2 Coríntios 9
9
1-2Mã Corinto mae ewapa Acaia mai pakea anuabũ ua bari betsatiã nuitapaibu Jerusalém anuabu matũ inãkuĩa mã habũ inãkatsis ikai nĩkatã dasibi Macedônia mai pakea anu manishũ ikũwaĩbu mã akai kakai nĩkatã mirimabũ habunari bumakatsi iriaibuwẽ taeshũ matukiri kẽwãkĩ nuitapaibu mã merabewati xinãnikẽ ẽ ana haskakiri txanikĩ matu keneshunamaki. 3-4Hakia ẽ matukiri kẽwãbiamis dasibi matũ pei mã itxawashũ aruriamakẽ Macedônia anuabu ebe bukĩ mã haska ariama dama tapĩ itsakĩ hatu uĩmai hanis akĩ hau matu dakewakĩ eari dakewakĩ txakabuwayamashanũbũ, iwanã, matu merabewakĩ nukunabu dabe inũ besti matu anu bebũkiri ẽ hatu nitxiaiĩ. 5Haskakẽ haska matũ pei mã bebũkiri inãkuĩkatsi mã yubayama keska wakĩ mã habũ inãriamatũ nuiama hatu inãkĩ keyukãwẽ, matũ yauxi hatu uĩmamarã. Hawara mã inãtiru hawaira mã inãnũbũ matu anu nukunabu dabe inũ besti habũ matu merabewai bunũbũ dasibi bebũkiri hatũ berubi mã pewakĩ keyunũbũ ẽ hatu nitxiaiĩ.
Hawa yauxiama hatũ inãkuĩ hau inãshanũbũ hãtxa pewẽ hatu yuinikiaki, na hãtxarã
6Hanua haska hunĩ eskarabes mibaĩmatũ yunu ewai kaniai eskarabes tsekamis inũ, hunĩ mirima mibaĩma hawẽ yunu ewai kaniai akũhaira tsekamisrã, haska keska xinãkãwẽ. 7Haskakẽ yauxiama hatu merabewakĩ nukũ hawara benimayabi nũ hatu inãyã Deusũ abumiswẽ taeshũ tsuã matu yunuamabia bestibu haska mã yubaima keska hatu merabewai yauxibetanã inũ sinatabetanã inaĩ xinãma hawara mã pashkakatsi ikai hatu inãkuĩshãkãwẽ. 8Ha inũ, merabewakĩ hamapai betsa betsapa yura betsabu ashũkĩ matũ hawara pashkashũ mã hatu merabewaya Deusũ matu duawakĩ akũhaira pawamakĩ matuna binumakĩ inãkĩ matu ashũtiruwẽ mã duanametirubuki. 9Deusũ haska xinãmiskiri Davĩ keneni matu yuinũ nĩkakãwẽ.
“Txikixama dayabiamis dasibi hayamakẽ
Deusũ hawẽ pepa keyuismawẽ
hatu duawakubaĩmiski”,
aniki. 10Haska keska Deusũ nuikipabu hatũ hawara inãmistũ maturi matuna inãmiskẽ yauxiama pashkashũ mã hatu inaĩbu ana akũhaira matu inãkĩ binumakĩ Deusũ matu merabewamakubaĩshanikiki. 11Haska inũ, Deusũ itxapa matu inãmiskẽ pashkashũ matũri yura betsabu mã inaĩbu nũ matu haska yusĩmiswẽ taeshũ yura itxapabũ Deus kẽwãshãkanikiki. 12-13Hawara Deusũ matu amakatsi ikai txibãkĩ Cristo ma ikũwaĩwẽ hawẽ kakapewẽ matu betsa wa yura betsabu shabakabi merabewakĩ mã hatu uĩmashanaii. Ha inũ, na mã hatu merabewashanai nukũ betsabu Jerusalém anua hawa hayabumakẽ nũ hatu bushuã bitã benimakĩ Deus kẽhairawashãkanikiki, matũ pepawẽ taeshunã. 14Ha inũ, haska bestiwama haska duahairawakĩ matuwẽ Deusũ hatu merabewai habũ unãkĩ matu abukĩ Deus matu yukashũkubaĩshãkanikiki. 15Haska washũ nukũ hãtxawẽ nũ Deus pepawakĩ keyutirumaki. Haska Deusũ binumakĩ nuku dasibi duahairawakĩ hawẽ inãkuĩwẽ Deusũ hawẽ bake nuku mawamashuniwẽ hawenabu nuku waiwẽ taeshũ Deus kẽhairawakubainãkãwẽ.
Currently Selected:
2 Coríntios 9: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
