1 Pedro 1
1
Pedrõ hatukiri xinãnikiaki, na hãtxarã
1Ẽ Pedro Jesus Cristõ kuxipayatũ ẽ hãtxa ẽ matu bumaii, mã mai pakea tibi Ponto inũ, Galácia inũ, Capadócia inũ, Ásia inũ, Bitínia anu mã hiwebaunabu anurã. 2Epa Deusũ tsuabura katukatsis ikĩ bebũkiri haska xinaĩ keska mã ishanũbũ hawẽ Yushĩ Pepawẽ matu pewanishũ ma matu meribi waniki. Haskawẽ taeshũ mã txibãkubaĩshanũbũ hawẽ himiwẽ Epa Deus daewakĩ Jesus Cristõ matũ txakabu buaniki. Hawẽ taeshũ Epa Deusũ hawẽ pepa itxapa yauxiama matu inãkĩ hau matu unãnuma hiwemakubainũwẽ.
Ikũwaĩbu Deusũ hatu kẽwãkĩ duawashanikiaki, na hãtxarã
3Nũ hawẽ bakebus pepawẽ nuku kupia nũ habe hiweshanũbũ nukũ Shanẽ Ibu Jesus Cristo nukuwẽ nuihairaya Deusũ ana bestẽwãkĩ nuku bake kaĩ bena keskati waniki, ha xinãkĩ hiwea ikibi ika betsa ha manakai hiweti nuku inãkinã. Haskawẽ taeshũ nukũ Shanẽ Ibu Jesus Cristõ mekenika Deus, hawẽ Eparã, kẽwãriakubainãkãwẽ. 4Nai anu hawa yamatiruma inũ, mexu tsamitiruma inũ, hawa txapui niri itiruma Deus matuki tanatã hawara pepa aruni Jesus Cristõ hawẽ manakukĩ matu inãkeakeshanikiki, mã hawẽ hiweshanũbunã. 5Matũ xinãwẽ mã Deusũ kakape ikũwãkubainaiwẽ taea Deusũ hawẽ kuxipa paewẽ matu mekekubaĩkĩ haska yubakani hanu bari hawẽ heneaitiã haska matu pewashuni mã unãkubaĩmis ibubis hanu haki nukukĩ mã uĩshãkanaii.
6Haskawẽ taea natiã bika betsa betsapa hawẽ matu unãti waibuwẽ haskawẽ benimatimabiakẽ mã hawẽ benimayutirubuki. 7Hanua shanẽ ibuhairai Jesus Cristo ana hushũ matuwẽ benimakĩ hau matu kẽwãshanũ haska ouro mane taxipa txiwẽ pewakĩ has wamisbu keska wakĩ: “Haska mã Jesus ikũwaĩburi pewakĩ matũ xinã mã ma mestẽ matu uĩnũ”, ishũ habũ matu itxakawaibu Deusũ hawẽ matu unãti waikiki. Haska ouro mane taxipa bikatsi imisbu keskakĩ Jesus ikũhairawai txĩtuãma pepakĩ mã hatu binuaiĩ.
8Haska inũ, Jesus Cristo uĩyama ibiani mã abuhairaii. Ha inũ, natiã uĩyama ibiani mã ikũhairawariaii. Haska benima pae mã haya hãtxawẽ besti ha benima pae tsuã haska tashnimatirumaki. 9Haska Jesus Cristo xinãkĩ mã ikũwaĩ Deusũ kupitiwẽ yurabu kupiaya matũ binui mã pashashanai mã hari xinaiĩ.
10-11Haska wakĩ Deusũ matu duawakĩ yunushanaikiri hawẽ hãtxa yuishunikabũ Messiaskiri bebũkiri itxakawabu nuitapatã hatu maemashanaikiri Cristõ Yushĩnĩ hatu unãmaya Deusũ hatu kenema habũ ibubis tapĩnũ ishũ benahairakĩ xinaĩ: “Tsuamẽ? Hatiã haskashanimẽkaĩ?” ikubainibukiaki. 12Ha Messiaskiri hatu txanimakĩ hau Deusũ hãtxa yuishunikabũ ibubis Deusũ yusĩa nĩkatã hakiri hatuna besti watirubuma Deusũ habu txipu hiweshanaiburi hau habũri hakiri unãshanũbũ, iwanã, habu matu kenemashuniki, matu merabewakinã. Messias Cristokiri kakape matu unãmakatsi ikĩ hawẽ Yushĩ Pepa naiuria yunua hanushũ Jesuskiri yusĩnã betsabũ hakiri datã akĩ matu unãmakubaunibuki. Na habias kakape matu yusĩaĩbu Deusũ nai tsumabũri ana tapĩpai iriakanikiki. 13Jesus Cristo mã ikũwaĩwẽ taea ana tatimama dasibi matũ xinã mestẽwãtã haskaki txiti itã dateyamakubaĩkãwẽ. Jesus Cristo ana hushanai manakakĩ Deusũ hawẽ pepawẽ matu duawashanai ikũwãkĩ haskakiri besti manayukubaĩkãwẽ.
Deusũ ha hiwea keska na mai anu nũ meribi pepai hiweshũyunũbũ nuku katunikiaki, na hãtxarã
14Uatiã Deus unãriama txakabu abui mã txakabupaunibuki. Haskakẽ natiã Deusũ bakebui ana haska mã abupauni keska hiweama bake mixtĩbũ hatũ ibuã hãtxa nĩkatã txibãmisbu keska hiwekubaĩkãwẽ. 15Natiã ana haskama matũ hiwea betsa watã meribi pepakubaĩkĩ bika tenekĩ hatu uĩmakubaĩkãwẽ, hatũ matu katuni meribi pepa hiwea keskariairã. 16Deusũ Moisés yuikĩ: “Ẽ meribi pepawẽ taea maturi meribiri pepakubaini hiwekubaĩkãwẽ”, ikai nĩkatã keneniki.
17Habiaskari wakĩ yurabu betsa betsapa dasibi uĩkĩ hatũ xinã tibi inũ haska wamisbu tibi kaneama Deusũ unãti washanaiwẽ taeshũ Deus dayuikĩ: “Epaã, ea mekewe”, aki bari tibi matũ hiweawẽ duawakĩ kẽwaĩ haki mesekubaĩkãwẽ. 18Hamẽ matu ikirã, matũ shenipabũ Deus unãma txakabu besti akĩ hatũ matu merabewakĩ hiwemakĩ pewatiruma beyawanibu mã hatu txibãkĩ akubainirã, mã unãhairaii. Tsuã haska matu meketirumahairabiakẽ hawẽ matu kaĩmakinã, hawara mabu txapumis ouro inũ prata mane keskawẽ matu akama 19hamẽ haskama txashuwã bake pepa hawa txami hayama deteshũ menu keyukĩ Deus daewapaunibu keska wakĩ hawẽ bake Cristo mawakĩ hawẽ himi pepahaira dasibi betsana binuawẽ Deus hawena nuku wati wamakĩ hawẽ daewati waniki. 20Ha inũ, nai inũ mai damiwakĩ taewariama Messias Cristo yununũbarikatsi Deus bebũkiri yubakanikẽ hanu ma bari hawẽ heneaitiã ma kemaya matu merabewanũ ika Jesus tashninikiaki. 21Haskakirã Cristõ hawẽ Epã hãtxa matu unãmaiwẽ taeshũ mã Deus ikũwãnibuki. Haska matu wabiaya tenãbu Deusũ ana bestẽwãkĩ Shanẽ Ibu wani na habiatiã matũ xinãwẽ hakiri ikũwãkĩ Deusũ hiwekuĩa matu inãshanai mã haki txiti ishũ manakakubainaii.
22Mã ma haskawẽ taea natianã, Deusũ kakape Jesuskiri nĩkatã ha hãtxa txanima txibaĩ mã ma meribi pepabuki. Haskakubaĩkinã, ikũwaĩ betsabube abuname kayabikubaĩkãwẽ. Haskakĩ matũ huĩti hawa txakabu hayama inũ matũ kuxipa hirabiwẽ betsabu merabewai hatuwẽ nui abunamei hatube duanamepakekãwẽ. 23Mã haskakũkaĩshanũ Deusũ ana matu kaĩ bena keska waniki, matũ ibubu txutanamekĩ matu bawani keskama hakia Deusũ hãtxa hiwea betsaisma haya mã ikũwãkĩ xinã betsa waiwẽ taeshunã, nukunabube danãnanãma mã abunamekubainũbunã. 24Haska Deusũ hãtxa betsa waismakiri hawẽ hãtxa keneshunika Isaíasĩ yuikĩ:
“Yura dasibi ni mashu keskabuki.
Ha inũ, hawẽ hawẽruai hawẽ pepamisburã,
ni mashu hawẽ hua keskabuki.
Bari betsatiã ni mashu txuxiaya hawẽ huari utsitã niri imiski.
25Hakia Yavé Deusũ hãtxarã,
betsai keyuisma ipakeai hayaki”,
aniki. Na habias hãtxa Jesuskiri kakape hakiri datã aki hawẽ yuinika betsabu matuki txanirianibuki.
Currently Selected:
1 Pedro 1: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
