Apocalipse 6

Ha dukũ dabe inũ dabe hawẽ unãti tsamia Jesus Cristõ dashnukĩ taewanikaki, na hãtxarã

1hanushũ Deusũ txashuwã bakẽ hawẽ unãti ha dukũ tsamia dashnuaya ha hiweabu dabe inũ dabe betsã hawẽ hui tĩ ikaĩkainai keskai uĩkĩ ẽ nĩkaya hatũ yuikĩ: “Huwe”, akai

2ẽ uĩayã hanua cavalo hushupaki tsuara kanũyã katsauwa shanẽ ibũ maiti betsa Deusũ inã maia hunibube detenamekĩ binumakĩ hatu maemakeakebaini kakẽ

3hanushũ Deusũ txashuwã bakẽ hawẽ unãti tsamia ha segundo dashnuaya ha hiweabu betsã yuikĩ: “Huwe”, akai 4ẽ uĩayã hanua cavalo betsa taxipaki tsuara betsa haki tsaukaĩkĩ kuxipa bibaĩkĩ hau mai hirabi anu tsuabura ana unãnuma hiweama hanubi hau detenamebaunũbũ nupe txaipa inãtã yunua kaya

5hanushũ Deusũ txashuwã bakẽ hawẽ unãti ana ha terceiro tsamia dashnuaya hiweabu betsã kenakĩ yuikĩ: “Huwe”, akai ẽ uĩayã hanua cavalo betsa mexupa tsuara betsa hawẽ shãkama unãti tsuma haki tsauwa 6ha hiweabu dabe inũ dabe anua ha hãtxa kaĩmakĩ yuiai ẽ nĩkaya: “Piti yama tukãtiã shekiwã ha misi wati kilo bestitxai hawẽ karu shekamakĩ shaba bestitxai daya pei wakubaĩwẽ. Ha inũ, misi wati betsa cevada pe beshmas kilo dabe inũ besti hawẽ karu shekamakĩ shaba bestitxai daya pei wakubaĩwẽ. Hakia piti sheni inũ uva vinho ana karu wayamakubaĩwẽ”, aka kaya

7hanushũ Deusũ txashuwã bakẽ hawẽ unãti ana ha quarto tsamia dashnuaya hiweabu betsã yuikĩ: “Huwe”, akaya 8ẽ uĩayã hanua cavalo betsa paxĩ beshunaki tsuara betsa hawẽ kena Mawamanika haki katsauwa inũ hanu mawabu bumisbu habũ shanẽ ibu hatxũ huai ẽ uĩayã Deusũ mai hirabi anuabu yurabu shukua tibi habu anua pashkakeakekĩ ha dabe shanẽ ibu watã ha quarta parte hatu inãkĩ kuxipa wakĩ yunukĩ nupewẽ hau detenamenũbũ inũ, buniwẽ hau tenãmanũbũ inũ, isĩ betsa betsapawẽ hau tenãmanũbũ inũ, yuinaka pubẽbũ hau hatu pimanũbũ ha kuxipa inã bibainaya

Ha quinto inũ sexto hawẽ unãti tsamia Deusũ txashuwã bakẽ dashnunikiaki, na hãtxarã

9hanushũ Deusũ txashuwã bakẽ hawẽ unãti ha quinto tsamia dashnuaya habũ Jesus ikũwãkĩ Deusũ hãtxa Jesuskiri yusĩkubaini bika betsa betsapa tenebiai txĩtuãbuma hatu tenãbu txi tapu fogão hanushũ Deus kẽwãkĩ inãkuĩti hanushũ kuamisbu anu ha namã ha pepabũ yushĩ datãbu ẽ uĩayã 10habũ hãtxa kuxipawẽ yuikĩ: “Mĩ nukũ Shanẽ Ibu binu keyua meribi mĩ txanima kayabiki. Haskakẽ mai anushũ habũ nuku tenãniburã, hatiã mĩ hatu unãti watã hatu nuku kupishũshanai?” akabu

11yushĩ datãbu Deusũ hatu yuikĩ: “Maturã, huĩrukũyukãwẽ. Ikismaki. Ẽ tsumabu betsa matu keska ea dayashũmis haburi hau tenãyunũbũwẽ. Habũ matu tenãmis keskariwakĩ ẽ hatu kupishanai manayukãwẽ”, itã habu tibi pepawẽ kupikĩ tari hushupa txaipa hatu inãkĩ sawemakĩ keyuaya

12hanushũ Deusũ txashuwã bakẽ hawẽ unãti ha sexto tsamia dashnuaya ẽ uĩayã patxa sakuhairai bari nukai mexua tari mexupa keska dakakẽ usheri himi keskai taxia dakakẽ 13hanua niwe birenepã hi bimi huxĩriama niri amis keskai bixi tsekebirani mai anu niri iake iakeaibũ 14hanua nai yamakaini una sebiki ikaskainaya mati inũ hene anu mai natukã maeakei shekekaunaya 15hanua mai hirabi anua shanẽ ibuhairabu inũ, soldadobu shanẽ ibubu inũ, mabuwãyãbu inũ, yura kuxipabu inũ, dasibi hatũ hatu dayashũmisbu inũ, yura tsuã tsumama dasibi hatibu datei mai tãpe inũ mixkipãwã mati hanu hunenũ ika bushũ 16haki hunenũ ishũ mati inũ mixkipãwãbu yuikĩ: “Hanu kupi ma hua tsuã nematirumaki. Epa Deus hawẽ shanẽ ibũ tsautiki tsauwa inũ hawẽ bake txashuwã bake nukuki sinataiwẽ taea nuku hunei nukuki di irikãwẽ. 17Ma ha shaba hanu Deusũ hatu kupiaitiã ma hua tsuã ana nematirumaki”, akeakeaibũ

Currently Selected:

Apocalipse 6: cbsBR

Highlight

Copy

Compare