Efésios 3
3
Deusũ hawẽ yubaka pepa huneni Paulõ hatu shabakabi yuinikiaki, na hãtxarã
1Jesusũ ea yunua mã judeubuma Jesus Cristokiri ẽ matu yusĩayã matuwẽ taeshũ ẽ hawamabiakẽ nenu ea nitxĩmashũ mekeyuabuki. 2Hakia Deus matuwẽ nuikĩ hawẽ kakape ea matu yusĩmaimarã, haskakiri ẽ ikairã, mã daka unaĩ. 3Haskakẽ hawẽ xinã hunea Jesus Cristokiri ea shabakabi unãmani eskarabes ẽ dama matu keneshũshu 4uĩkĩ hawara Deusũ xinã hunea Cristokiri ẽ ikai xinaĩ: “Txanimaki”, mã itirubuki. 5Uatiã nũ hawa unãma inibuki. Hakia natiã Jesusũ kuxipaya meribibu inũ hawẽ hãtxa yuishunikabu habu hawẽ Yushĩ Pepawẽ Deusũ shabakabi ma hatu unãmayamaki. 6Uatiã Deus yubakakĩ hunenirã, shabakabi matu yuinũ nĩkakãwẽ. Yurabu betsa betsapa tsuabũra Jesus Cristokiri kakape nĩkakĩ ikũwaĩbu Deusũ hiwekuĩa hatu inãkatsi ma hatu kenaikiki, habias yura inũ habias yubani Israelbube hawenabu ashanai keska wakinã. 7Ha haska waniwẽ taea Deus duapa ewẽ nuikĩ hawẽ kaka pepa ẽ yusĩkubaunũ ea yununiki, haska wakĩ hawẽ kuxipahaira ea uĩmakinã.
8Hamẽ ẽ ikairã, Cristo txibaĩbu meranua ẽ beshmashaira hawamabiakẽ haskaraki watã Deusũ ea benimawakĩ duawakĩ hau hawẽ bake Cristokiri hawẽ pepa betsa betsapa hayawẽ nuku pehaira mekekubaĩtiru matu judeubumaki ẽ txanikũkaĩshanũ ea katutã nitxĩniki. 9Deus dasibi damiwanitũ hawẽ xinã meribi bari itxapa hunenitũ ẽ matu dasibi unãmanũ haska shabakabi wakatsis ikĩ Deusũ matu anu ea yununiki. 10Hau haska Deus besti unãnepatũ unã keyuai yushĩ kuxipabu inũ nai tsumabu nai anushũ haska Deusũ huneni natiã huni txakabubũ hawẽ bake ikũwaĩbũ Deusũ hatu unãmakĩ hatu binumaikiki. 11Hanushũ mai damiwariama Deus ikibi ini yubakani anũbariai akinã, nukũ Shanẽ Ibu Jesus Cristowẽ nuku ashuniki. 12Cristõ nuku haska washunikẽ hawa ana dateama haki txiti itã ikũwaĩ kematã nũ yukatirubuki. 13Haskakẽ kakape ẽ yusĩkubaũmiswẽ taeshũ ea bitxiabu matu merabewanũ ika matuwẽ taea nuitapai ẽ bika teneaii. Hakia ekiri xinaĩ punu nukama benima bestikubaĩkãwẽ, ewẽ taeshũ Deusũ matu duawaiwẽ taearã.
Cristo ikũwaĩbu hau txĩtũyamanũbũ Paulõ Deus hatu yukashũkubainikiaki, na hãtxarã
14Haskawẽ taea mã judeubumakiri nukũ Epa Deus bebũ dãti itã ẽ matu kuxipa yukashũmiski, 15hatũ dasibi hawenabu nai anua inũ mai anua ma hatũ kena haya mekearã. 16Deus matu yukashũkinã, hau hawẽ xinã ewapa keyuisma matu anu yunukĩ hawẽ Yushĩ Pepawẽ matu kuxipa wakĩ hau matu mestẽwãmakubainũ ẽ matu ashũkubaĩmiski. 17Ha dikabi Cristo matube hiwea mã hayarã, hawẽ nui kayabiwẽ matu mestẽwãma mã hawẽ ikũwaĩnã, ha matũ huĩti merã xinãkĩ hau mã txibãkubainũbũ ẽ matu yukashũriamiski. 18Eskaki, matu yuinũ nĩkakãwẽ, Cristõ nui kayabirã. Hashpahaira inũ, txaipahaira inũ, keyatapahaira inũ, uke merã bismahaira keska tibi Cristõ nui mã tapĩtirubuki, mã ha ikũwaĩbunã. 19Haska hawẽ nui mã unaĩnã, pesheixta besti hawẽ nui unãkĩ haska hawẽ nui betsa betsapa meshti akĩ mã hawa tanatirubumaki. Deusũ hawẽ kuxipa pepa haska tsuã bikĩ nũ keyutirubumakiri mã unãnũbũ ẽ matu yukashũriamiski. 20Haska inũ, hamapai nũ yukamis inũ hamapai betsa betsapa nũ xinãriama inũ nũ yukariama hawẽ kuxipahairawẽ Deusũ nuku ashũtiruwẽ taeshũ niti ikama kẽwanãkãwẽ. 21Jesus Cristo nũ txibaĩbu ikũwaĩ betsabubetã Deus kẽwãkĩ heneama duawakubainãkãwẽ, niti ikamarã. Haskakirã.
Currently Selected:
Efésios 3: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
