Apocalipse 19

1hanushũ ẽ nĩkaya nai anua tsuara mirimabũ yuikĩ:

“Aleluya! Nukũ mekenika Deus nũ kẽwaiĩ.

Duapa kuxipahairatũ nũ hawenabu nuku mekepakeshanikiki.

2Ha inũ, yura dasibibu unãshũ kaneama kupimiswẽ taeshũ

mae ewapa aĩbu hininipa keskatũ yurabu dasibi txakabuwamakubainai ma kupikiki.

Ha inũ, aĩbu hininipa keskatũ Deusũ tsumabu tenãkubaĩmiswẽ taeshũ

Deusũ hawẽ mae ewapa haki sinata paepakĩ yamawaikiki”, itã

3hanushũ habũ ana yuikĩ:

“Aleluya! Deus pepahairaki.

Ha mae ewapa kuĩ inai hushu puepakeshanikiki”,

ikaibũ

4haskaibũ ha 24 mekenikabu inũ ha hiweabu dabe inũ dabetũ Deus haki tsautiki tsauwa namã dãti iki maiki beti ishũ kẽwãkĩ yuikĩ: “Hau haskanũwẽ. Aleluya! Txanima Epa Deus pepahairaki”, ikaibũ 5ẽ nĩkaya ha Deus tsauwa namanua hui betsa tashniriakĩ yuikĩ:

“Mã Deusũ tsumabuũ, mai hirabi anua betsabu

mã shanẽ ibubu inũ betsabu mã shanẽ ibubumã

Deusũ kuxipaki mesekĩ duawai pepakĩ kẽwãkubaĩkãwẽ”,

ikaibu uĩkĩ nĩkatã ẽ matu keneshunaii.

Deusũ txashuwã bakebetã ikũwaĩbũ habetã pishãkanikiaki, na hãtxarã

6Hanushũ ẽ nĩkaya yura mirimabu hãtxai hene diri ikai keskawẽ inũ tĩ ikaĩkainai keskawẽ yuikĩ:

“Aleluya! Nukũ Epa Deus kuxipahaira dasibi binu keyua

ha bestitũ nuku dasibi mekei ma shanẽ ibui taeikiki.

Pehairaki. Kẽwanãkãwẽ.

7Aĩbu hawẽ bene huaibe hiwenũ, iwanã,

hawẽ hamapai pewakĩ akawai

Jesusunabu habe hiwekatsis ikanikiki.

Ha haskarã, Jesus Cristo txashuwã bakẽ

hawenabu niti akama habe hiwemashanikiki.

Haskakẽ benimai xinã txãkaĩ tse ikĩ

Deus kẽwanãkãwẽ.

8Tima tari hushupa txashakapa pehaira

ha Deusunabu meribi habũ hatũ xinãwẽ kaneama txibã pewamisbũ hau sawenũbũ, iwanã,

hatũ hiwea meribi unãmati ha tari ma hatu inã saweabuki”,

ikaibu ẽ nĩkashuki.

9Hanushũ nai tsumã ana ea yuikĩ: “Deusũ hãtxa kayabi ẽ mia yuiai nĩkatã keneriwe, eskarã. Txashuwã bakẽ hawenabu nai anu habe hiwemanũ, iwanã, hatu itxawashũ habetã pirã, benimatxakayamashãkanikiki”, ea haska yuiaya

10kẽwãnũ ika hawẽ tae namã ẽ dãti itanaya ea nemakĩ yuikĩ: “Eki haskayamawe. Mia inũ Deusunabu betsabũ Jesus Cristo txibãkĩ hawẽ hãtxa yusĩmisbu keska eãri Deusũ hãtxa bunika ẽ hawẽ tsumariki. Haskakẽ ea kẽwãma Deus besti kẽwãwẽ”, ea washuki.

Haskarã, tsuabura Jesuskiri kakape Yushĩ Pepatũ shabakabi hatu xinãmaya habu yusĩnãbu hakiri txanikĩ banabimabaũmisbuki.

Cavalo hushupaki katsaũtã txakabubu kupi kanikiaki, na hãtxarã

11Hanua nai bepemanaya shanẽ ibu hawẽ kena Txanima Hãtxa Kaneisma cavalo hushupaki katsauwa ẽ uĩshu matu yuinũ nĩkakãwẽ. Shanẽ Ibu pepatũ yurabu unãti wai hatube detenamẽnũ ika ikairã, 12hawẽ beru txasharã, txi here keskaki. Ha inũ, shanẽ ibu kuxipahairaiwẽ taea Shanẽ Ibũ maiti itxapa maia hayaki. Ha inũ, hawẽ hunea kena ha bestitũ unaĩ ha kena haska haki neaki. 13Ha inũ, hawẽ tari sawearã, himiki pukua saweaki. Ha inũ, hawẽ kena betsarã, Deusũ Hãtxa Kayabiki. 14Ha inũ, hawẽ soldadobu nai anua tima tari hushupa pehaira hawa detsisma saweari cavalo hushupabuki katsaumea hatxũ kaĩbaĩkĩ hatũ Shanẽ Ibu txibãbaĩkanikiki. 15Ha Shanẽ Ibu kairã, shanẽ ibu yununika mane kuxatia inũ hawẽ hashpa anu nupe txaipa kenuhaira kaĩa tukũwã hawẽ habũ Deus nĩkaisbuma mai hirabi anuabube hatube detenamei kairã, haskawẽ taea ha Shanẽ Ibu kayabistũ hamebi ha hatuki Deus sinatai hatu uĩmakĩ haska uva vinho tsinikĩ pema pema amisbu keska wakĩ Deus kuxipa binu keyuatũ hawẽ pubẽ pae hatu memai kaikiki. 16Ha inũ, hawẽ kena mestenepa Dasibi Shanẽ Ibubu Inũ Dasibi Yununikabu Binukĩ keyuaki, ika hawẽ tari txaipaki inũ hawẽ kixi kateki ha dabeki hawẽ kena neaki.

Jesuski habu haki sinataibu hatu maemanikiaki, na hãtxarã

17Hanushũ ẽ uĩayã nai tsuma betsa bari merã nishũ dasibi habu peiyabũ pisi pimisbu nai natukanu nuyabaũmisbu hatu kenakĩ hui kuxipawẽ yuikĩ: “Nenu bei neri itxai bekãwẽ, hau Deusũ matu pimanũnã. 18Habube Shanẽ Ibu detenamekĩ maema habũ namirã, shanẽ ibubũ nami inũ, soldadobu habu shanẽ ibubũ nami inũ, hamapai huni kuxipabũ nami inũ, cavalo nami inũ, dasibi cavaloki katsaumeabũ nami inũ, hunibũ tsumabũ nami inũ, tsuã tsumabumã nami inũ, hamapai yura betsa betsapabũ Deus nĩkaisbuma Jesusũ hatu maema habũ nami pitxakayamakãshunã”, ikai ẽ nĩkashuki.

19Hanushũ ana ẽ uĩayã yuinaka mese atimapahaira inũ, shanẽ ibubu mai hirabi anua inũ, hatũ soldadobu itxa ha cavalo hushupaki katsaumea hawẽ soldadobuya hatube detenamẽnũ ika itxa maniabũ 20ha parã hãtxa yuishunikatũ yuinaka mesẽ besuuri atimaska betsa betsapa tsuã atiruma wakĩ habu yuinaka mese atimapahairatũ kena habu hẽ iyamama inũ hawẽ dami kẽwãmisbu hatu parãmiswẽ taeshũ parã hãtxa yuishunika Shanẽ Ibu binuatũ tsumabũ atxikĩ yuinaka mese atimapahaira habe atxitã nĩkaibu hanu iã enxofre paxinipa menui here hi hi ikai anu ha dabe hatu putabu 21cavaloki katsaumeshũ hawẽ nupe txaipa hawẽ hashpanu tukuãwẽ dasibi yura betsabu Jesusũ hatu detekĩ keyukẽ peiyabũ dasibibu habũ nami pi shuku dakakĩ yani waibu ẽ uĩshuki.

Currently Selected:

Apocalipse 19: cbsBR

Highlight

Copy

Compare