Romanos 14

Nũ habubetã Jesus txibaĩbu yuãtimakiaki, na hãtxarã

1-2Jesus txibaĩbu nũ betsa betsapabukẽ Deusũ nukukiri xinãmis matu yusĩnũ nĩkakãwẽ, eskakirirã. Jesus Cristo habũ mã txibaĩbu betsabu ma huĩti kuxipa haya xinãkĩ dasibi piti betsa betsapa mã pimiski. Hanua betsaburi habũ tapĩ taewaibu huĩti babu mestẽriabumã nami pisbumaki. Haskawẽ taeshũ tsuara ha yurã ikũwãkĩ taewai haibu wakĩ hawara pimis inũ hawara pismakiri yuinamei habe ha irabeama uĩrakubaĩkãwẽ. 3Ha inũ, haratubũra hamapai piti betsa betsapa danãma pimisbũ ikũwaĩ betsabũri piti betsa danaĩbu hatu ha akĩ dakewayamariakubaĩkãwẽ. Haska inũ, habiaskari wakĩ yura betsabũ hamapai betsa betsapa pimisbu haratubũra piti betsa danaĩbũ hatu ha akĩ dakewariayamakubaĩkãwẽ, Deusũ hawa hatu danaĩsmawẽ taeshunã. 4Ha inũ, habu shanẽ ibukĩ hatu yunuai tibibũ hawẽ dayaru tibi ha akĩ pewamis inũ kẽwãmiskenã, tsuara ibumabia mariastũ mã hatu ha atirumaki. Habiaskari wakĩ nukũ Shanẽ Ibu Jesus Cristõ hamebi hawẽ dayarubu hatu kuxipa wakĩ hawẽ bai kayatapia hatu txibãmakĩ hatu pewakubaĩmiski. Haska hatu yunuai xinãkĩ hau ashuĩ hiwekubainũbunã.

5Haska inũ, betsakirirã, Jesus txibaĩbu betsabunã, semana tibi haratura shaba meribi watã hanu itxashũ Deus kẽwãnũ ika ikubaĩmisbuki. Hakia ikũwaĩbu betsabũ shaba tibi kasmai mexu merã tibi itxashũ Deus kẽwãmisbuki, shaba meribi tibi habiasbiakenã. Haska wakinã, hawatiãra shaba betsatiã itxatã ikũwaĩ tibitũ Deus kẽwãkĩ kaneabumaki. Haska xarabu wakĩ mã ikũwaĩ unãtã dakeyamakubaĩkãwẽ. 6Ha inũ, haratura shaba betsa meribi watã hanu nukũ Shanẽ Ibu kẽwãkĩ Deus duawakatsis ikĩ hau hanu akubainũbũwẽ. Ha inũ, tsuabũra nami inũ hamapai piti betsa betsapa danãma pimisbũ Deus duawanũ, iwanã, hau kẽwãtã pikubainũbũwẽ. Ha inũ, tsuabũra yunu besti pimisbunã, Deus duawanũ, iwanã, kẽwãtã hau haskas piriakubainũbũwẽ.

7Hanua nukubu tibirã, ana ibubis nũ hiweamaki. Ha inũ, nũ ibubisri mawama ishãkanaii. 8Hakia nukũ Shanẽ Ibuki ma nũ dasiarã, nũ ha hiweshunaii. Ha inũ, mawairã, nukũ Shanẽ Ibu duawakatsis iki nũ mawashanaii. Natiã nũ hiweyuabu inũ nũ mawashanaiburã, ma nukũ Shanẽ Ibuki nũ dasia nũ ma haskarã, nũ hawẽ yuraki. 9Haskawẽ taea Cristo mawatã ana bestenirã, txanima dasibitũ shanẽ ibunũ ika iniki, natiã nũ hiweabuna inũ habu mawabunarã.

10-12Hanushũ Deusũ yuikĩ:

“Ẽ hãtxa txanima matu yuinũ nĩkakãwẽ.

Yura dasibibu unãtã ẽ hatu kupiaya

dãti itã ea kẽwãkĩ

haska ea besti kuxipahairatũ ẽ hatu kupiaya

ea yuiakeakeshãkanikiki”,

aka hawẽ hãtxa yuishunikatũ keneniki. Haskawẽ taeshũ tsuabũra Jesus txibaĩ betsabu hatukiri nũ hatu yuaĩbu inũ tsuabũra Jesus txibaĩ betsabu nũ hatu danãmisbu nũ haska hatukiri hãtxamis Deus bebũ nia nũ haki txaniaya nuku tibi unãti wakeakeshanaiwẽ taea nukubetã Jesus ikũwaĩbu ana hatu yuãkĩ danãyamakubainãkãwẽ, nukũmebirã.

Hawara piti tibi txakabumabiakẽ ikũwaĩ betsa babu kanematirukẽ ana pitimakiaki, na hãtxarã

13Haska inũ, tsuãra Cristo ikũwaĩkiri hatube ana yuãnanãyamakubaĩkãwẽ. Ha inũ, nũ hatu uĩmatxaka hau haska xinaĩ ana nukukiri hãtxa txakabu yuiyamanũbũ hamapai piti tibiwẽ habũ ikũwaĩ betsa hatu babu watiru inũ hamapai piti tibiwẽ hatu kanematiru ana meama henekubaĩkãwẽ. 14Hamẽ eã ẽ Shanẽ Ibu Jesus ẽ ikũwaĩ ẽ haki dasiawẽ taea ẽ xinãnã, hamapai piti tibirã, hamebi hawa txakabumaki. Hakia tsuãra hawẽ xinã mekei haska xinãkĩ pikatsi ikamarã, hau meyamakubainũbũwẽ. Txanima hawenarã, txakabuki. 15Haskakẽ Jesus mã txibaĩbu betsabunã, hawara ha piti pisbuma pikĩ mã hatu itxakawairã, ha piti ana meama hatuwẽ nuikĩ ana hawẽ keĩ kemuama henerikãwẽ. Mã haska wamakẽ ha ikũwaĩ betsabu Cristo hatu mawashũbianikẽ huĩti babubu txĩtuĩ piti pixta bestiwẽ benutirubuki. 16Haskakẽ hawara piti xarabu mã pimis Deusũ matu nemamabiakẽ Jesusunabu betsabũ ha piti danãmisbũ hau matukiri hãtxa txakabukĩ yuãyamakubainũbũ ha piti pebiakẽ hatu uĩmakĩ ana piyamakubaĩkãwẽ. 17Deus shanẽ ibuai nũ ikũwaĩburã, hawara nũ pikatsis ikai inũ, hawara nushuti nũ akatsis ikai xinaĩ hawẽ nuitimaki. Hakia nukuwẽ Deus shanẽ ibuairã, hawẽ Yushĩ Pepatũ haska abuai nuku kanemakatsi ikama inũ, nuku unãnuma hiwemai inũ, nuku xinã txãkãwãkĩ benimawakĩ nuku hiwemaikiki. 18Ma haska hiwekĩ Cristo duawakĩ hawẽ Epa Deus benimawaya yurabũri matu uĩkĩ kẽwãtirubuki.

19Haskakẽ hawa txakabu ana piama merabenamekĩ ana hatu kuxipa wakĩ unãnuma hiweti benakubainãkãwẽ. 20Haska wakĩ Deusũ daya mã benuama ishanaii, piti nũ pimis xinaĩ ha ikamarã. Txanima dasibi piti pepa bestibiakẽ hawara pitiwẽ Jesusunabu txĩtũmatiru harã, txakabuki. 21Ana ha meyamakubaĩkãwẽ, nami betsa pikinã. Ha inũ, hamapai hene paepa akĩ Jesus txibaĩbu betsabu mã hatu kanematirurã, ana meyamakubaĩkãwẽ. 22Haskakẽ nami piaibukiri inũ hamapai nushuti aka paẽtirubukiri haska Deusũ matu nemakĩ yusĩa haska mã xinaĩ tsuabura yuiyama haska Deusũ matu yusĩa besti txibãkĩ xinãkubaĩkãwẽ. Tsuara Deusũ kuxipa haya yurabũ nematiki meseama dasibi hawẽ yurawẽ hamebi mekei hawa bika teneama benimakũkaĩmiski. 23Hakia tsuãra pitikiri xinãkĩ: “Nami ẽ ana piamaki”, ibiakĩ pikĩ kanekanikiki. Hamẽ betsã piamarã, hatũ xinã kuxipa watirubuki. Hamẽ haskama hatũ xinã babu hayabia pirã, kanei Deuskiri txakabukanikiki.

Currently Selected:

Romanos 14: cbsBR

Highlight

Copy