1 João 4

Haratura Deusũ Yushĩ Pepa haya unãtikiaki, na hãtxarã

1Ẽ betsabu inũ ẽ puibuũ, matuwẽ nuikĩ na haska tashnibiranaibukiri ẽ matu yusĩkatsis ikaii. Mai hirabi anu Deusũ hãtxa yuishunikanikapai habu txani txakaiburã, mirima hayaki. “Eari ẽ Deusũ hãtxa yuishunikaki”, ikaiburã, dasibi hatu ikũwãyamakãwẽ. Hakia hatu unãti wakinã, txanima habu Deusũ Yushĩ haya ikanimẽkaĩ? Hayamabia matxupai ikanimẽkaĩ? Hatu uĩkubaĩkãwẽ. 2Haskakiri hãtxaibu mã unãtiruburã, habu Deusũ Yushĩ Pepa hayarã, habũ ikũwãkĩ yuikĩ: “Jesus Cristo tashnirã, yura kayabi bitã kainiki”, ikaibu Deusũ Yushĩ Pepa haya mã unãtirubuki. 3Hakia tsuãra Jesus Cristokiri unãmabia yuikĩ: “Yura kayabiama iniki”, ikaiburã, Deusũ Yushĩ Pepa hayamaki. Ha hunĩ Jesus Cristo shanẽ ibu mebinũ ika haki sinatai haki beparamei hushanai yushĩ hayaki. Haskakiri ha yushĩ hushanai mã nĩkanirã, harã, ma na mai anu yurabu anu kaĩma ma niaki.

4Ẽ bake keskabuũ, mã Deusunaburã, hawẽ Yushĩ Pepa kuxipa mã hayawẽ taeshũ Satanásã hatu merabewabiamiskẽ ha parananaĩbu mã hatu binu keyuaki. Satanás kuxipabiakẽ Deusũ Yushĩ Pepa kuxipahairatũ ma binuaki, matu merabewakinã. 5Ha yusĩnã parananaĩburã, hatũ yusĩawẽ hãtxairã, hatũ beyakiri besti hãtxakanikiki. Tsuabura habu keskabũri hatu nĩkakanikiki. 6Hakia nukurã, nũ Jesusũ kuxipayaburã, nũ Deusũ bakebuki. Nũ yusĩayã habũ Deus unãkĩ nuku nĩkaibũ habũ Deus unãbumã nuku nĩkaisbumaki. Ha haskaburã, haratura txanima Yushĩ Pepa haya inũ haratura paranã yushĩ hayabu nũ unãtirubuki.

Ikũwã kayabiai unãtirã, abunamei beyanamei hatuki dasiakiaki, na hãtxarã

7Ẽ betsabu inũ ẽ puibuũ, nui pae Deus anua humiski. Haskawẽ taea tsuabura nũ hawẽ bakebui ikaiburã, Deus unãkĩ haibuwakanikiki. Haskakẽ nukubu nui abunamekubainãkãwẽ. 8Deus nuikipabiakẽ tsuãra ha abunameti xinãmarã, Deus unãriabumaki. 9Jesus ikũwaĩ hawẽ taea nũ hiwea hayashanũbũ Deusũ hawẽ bake bestitxai yurabu anu yununiki, nukuwẽ nuikĩ nuku abuai nuku uĩmakinã. 10Nuku abuai haska uĩmakinã, nukũ dukũ nũ Deus abuama iniki. Hakia nukuwẽ nuikĩ nuku abukinã, hawẽ bake yununiki, hau ha mawakĩ daewaiwẽ nukũ txakabu buatã ana xinãyamakubaĩshanunã.

11Ẽ betsabu inũ ẽ puibuũ, ẽ matuwẽ nuikũkainairã, txanima nuku haska wakĩ Deusũ nuku abunikenã, nukuburi habiaskariai ikũwaĩ betsabube nui abunamekubainãkãwẽ. 12Tsuã Deus uĩpaunima inũ uĩtirumabiakẽ nukubu nũ abunameairã, Deus nukuki dasia nukube hiweaki. Nukube dasiawẽ taea ha nui txanima kayabi nũ hayaki. 13Nukubu nũ Deuski dasia hiwea inũ ha nukube dasia hiwea hawẽ nũ unãti wakubainũbũ hawẽ Yushĩ Pepa nuku inãniki. 14Txanima Epa Deusũ hawẽ bake hau yurabu mai hirabi anu hatu mekekubaĩshanũ yununi nukubũ uĩnishũ nũ shabakabi hakiri txanikũkaĩmiski. 15Hamẽ tsuabũra yuikĩ: “Txanima Jesus Deusũ bake kayabiki”, ikaiburã, Deuski dasia hiweabu inũ Deus hatuki dasiriaki.

16Txanima Deus nũ abuairã, ikũwãkĩ nũ ma Deus unãkanaii. Deusrã, nuikipa abunamenikaki. Tsuara ha nui haya hiwearã, Deuski dasia hiweaki, Deusri haki dasiriarã. 17Haskakũkaini txanima nũ nui hayakũkaĩmisburã, Deusũ Jesus Cristo abumis keska wakĩ nukuri habiaskari wakĩ nuku abumiswẽ taea hanu bari hawẽ heneaitiã Deusũ hatu unãti waya nũ hawa dateama ishanaii. 18Hanira hanu nui hayarã, hanu date hayamaki. Tsuara nui kayabi hayarã, ikũwaĩbuwẽ nui abunamekayabikĩ hawẽ date putamisbuki. Hamẽ betsa date hayarã, hawẽ kupiti xinãmisbuki. Haskawẽ taea tsuara datekeparã, nui kayabi pae haki nukuriamaki.

19Deusũ dukũ nuku abukĩ taewanikẽ hawẽ taea nukuri nũ hatube abunametiruki. 20Haratura ikũwaĩ betsa habe ikũwaĩ habe uĩnanãbiai habe abunameamarã, habiaskariai Deus nũ uĩyamaberi abunametirubumaki. Haskawẽ taea tsuãra yuikĩ: “Deus ẽ abuaii”, ibiai samama ikũwaĩbu betsa danaĩ habe dakekenaĩnã, ha huni txani txakaikiki. 21Jesus Cristõ nuku yunukinã, eska yuiniki: “Tsuãra Deus abukinã, matubetã ikũwaĩburi hatuwẽ nuikĩ aburiakubaĩkãwẽ”, nuku waniki.

Currently Selected:

1 João 4: cbsBR

Highlight

Copy

Compare