Galasi anmàn-bɔ̀ 6

Bɔ̀ wɔrɔ ɛnlowrú bɔ̀ tán bɔ́ edòmɛ̀n

1Anwrɔn-nɛ́n-muan-ẅì hɔ̀n, ke dú kɛ ɔwrɔn tɔ̀n ke bru ɛgbàn mɛ̀n hô, nyɛ́n léyi nyɛ́n ẅɛn Ɔwɔ Hɛ́n nɔn, nyɛ́n bɩ́ nɛ̀n nyɛ́n sɩ́ ɛnlevri ankrankran wú; tɛ́n nyɛ́n ẅɛn ɛnbɔrɛ-wɔ̀ n'ɛtɛ̀sɛ̀n. Kɩ nyɛ́n mán nyɛ́n wá esùva anvrɛnvrɛn, ô nyɛ́n bɩ́ teze ny'edòmɛ̀n ɔwɔɛ̀nnyan mɛ̀n. 2Nyɛ́n wá ny'edomɛ̀n ɛkɔrɛ̀ ny'ɛnlowru wɔrɔ mɛ̀n: ɔmu lɔ de nyɛ lɛ ẅɛn Krisì nyànmàn kɔrɛ̀-zì nyɛ́n hɛ́n nɔn. 3Ke dú kɛ ɔwrɔn tɔ̀n ke tro le nɛ̀n ẅɛn vɔ̀nshɛ́, tɛ́n nɛ̀n sɩ̀ dù eci zriɛmɛ́n, nɛ frɛ́n n'edomɛ̀n. 4Ke ji le ɔwrɔnwrɔn kɛ̀ crɛ́n nɛ́n dùku n'esùnàn; ke dú kɛ hɩ wú lɔ, nɛ lɛ mrɛ́n n'edomɛ̀n tɛ̀ hô, zɛtɛn ɛmrɛ́n ndɔ lɔ dú nɛ́n zri nɛ tɛn, kɩ ye sɩ̀ bɩ́ nɛ̀n yɛ krɔn ɔwrɔn nyantɛn. 5Ɔmuhi ke ji le ɔwrɔnwrɔn kɛ̀ wɔrɔ nɛ́n dùku n'ɛnlowrú lɔ nɔn.

6Ɔwrɔn léyi kɛ cɔ́ Krisì mɛ̀n ankaẅì-bùtan ankà-yé lɔ nɔn, ke ji le nɛ́n mán ankà-yé-wrɔn lɔ mɛhi yɔ dɛ́ vɔ̀nshɛ́ hɔ̀n léyi ankà-yé ndɔ lɔ kɛ tán nɔn.

7Hɩ mɛ̀n lɔ nyɛ́n bɩ́ zɛ́n hán: ye sɩ́ hán Ɔwɔ ɛnhyürɛ̀. Ɔwrɔnẅì kɛ lɛ küɛ eci léyi nɛ́n tɛ̀ nɔn. 8Ke dú kɛ nɛ tɛ́ eci léyi nɛ́n dùku n'antà dùwrú kɛ cüɛ̀n nɔn hô, antɛ̀-ẅì léyi nɛ lɛ küɛ nɔn dú owù; tɛ́n ke dú kɛ nɛ tɛ́ eci léyi Ɛnhɛ́n Prɔnprɔn kɛ cüɛ̀n nɔn hô, antɛ̀-ẅì léyi nɛ lɛ küɛ nɔn dú ɛwúvà léyi ke sɩ́ trɔa nɔn. 9Edù ke bɩ́ ká bɔ̀ anvrɛn-hán mɛ̀n; ɔmuhi ke dú kɛ edù ke sɩ̀ wú bɔ̀ hô, bɔ́ lɛ cɔ́ bɔ́ antɛ̀-ẅì ɛnvra léyi n'ɛküɛ vra kɛ lɛ cɔ̀ nɔn. 10Ɔmu lɔ, ɛnvra totɔtɔ̀n léyi bɔ́ ẅɛn ɛkɔrɛ̀-levri nɔn, bɔ̀ hán anwrɔn lɔ fɛn anvrɛn, kɩ annannan le anwrɔn-nɛ́n-muan-ẅì hɔ̀n léyi dú ankaẅì-bùtan mɛ̀n nɔn.

Ɛmɛẅi-trɔ ankà-bi-dɔ̀ mán ebinyan

11Mɛ́n dùku de zɛtɛ̀ lɔ, me merɛ́n nyɛ̀n m'antamɛ̀n wrú hán ɔmu le nyɛ kàn nɔn. 12Anwrɔn hɔ̀n léyi ke ji kɛ̀ hán nyɛ̀n kèkrèmɛ̀n ye wi nyɛ̀n wúcɔ̀-domɛ̀n nɔn, yɔ dú anwrɔn hɔ̀n léyi ke ji kè yé y'edomɛ̀n anwrɔnẅì ci-hán tɛ̀sɛ̀n nɔn. Yɔ sɩ́ ji le ye di yɔ ejüe Krisì gbàn-hán-tɛ̀ kruhú. 13Anwrɔn ndɔ hɔ̀n léyi kɛ hán wúcɔ̀-domɛ̀n-wí kɔhɔ̀n nɔn, yɔ mumù mán yɔ sɩ́ hán ɛnyànmàn kɔrɛ̀-zì-ci; yɔ ji le ye wi nyɛ̀n wúcɔ̀-domɛ̀n, ô yɔ gbú ɔmùan le, yɔ de yɔ hán ye di nyɛ̀n ɛnrɛ̀n ndɔ lɔ anẅia mɛ̀n nɔn. 14Mɛ tɛn tɛ́n, m'ɔmùan-gbù ke le dú bɔ́ Ɛẅɛnwrɔn Zhezü Krisì gbàn-hán-tɛ̀ wú kɩ; annanwɔrɛ mɛ̀n lɔ, n'ɛkɔrɛ̀levriemɛ̀n de ɛnhibù wú m'ɛkruhú kɩ mɛ̀n wú ɛnhibù kruhú. 15Hɩ le kruhú de, ke dú kɛ ye wi mɛ́n wúcɔ̀-domɛ̀n hô, kɩ ye sɩ̀ wì mɛ́n wúcɔ̀-domɛ̀n hô, vɔ̀nshɛ́ zriɛmɛ́n bàda nɛ̀n ɛmɛ̀n: hɩ le ẅɛn vɔ̀nshɛ́ nɔn, dú hɩ le ɛ lɛ srɔ ɔwrɔn wrù. 16Anwrɔn hɔ̀n léyi kɛ nán esù ɛnyànmàn ndɔ lɔ wú nɔn, mɛ dɔ̀ le: anwɔwɔ mán Ɔwɔ cüɛ̀n kɛ̀ và cɔ́ yɔ, ɔmu zri lɔ kè dù tán Ɔwɔ-fɛcüè-bɔ̀ lɔ fɛn.

17Ɛnbi nyantɛn, ke sɩ́ ji le ɔwrɔn zriɛmɛ́n ke vru kɛ̀ wá mɛ̀n ejüe; ɔmuhi annrɛ̀n hɔ̀n léyi cüe mɛ̀n edomɛ̀n nɔn, ke yé le mɛ̀n dú Zhezü tɛn.

18Anwrɔn-nɛ́n-muan-ẅì hɔ̀n, bɔ́ Ɛẅɛnwrɔn Zhezü Krisì boafɔ̀n kè dú nyɛ̀n ɛmɛ̀n. Kè dú ɔmu lɔ.

Currently Selected:

Galasi anmàn-bɔ̀ 6: ƐAA03

Highlight

Copy