abya ise wa Yakobo, 16Yakobo abya ise wa Yosefu iba wa Maria oyo wabuta Yesu, oyu kahulawa mo Kristo.
17Ritya esyondengo syosi eritsuka ku Abrahamu erihika uku Dawidi ni ndengo ikumi nini, neritsuka uku Dawidi erihika okwihumiribwa eBabeli ni ndengo ikumi nini neritsuka okwihumiribwa eBabeli erihika uku Kristo ni ndengo ikumi nini.
Eributwa rya Yesu
18Eributwa rya Yesu Kristo ko ryabya ritya. Koyo wuwe ye Maria iniamabisimolibwa na Yosefu, isiariamuherukya mwaminyikala kwobukule bweKirimu Kibuyirire; 19Yosefu iba wuwe, kusangwa abya mundu atunganene isianzire erimwita esisoni, mwaminya kwakandimuhiga bubi-sobiso. 20Nikwa abere anemoganirya emyatsi eyi, lebaya, omulaika woMukama mwamuhulukira omo nzoli, mwamubwira ati, Yosefu, mugala wa Dawidi, sigubahe eriherukya Maria mukali wawe, kusangwa obukule buwe ni bweKirimu Kibuyirire; 21asyabuta omugala, mwasyaluka erina riwe mo Yesu, kusangwa asyalamya abandu buwe okwebibi byabo. 22Ebyosi ebi byamabibya bibererere ebyabugawa noMukama omwisi womuminyereri ati:
23Lebaya, omukondo asyaheka obukule, asyabuta mugala,
Nerina riwe ryasyahulwa omo Emanueli
(eribindula ryo riti, Mungu haguma netu).
24Yosefu abere abuka omo tugotseri, mwakola ngoko omulaika woMukama amutegeka; mwaherukya mukaliwe, 25nikwa mwatamuminya erihika aho abutira mugala; mwaluka erina riwe mo YESU.