Apocalipse 1

Na hãtxa Joãonẽ hatu keneshunikiaki, na hãtxarã

1Ha dukũ Deusũ Jesus Cristo ishanai unãmaniki. Hanushũ eari samama hawaira haskashanai ea ẽ hawẽ tsuma João unãmakatsis ikĩ hawẽ nai tsuma Jesus Cristõ yunua ea uĩmaxinaki, na haska inũbariai dasibi nũ hawẽ tsumabũ tapĩtã hatu yusĩkubaĩshanũ ea unãmakinã. 2Haskawẽ taeshũ Deusũ hãtxa inũ, Jesus Cristõ ea unãmaxina ẽ nĩkaxina inũ, dasibi ẽ uĩxina hawa txanitxakama ẽ matu yui kayabiaii. Ẽ hãtxa txanima uĩkĩ nĩkairakãwẽ.

3Tsuabũra na ẽ hãtxa hatu yuiaibu inũ habũ na hãtxa nĩkatã: “Txanimaki”, ikĩ txibãkubaĩshanaiburã, Deusũ habu benimawashanikiki, haska inũbariai txanini ma hamapai tashni taeai uĩnã.

4Mã Jesus txibaĩbu ha sete yusĩnanaĩ itxamisbu tibi Ásia mai pakeanuabuũ, ẽ Joãonẽ, ẽ matu kene bumai nĩkairakãwẽ. Ha ini inũ, ikũkainai inũ, ana hushanaitũ, nukũ Deusunã, hau matu duawakĩ hawẽ pepa matu inãkĩ unãnuma matu hiwemakubainũwẽ. Habiaskari wakĩ ha sete yushĩ pepa hawẽ shanẽ ibu tsauti bebũ mapuabu hau habũ habiaskari matu wanũbũwẽ. 5Ha dikabi Jesus Cristo hawa txani txakaisma mawatã ha dukũ bestẽni inũ mai hirabi anu habu shanẽ ibu betsa betsapa binui hatũ shanẽ ibumisrã, hau hatũ matu unãnuma hiwemarianũwẽ. Ha inũ, nuku abui nukuwẽ nuikĩ nukũ txakabuwẽ taea mawakĩ hawẽ himi habakĩ nuku buashũrianiki. 6Na habiatiã hawẽ Epa Deus dayashuni nuku habe hãtxanika wakĩ hatũ nuku shanẽ ibu keska waniki. Haskawẽ taea dasibi hawenas kuxipa haya inũ pepa hayakẽ niti ikama kẽwãkubainãkãwẽ. Haskakirã.

7Uĩa. Nai anua nukũ Shanẽ Ibu nai kuĩwẽ huai

dasibibũ uĩshãkanikiki.

Ha dikabi habũ hatu tenãmanibu inũ

habũ danãmisbu mai hirabi anu manibaunabũ

uĩ datei kashashãkanikiki.

Haskashãkanikiki, txanimarã.

8Hanua mai hayariama nukũ Shanẽ Ibu Deus dasibi kuxipahaira hiwea haya inũ, natiã hiwekũkainai inũ, ana hushanaitũ ea yuikĩ: “Ea dukũ ẽ hiweni inũ ẽ hawẽ henea debesekeaki”, ea washuki.

Jesusũ João betsa watã uĩmanikiaki, na hãtxarã

9 Ea ẽ matũ betsa Joãonã, matu keska Jesuski dasia Deusbe shanẽ ibuaibe nia betsa betsapa tenei txĩtuãma Jesusũ kuxipawẽ ẽ binukubainaii. Ha inũ, Deusũ kakape yusĩkĩ Jesusũ nuku mekekatsis ikai shabakabi ẽ hatu yuikubainaiwẽ taeshũ na natukã hawẽ kena Patmos anu ea nitxiãbu 10nukũ Shanẽ Ibu hanu bestẽni shaba domingo betsatiã Deus ẽ yushĩki nukushũ ea betsa wa ẽ nĩkaya ẽ petxiurishũ hui kuxipahaira trombeta mimawati keskawẽ 11tsuãra ea yuikĩ:

“Hawara ẽ mia uĩmai unaki keneshũ Ásia mai pakea anu ha sete yusĩnanaĩ itxamisbu tibi anu bumashãwẽ, Éfeso anu inũ, Esmirna anu inũ, Pérgamo anu inũ, Tiatira anu inũ, Sardes anu inũ, Filadélfia anu inũ, Laodicéia anurã”, ea waya

12tsuã ea hãtxa wai dabanẽ uĩnũ ika nasauketã uĩkĩ haki bĩ tsaũti sete ouro mane txãka daka tsaubauna uĩkĩ 13ha namakis huni kayabi keska nia ẽ uĩshuki. Hakiri matu yuinũ nĩkakãwẽ. Hawẽ tari txaipa hupushku anu kesua inũ, hawẽ ouro mane nanesheketi shutxi putxinĩ kesuaki. 14Ha inũ, hawẽ bu hushupahaira inũ, hawẽ beru txi here txasha keskaki. 15Ha inũ, hawẽ tae mane taxipa betsa hawẽ kena latão reluzente txi merã napua txashahaira keskaki. Ha inũ, hawẽ hui hene diri ikai nĩka keskaki. 16Ha inũ, hawẽ mekẽ yusiuri sete bixi tsuma inũ, hawẽ hashpanu nupe detenameti txaipahaira kenu dabeya tukuã hayaki. Ha inũ, hawẽ besu bari keska txashakĩ shabawaki.

17Haska uĩ hawẽ tae namã mawa keskai tsistikaĩ ẽ tĩ ika daka hawẽ mekẽ yusiuri ea mekĩ yuikĩ:

“Dateyamawe. Earã, ea dukũ ẽ hiweni inũ ẽ hawẽ henea debesekeaki. 18Ea ẽ hiwea ẽ mawani natiã ana ẽ bestẽni niti ikama ẽ hiwepakeaii. Ha inũ, hiwemati kuxipa inũ kupiti kuxiparã, ea besti ẽ hayaki. Hanu mawai ikibi ishanaibu anurã, eã besti ẽ yunutiruki. 19Dasibi mĩ uĩshu inũ, na habiatiã ikai inũ, haskarara inũbariai unaki hatu keneshũriwe. 20Ha hawara hunea mĩ uĩshu shabakabi mia yusĩnũ nĩkawe. Ha sete bixi ẽ mekẽ yusiuri ẽ tsuma mĩ uĩshurã, ha sete mae itxamisbu tibitũ merabenã Deus yuishunikaki. Ha dikabi haki bĩ tsaũti sete ouro mane txãka daka mĩ uĩshurã, ha sete mae ikũwaĩbu itxamisbuki”, iwanã,

Currently Selected:

Apocalipse 1: cbsBR

Highlight

Copy

Compare