Tiago 4

Deusbe haibunametã ana txĩtũtimakiaki, na hãtxarã

1Mã unaĩ ikai hanua hukĩ matu ha imakĩ hãtxawẽ hanubi txitenamemakĩ matu detenamemairã, haska kaĩkinã, matũ huĩti meranua kemu txakabu tashnikĩ matu imaikiki. Mã haskakũkainairã, xinãkãwẽ. 2Ha inũ, hawara bikatsis iki kemubiakĩ mã bitirumawẽ taea hawara yura betsa haya uĩ hawẽ mã kemuai yura betsaki sinatakĩ mã tenãkatsis ikaii. Ha inũ, yura betsa mabu hayakẽ putamatã bianũ ika nui sina detenũ ikasmai mã ha ibestimiski. Habiaskabiakẽ hawara Deusũ matu inãtiru yukakĩ mã ea aismawẽ taeshũ Deusũ hawa matu inãmaki. 3Ha inũ, hawarakiri Deus mã yukamiski. Hanushũ mã yukakĩ mã ea abia hawa mã bismaki, mã hamakiri yukatxakaiwẽ taeshunã, haskarã, haska Deusũ xinaĩ keska akatsi ikama haska matũmebi hawẽ beparamei ibubis benimai mã hamẽ txakawakatsi ikĩ hakiri xinaĩnã. 4Haskati kemaĩ yurabũ mã ikũwãkĩ pewabumaã, haskai Deus haibu wabiatã matũmebi hawara Deusũ danaĩ mã akubainai? Haskakẽ tsuabũra hawara Deusũ abuama abukĩ Deus danaĩ ana habe haibunamekatsi ikabumaki, ana txĩtũtã haki sinatamairã. 5Matu xinãmakatsi ikĩ Deusũ hãtxa hakiri kenekĩ yuikĩ: “Deusũ Yushĩ Pepa nuku merã hiwemanitũ nuku yauxikĩ mekekubaĩmiski”, iwanã, yuikĩ hamẽ hakiri keneama iniki. 6Hakia hamapai tibi nũ akairã, hawẽ pepawẽ nuku merabewakĩ binumaikiki. Haska hawẽ hãtxa yuishunikatũ kenekĩ: “Tsuabũra yuikĩ: ‘Hamapai betsa betsapa emebi ẽ atiruki’, ikĩ keaĩburã, Deusũ hatu beshtemiski. Hamẽ tsuabura babutã yuikĩ: ‘Deusũ besti ea merabewaya hawara txakabu hawẽ pepawẽ besti ẽ daĩbaĩtiruki’, ikaibu duawakĩ habu merabewakubaĩmiski”, iniki. 7Haskawẽ taeshũ Deusũ merabewakĩ hau matu mekekubainũ haska abuai ashũkĩ txibãkubaĩkãwẽ. Haskai hẽ iyamakĩ diabo Satanásã matu txakabuwamakatsi ikaya: “Deusũ ea mekeaya ẽ mia nĩkamaki. Turi kariwe”, mã wakubainaya Deusũ kuxipaki datei Satanás pashashanikiki. 8Haskakẽ tsuabũra Deus inũ Satanás ha dabe txibãkĩ mã xinãtxakaya matu yusĩnũ nĩkakãwẽ. Hanũ Deus xinã kayabikĩ haibu kayabi warikãwẽ, hari hau matube haibunaĩ dasinunã. Mã haskakubainaiburã, haska nukũ mekẽ detsis mepanui nũ yamamis keska wakĩ matũ huĩtiwẽ mã xinã txakabuwai haki petxi hakimatã yamawarikãwẽ. Haska wakĩ mã Deus abukĩ haibu wakatsis ikaibu Deusũ matu haibu washanikiki. 9Ha inũ, mã habe haibunameama txakabuwakubainaibuũ, ana pepeama matũ txakabu unãtã hawẽ kashakatsi iki ana usaĩ benimama huĩti nixmai punu nukatã matũ xinã inũ matũ huĩti pewarikãwẽ. 10Hanua xinã betsai babutã nukũ Shanẽ Ibu bebũshũ yuikĩ: “Eãnã, txakabu besti ẽ akubaĩmiski. Ẽ txakabu ea buashũtã ana xinãma ea mekekubaĩwẽ”, mã akubainai duawakĩ Deusũ hawena wakĩ matu kẽwãkĩ binumashanikiki.

11Ẽ betsabu inũ ẽ puibuũ, betsabũ ikũwaĩbu betsabukiri hawara txakabu nĩkatã yura betsabu yuibaũkĩ mã habu yuaiĩ, hatukiri haskatimabiakenã. Txanima Deusũ nuku yusĩkĩ: “Matũmebi mã nuimis keskakĩ yura betsa betsapa tibiwẽ nuikĩ hatu duawakubaĩkãwẽ”, iwanã, nuku yusĩniki. Haskakẽ tsuabũra ikũwaĩ betsabu txitekĩ Deusũ yusĩa txiteriakĩ haratura yusĩa mã abuamabia hawẽ besti hatu unãti wakĩ mã hatu txiteakeakeaii, matũ yunukĩ akawakinã. Hatu haska wai mã daki ana Deusũ yusĩa txibãkatsi ikama danaĩ mã haki meseamaki, hawẽ yunutikirã, Deusũ abiashanayarã. 12Ha inũ, hawara nũ anũbũ Deusũ hawẽ hãtxa nuku inãkĩ yununiwẽ taeshũ ha bestitũ yurabu kupiakeaketiruki, hatũ pepawẽ inũ hatũ txakabuwenã. Habiaskabiakẽ hawẽ hãtxawẽ yununi xinãma kanei maturã, habũ matu enawaibu hatu unãti wakĩ hatu txitenũ ishũ mã kanekubainaii. Hatu haska watimaki.

Tsuara yubakai kẽbiatã mexukiri haskarashanai tsuã unãmakiaki, na hãtxarã

13Eskakiriri natiã matu yusĩnũ nĩkakãwẽ. Hawara Deusũ matu amakatsi ikai xinãma hawara matũmebi mã akatsi ikai akĩ tsuãra yuikĩ: “Ikis kasmai, mexukiri kasmai, harakirira mae ewapa betsanu kashũ harishũ bari hirabi mabu inãnanãkeakekaũkĩ pei itxapa bikĩ ẽ itxa watãshanaii”, iki mã hamẽ yubakaii. 14Mexukiri hawara kaĩkĩ mia itimaska watiru mĩ unãmaki. Nukũ hiwearã, basnũ keskakiri nũ xinãtirubuki. Penama basnũ bututã mayakabiashu hawaira pua iki maĩbaĩmis keskai natiã mã hiwebia mexukiri mã mawatiru tsuã unãmariki. 15Hakia eskakĩ mã xinã pewatiruki, matu yusĩnũ nĩkakãwẽ. Tsuãra xinãkĩ yuikĩ: “Nukũ Shanẽ Ibũ ea mekeshũ hiwemayuaya hawara haska ea xinãmai ẽ atiruki. Ea xinãmamakẽ ẽ atirumaki”, ikĩ pe mã xinãkubaĩtirubuki. 16Hamẽ haskama matu ibubis hãtxai kẽkĩ hawara Deusũ matu amakatsis ikai xinãma haska mã akatsi ikai besti matũmebi kẽkĩ anũ ibestikũkainairã, txakabuki. 17Haskawẽ taeshũ tsuabũra hawara pepa Deusũ abumis unãbiakĩ mã akamarã, txakabukĩ Deus mã pashkaii.

Currently Selected:

Tiago 4: cbsBR

Highlight

Copy

Compare