Efésios 1

Paulõ hatukiri xinãnikiaki, na hãtxarã

1Ea ẽ Paulorã, Deusũ hawẽ xinãnẽ Jesus Cristõ hawẽ kuxipaya ea wakĩ ea katuniwẽ taeshũ tsuabura Éfeso mae ewapa anuabu Deusũ hawenabu meribi matu wani mã habũ ikũwaĩ Jesus Cristobe ketashamei mã haki dasia xinãkĩ ẽ hãtxa ẽ matu bumai uĩrakãwẽ. 2Nukũ Epa Deus inũ nukũ Shanẽ Ibu Jesus Cristõ hau matu unãnuma hiwemakĩ pewakĩ duawapakekubainũbũwẽ.

Deusũ Jesuswẽ nuku duawakubainikiaki, na hãtxarã

3Nukũ Shanẽ Ibu Jesus Cristõ Epa Deus kẽwãkubainãkãwẽ, Deusũ bake Cristo nũ ikũwaĩbuwẽ taeshũ naiurishũ hawẽ pepawẽ nuku manakukĩ Deusũ hawẽ bakewẽ hamapai tibi pepa nũ uĩaĩ inũ nũ uĩyama hawẽ xinã txãkãmati yushĩ nuku inãkubainaiwẽ taeshunã. 4Deusũ Cristowẽ taeshũ nuku katunũbarikatsi mai damiwariama haska xinãniki. Haskakẽ hawẽ besuuri nũ txakabuma pe besti nia nuku uĩnũbarikatsi iniki. Nuku abui nukuwẽ nuikĩ 5nuku mebikinãshũ hawenabu nuku washanũ, iwanã, bebũkiri Jesus Cristowẽ hawẽ bakebu nuku wakatsi hawẽ duapawẽ nuku katuniki, hawẽ xinã nuku inã nũ ikũwãshanũbunã. 6Haska nuku wakinã, Deus duapahaira nũ hawẽ kẽwãpakeshanũbũ nuku haska waniki, hawẽ bake abuniwẽ nukuri hawẽ duawanũ ishunã. 7Haskakẽ Jesus mawakĩ hawẽ himi habaniwẽ taeshũ Deus nuku daewashũkĩ nukũ txakabu ana xinãma buaniki, hawẽ xinã duapa nũ haya tsuã beshtetiruma hawẽ taeshũ nuku mekekinã. 8Deusũ nuku haska wakinã, dasibi binuatũ nuku unãnepa wakĩ haska nuku pe nĩkanika wakĩ hawa yauxiama Deusũ nuku ashuniki. 9Cristowẽ nukũ txakabu buakatsi bari itxapa hawẽ xinã Deusũ hunenishũ hawẽ duapawẽ ma shabakabi nuku tashnimashuniki, nuku unãmakinã. 10Deusũ hanu menenũbarikatsi haska bebũkiri yubakani kaneama aniki. Haskawẽ taeshũ Deusũ Cristo shanẽ ibuwani ha mekemakĩ keyushũ yunumakatsi dasibi nai anua inũ mai anua haki dasiwatã tsumamashanikiki, Deusũ hatu itxawanũbariaitianã.

11Haska wanũbarikatsi Deusũ bebũkiri Cristowẽ nũ judeubu dukũ nuku katuniki, haska Deusũ hamebi xinaĩ keskawẽ nuku duawaya nũ hawenabu ipakeshanũbunã. 12Deusũ nuku dukũ katukinã, ha dukũ nukũ xinãwẽ Cristo nũ manashanũbũ nukukiri xinãmati waniki, haskawẽ taeshũ dasibibũ hawẽ kuxipa pepa nũ kẽwãkubaĩshanũbunã. 13Cristowẽ taea mã judeubuma dikabitũ hawẽ hãtxa txanima Deusũ bake Jesus mekenãkiri kakape nĩkatã ikũwaĩbu hawẽ nuku tibi unãti wati yubanishũ hawẽ Yushĩ Pepa nuku inãtã ha dabe hawenabu nuku inũ matu warianiki. 14Deusũ hawẽ Yushĩ Pepa matu inãkĩ haska bebũkiri matu yubakĩ nai anu habe matu hiwemakatsi matuki tanani hawẽ unãti mã ma hayaki, hawẽ Yushĩ Peparã. Haskakẽ hawatiãra nuku meneshũkĩ hawenabu nuku wanishũ nuku shabakabi bepẽshũ uĩmashanaiwẽ taeshũ dasibibũ Deusũ kuxipa pepa kẽwãkubainãkãwẽ.

Hau Deus unãhairanũbũ ikũwaĩbukiri Deusũ kuxipa Paulõ hatu yukashunikiaki, na hãtxarã

15Haskakẽ nukũ Shanẽ Ibu Jesus mã ikũwaĩ inũ mã dasibi Jesusunabu meribibu mã hawenabu mã nuinameaibu eã haska ẽ matukiri xinaiĩ. 16Hawa matukiri hakimama Deus dayuikĩ matu yukashũkĩ heneama matuwẽ taeshũ Deus ẽ kẽwãkubaĩmiski. 17Haska inũ, nukũ Shanẽ Ibu Jesus Cristõ Epa Deus nũ kẽwãmis ẽ matu yukashũmiski, hau hawẽ Yushĩnĩ ana matu nĩkamakĩ unãnepawakĩ matu merãshũ hau txanima kayabi Deus matu unãhairamanunã. 18Deus matu yukashũkinã, Deusũ hau matũ xinã hunemawatã shabakabi nĩkamakĩ manakamanũ inũ, hau tsuabura hawenabu kayabi katutã hawẽ pepawẽ duahairawakĩ matu unãmashanũ ẽ matu yukashũmiski. 19Ha dikabi Deus matu yukashũkĩ haska hawẽ kuxipa binu keyua keyuisma nũ ikũwaĩbu nuku merabewamis mã unãnũbũ Deus ẽ matu yukashũriakubainaii. Ha kuxipa Deus hamebi hayarã, haska dasibi watiru haya nuku unãmakĩ 20Cristo mawabiakẽ Deus kuxipahairatũ ana bestẽwãtã nai anu hawẽ yusiuri tsaumaniki. 21Hawẽ bake kuxipahaira ha kaya watã hanushũ shanẽ ibu kuxipabu inũ beshmasbu dasibi maemamatã, na habiatiã inũ betsatiã iriamarã, dasibibu Deusũ Jesus hawẽ kuxipawẽ hatu 22babu watã mekemaniki, hamapai betsa betsaparã. Hanushũ Deusũ Cristo ha ikũwaĩbu hawẽ shanẽ ibuhaira hatu washuniki, ha hatũ bushka wakinã. 23Nũ Cristo ikũwaĩbu dasibirã, nũ Cristõ yuraki. Hawara nuku merabewatiru nũ yuka hawa yauxiama nuku inãmiski, hamapai xarabu dasibi tsumakĩ mekeshunã.

Currently Selected:

Efésios 1: cbsBR

Highlight

Copy

Compare