2 Pedro 3
3
Nukũ Shanẽ Ibu ana hushanikiaki, na hãtxarã
1Ẽ betsabu inũ ẽ puibuũ, matuwẽ nuikĩ ana ẽ matu keneshunairã, eskawẽ taeshũ ẽ matu ashuaiĩ. 2Xinãkãwẽ. Uatiã Deusũ hãtxa yuishunika meribibũ yusĩnibu inũ ha dikabi nukũ Shanẽ Ibu mekenã hãtxa nuku yununi habias hawẽ kuxipayabũ matu yusĩkubainaibu hakimayamakubaĩkãwẽ.
3Na haska dasibi ẽ matuki txaniai mã bebũkiri unãtirubuki. Txanima hanu bari hawẽ henei ma kemaya yurabu hiwe txakashũ ibubis txakabu xinãkĩ mã ikũwaĩbu matuki kashei ẽ hẽ ibiai 4yuka ikĩ: “Cristo yubakai: ‘Ẽ ana hushanaii’, ikainirã, hania? haska mã txanimisrã. Nukũ ibubũ nĩkabaini ma mawanibuki. Haskabia Deusũ mai bawani anu nũ hiwea habiaskas kaikiki”, ikĩ matu yukakubaĩshãkanikiki. 5Bebũkirihaira iki taenitiã Deusũ nai inũ mai hawẽ hãtxawẽ damiwakĩ tashnima ha dabe henesbiakẽ nai inũ mai pashkakĩ hene anua mai tashnimatã mekebianikẽ ha yurabũ Deuskiri hawa xinãkatsi isbumaki. 6Ana bari itxapahaira kakẽ habias henewẽ mai hirabi atximakĩ hiweabu tenãkĩ keyunikiaki. 7Hakia nai inũ mai natiã hayayuarã, habiaskari wakatsi Deusũ mekeyukubainikiki. Hanu bari hawẽ henei keyuaitiã unãti wakĩ yura txakabubu kupikatsi Deusũ hawẽ hãtxawẽ yunukĩ nai inũ mai txiwẽ yamawakĩ habũ Deus danãmisbu hanu hatu benu keyushanikiki.
8Ẽ betsabu inũ ẽ puibuũ, eskakiriri ẽ matuwẽ nuiai xinãkubaĩkãwẽ. Shaba tanakĩ ano tanariai mã hawẽ dabanã ikũkaĩmiski. Hakia Jesus Cristõ haska xinaĩsmaki. Shaba bestitxai hawaira keyumis inũ 1.000 ano kabiaya nukũ Shanẽ Ibu hawẽ nuismaki. Ana hakimayamashãkãwẽ. 9Hanu Jesus huti wani ma binuaya habũ xinãtxakai hãtxamisburã, eskaki, xinãkãwẽ. Nukũ Shanẽ Iburã, matuwẽ taearã, hĩ hĩ ikamaki. Dasibibu Deuskiri xinã betsatã hau benui mawa kayabi iyamashanũbũ tenetã matu manakai ikũkainikiki.
10Hawatiãra nukũ Shanẽ Ibu huirã, tsuã ana hakiri xinãmakẽ yumetsu hua keskanũbarikiaki. Hanua kanatũ itxakayamai keskawẽ nai anu yamawakĩ habũ tsumabauna txi kuxipahairawẽ menukĩ mai hirabiri damiwani kupikĩ yamawashanikiki.
11Haska dasibi Deusũ yamawashanai mã unaĩwẽ taea natiã mã hiweyuarã, haska Deusũ abuai keska aki meribi pepai hiwepakekãwẽ. 12Hanũ hau Deusũ yurabu kupiyunũ manama hawaira hawẽ bakekiri kakape txanikĩ yuibaũkãwẽ, hau samama hurinunã. Hanu ana manama hukinã, nai txiwẽ menuaya ha habuã tsuma txĩ menukĩ metesha niri ishanikiaki. 13Nukubunã, eska uĩkatsi nũ manakanaii. Nai inũ mai bena Deusũ ma nuku bebũkiri yubanirã, ha haska tashnirã, kaneisbuma inũ pepabuna besti ishanikiki.
14Ẽ betsabu inũ ẽ puibuũ, ẽ matuwẽ nui heneama ẽ matu yusĩkubainai eskakiri xinãkãwẽ. Hau dasibi mã hawa detsisma inũ hawa txakabu hayama inũ unãnuma mã hiwe bestikẽ hau Jesus Cristo matuki nukuyushanũ ẽ matu yusĩshu xinaĩ hakimama manakakubaĩshãkãwẽ. 15Xinaĩrakãwẽ. Nukũ Shanẽ Ibu nukuwẽ nui hĩ hĩ ikama pewẽ nuku pashawakatsi nuku merabewaikiki. Habiaskiri nukũ betsa Paulõ matu keneakeakeshũyamaki, Deusũ merabewaya unãnepakinã. 16Paulõ kene betsa tibi anu yusĩa bikabiakẽ na haska ẽ matuki txaniai keska betsabũ nĩka pewama inũ huĩti babũ ikũhairawabumã Paulõ hãtxa maewakĩ inũ Deusũ hãtxa kenenibu maewakeakei ibubis hatũmebi txakabutã benushãkanikiki.
17Ẽ betsabu inũ ẽ puibuũ, matuwẽ nuihairakĩ ma bebũkiri haskashanaibu ẽ ma matuki txanishuki. Mekeirakubaĩkãwẽ, mã pebiakainaya hau huni txakabũ matu parãkĩ hau matu txĩtũmayamashanũbũ mestẽshãkãwẽ. 18Hakia nukũ mekenã Shanẽ Ibu Jesus Cristo ana unãkĩ beyahairawai hawẽ nuiwẽ ewakubaĩkãwẽ. Harã, dasibibũ Jesus kẽwãkĩ heneama hau apakenũbũwẽ. Haskakirã.
Hatiski, ẽ hãtxarã.
Pedro
Currently Selected:
2 Pedro 3: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
