Romanos 6

Jesus ikũwaĩ nũ naxiarã, nũ habe mawa keskakiaki, na hãtxarã

1Hanua yurabũ txakabuwakĩ Deusũ yusĩa txibãkubainabumawenã, nukunã ha xinãma yuikĩ hatũ Deus pepabia kemaĩ hau ana shabakabi hawẽ duapahaira nuku uĩmanũ nukubunã, txakabuwakĩ heneyamakubainãkãpa? 2ikĩ haskakiri xinaĩ hãtxatimahairaki. Hakia tsuara ma mawa maiwabu ana txakabuwatirubuma keskakĩ Satanásã parãti hãtxa txibãma dasibi nũ Jesus Cristo txibaĩbũ nukũ txakabu henetã nũ ana txakabuwẽ hiwekũkaĩtirubumaki. 3Haska inũ, Jesus Cristo nũ ikũwãkubainaya yura betsã nuku naximaburã, Jesuski nũ dasia habe mawani keska Deusũ nukukiri pe xinãmis matunã, mã unãmamẽ? 4Ha inũ, nuku naximaburã, Cristobe nũ mawa keska nuku habe maiwanibu keskakẽ nukũ xinã txakabu putai nũ hiwei benashanũ hawẽ Epa kuxipatũ Jesus Cristo bestẽwani keska wakĩ hiwea bena betsahairawakĩ nuku bestẽwã keska wamiski.

5Nuku naximabu Cristoki dasia nũ habe mawani keska ana Cristo besteni keskairã, hiwea benawẽ nũ hawẽ hiwekũkainaii. 6Ha dukũ nũ hawẽ hiwetxakani sheni Cristobe cruzki netãtã nũ habe mawani keskaki. Nũ haskaya nukũ xinã sheni Deusũ nuku betsa wamakẽ txakabũ nuku beshetã hawẽ tsumawakĩ ana nuku yunutirumaki. 7Hanua tsuara mawakenã, ana haskatã shanẽ ibukĩ txakabũ tsumawatã yunutirumaki. 8Nukuburã, Cristobe nũ ma mawani keskawẽ taea txanima dateama nũ habe ana hiwekuĩkũkaĩshanai nũ unaiĩ. 9Ha inũ, Cristo mawatã ana besteni ana mawatiruma nũ unãriaii. Ha yushĩ parananãmistũ ana tenãkĩ maemakĩ ana binutirumahairaki. 10Ha inũ, Cristo bestiwai mawakĩ dasibibũ txakabu betsa betsapa binu keyuniki. Natiã hawẽ hiweawẽ Deus besti duawanũ ika habe hiwekũkainikiki. 11Haskawẽ taea matũri xinã bena wai mawa keskatã dasibi txakabu henebaini Jesus Cristoki dasitã Deus benimawanũ ika haskakiri besti xinaĩ hiwekubaĩkãwẽ.

12Haskakẽ matũ xinã txakabu kemuwẽ hau matu tsumashũ hamapai betsa betsapa txakabuwẽ hau ana matu niniyamanũ nemakubaĩkãwẽ, ana ha uĩ mã kemuai txibãmarã. 13Haska inũ, matũ yura ana txakabu tsumawamayamakãwẽ, ha hamapaiwẽ nukũ yura hawẽ txakabu watimakirã. Eska wakinã, matũ xinã pe mekekĩ matũ yura hirabi Deus inãkĩ mekemariakubaĩkãwẽ. Ha inũ, yurabu mawatã ana besteã keskatã matũ yura pe mekekĩ matũ hiwea Deus inãtã pepashũkubaĩkãwẽ, matũ yura hirabiwẽ Deus duawakinã. Hawa kaneama ha bebũshũ pepakĩ akubaĩkãwẽ. 14Mã Cristo ikũwãyã Deusũ matu pepawaiwẽ taeshũ txakabũ matu ana beshetã tsumatirumaki. Haska inũ, Deus duawanũ, iwanã, hawẽ yunuti inũ hawẽ nemati Deusũ Moisés yusĩniwẽ matu ana mekeamaki. Hakia Deus duapatũ matu ma mekeikiki, mã hawẽ daya akaiburã.

Txakabu henebaĩ pepatikiaki, na hãtxarã

15Haskai hariri hãtxamisbumẽ? eska yuirã: “Haskakenã, Deusũ nukũ shenipabu hawẽ hãtxa yusĩnitũ nuku ana tsumama hakia hawẽ bake nũ ikũwaĩwẽ taeshũ nuku duawakĩ nukũ txakabu buashanairã, nũ txakabuwairã, hawamaki. Hamapai txakabu betsa betsapa anãkãwẽ”, iki mã yuinamemisrã, haskatimahairaki. Matu yusĩnũ nĩkakãwẽ. 16Yura betsã yura betsa tsumawamakĩ inã hanushũ hawẽ shanẽ ibu ha besti hau dayashũkĩ hawẽ yunua besti ashũmisrã, mã unaiĩ. Hakia habiaskari wakĩ matũ txakabũ matu tsumawakẽ haskai ha txakabu txibaĩ mã hawẽ mawa kayabi mã benushanaii. Hakia haska binumakĩ Deus mã nĩkakĩ txibaĩ hawẽ haibuaibu matu wakĩ hiwekuĩmakĩ hawenabu matu washanikiki. 17-18Ha dukũ txakabũ matu tsumawakĩ taewaniki. Hanushũ Deusũ matu merabewaya nũ matu yusĩkubaina nĩka pewatã matũ huĩti hirabiwẽ matu yusĩaĩbu mã ikũwãniki. Natiã ana txakabu dayashunama hanua kaĩkaĩ Deus dayashũkĩ pe besti mã ashũkubainaii. Matu mã haskai nĩkai huĩti xinã txãkãkĩ Deus ẽ kẽhairawakubainaii. 19Ha inũ, dasibi mã tapĩ keyuriamakẽ matu shabakabi yusĩkĩ hãtxa bikamawẽ matu yusĩnũ nĩkakãwẽ. Hawara txakabu pepama Deusũ danãmis betsa betsapa anũ ika hawẽ kemui matũ yurawẽ txakabu irumai mã atimapakũkainiki. Hakia habiaskari wakĩ matũ yura Deus inãtã pepakĩ Deus dayashũkubaĩkãwẽ, hawẽruai pepakinã. Haska wakĩ matũ txakabu putai tari meribi pashkatã mã pe besti hiwekũkaĩshanaii, Deusunabuirã.

20Haska inũ, txakabũ matu tsuma wayukenã, Deusũ haska abuai xinãma mã hiwekũkainiki. 21Hawẽ haskati mã ikũkainimamẽ? Ha txakabũ yurabu hatu debuwamis hawẽ benuti bai mã txibãkubainimarã, natiã xinã betsa watã mã hawẽ dakeaii. 22Hakia txakabũ matu tsuma wapauni mã ma heneima hakia natianã, bai pepa betxitã hawama Deus besti mã dayashũkũkaĩkatsis ikaii. Haskakẽ na haska pepa Deus mã dayashunairã, hiwekuĩa pepa mã itxawaii, natiã mã hawẽ meribi hiwekũkainai inũ atimas hawẽ henekĩ hiwekuĩa hawẽ manakukĩ Deusũ matu inãshanikiki. 23Haskakẽ tsuabũra txakabuwakubaĩmisbu hatũ kupitirã, Deusũ meketi hayama mawa kayabi bishãkanikiki. Hakia nukũ Shanẽ Ibu Jesus Cristo nũ ikũwaĩ nũ haki dasikẽ hawẽ taeshũ Deusũ nukũ hiwekuĩti pepa inã nukũ Shanẽ Ibube dasitã nũ habe hiwei ikibi ishanaii.

Currently Selected:

Romanos 6: cbsBR

Highlight

Copy