2 Korɛntɛ̀n anmàn-bɔ̀ 5

1Annanwɔrɛ mɛ̀n, bɔ́ nyri ɔmu le, ke dú kɛ ɛcàsa-wɔn leyi bɔ́ dú ɛmɛ̀n nɔn (n'ɛmɛ̀n kɛ dɔ̀ le bɔ́ ɛnu ɛnhi antà-dùwrú) kɛ jrɛ́ hô, Ɔwɔ hɛ́n bɔ̀ edúyri tɔ̀n anhobɩ́ anmàn, edúyri tɔ̀n léyi anwrɔnẅì kè sɩ̀ hàn hɩ ke le dú ɛnvra lɔ fɛn nɔn. 2Kɩ bɔ́ srɔ́n nwàn zɛtɛ̀ lɔ, ɔmuhi bɔ́ ji bɔ̀ ẅɛn b'anhobɩ́ dúyri lɔ bɔ́ dú ɛmɛ̀n; 3annanwɔrɛ mɛ̀n lɔ, bɔ́ lɛ ẅɛn eci edomɛ̀n kɩ bɔ́ sɩ̀ nyɔn ɛsɛ̀n-kɔra. 4Hɛ̀ɛ̀, ɛnvra lɔ fɛn léyi bɔ́ le dú ɛnu ɛnhi casa-wɔn lɔ mɛ̀n nɔn, bɔ́ le dú nwàn-srɔ́n mɛ̀n kɛ lɛ hán ɛnlowrú-wɔrɔ-bɔ̀ hɔ́. Kè sɩ̀ dù hɩ le bɔ́ ji bɔ̀ mrɛ́n bɔ́ ɛnu ɛnhi antà-dùwrú lɔ bɔ̀ sɔhɔ́, tɛ́n bɔ́ ji bɔ̀ ẅɛn anhobɩ́ dùwrú lɔ edòmɛ̀n, ô eci léyi dú owú ci nɔn, kè ci ɛwúvà mɛ̀n. 5Ɔwɔ dùku de wá ndɔ lɔ tán bɔ̀ nɔn, kɩ nɛ̀n tán bɔ̀ n'Ɛnhɛ́n kè dú anhoba ci kɛ̀ vrá anvrɛn hɔ̀n léyi nɛ wá nɛ̀n hɛ́n bɔ̀a nɔn.

6Edùyì dú bɔ̀ ɛmɛ̀n ɛnvra lɔ fɛn. Bɔ́ nyri ɔmu le ɛnvra lɔ fɛn léyi bɔ́ le dú edùwrú ndɔ lɔ mɛ̀n nɔn, bɔ̀ dú esù she Ɛẅɛnwrɔn dúyri tɛ̀sɛ̀n 7annanwɔrɛ mɛ̀n lɔ, bɔ́ nán esù ankaẅì-bùtan wú kɩ kè sɩ̀ dù ɛyri-kán mɛ̀n. 8Edùyì dú bɔ̀ ɛmɛ̀n kɩ bɔ́ cüɛn ɔmu le bɔ̀ teze edùwrú ndɔ lɔ, ô bɔ̀ hɔ̀n yɛ́ Ɛẅɛnwrɔn tɛ̀sɛ̀n. 9Tɛ́n eci lɔ fɛn mɛ̀n, bɔ́ ji bɔ̀ cüɛn nɛ̀n ɛvɛ̀, ke dú kɛ bɔ̀ dú edùwrú ndɔ lɔ mɛ̀n mán, kɩ bɔ́ teze nɛ̀n mán. 10Ɔmuhi ke ji le bɔ́ lɔ fɛn bɔ̀ srɔ Krisì zìwú, ô nɛ̀n ci bɔ̀ ɛmrɛ̀n; zɛtɛn ɔwrɔnwrɔn kɛ lɛ cɔ́ eci léyi dú nɛ tɛn, n'ɛwúvà ankrankran mán angbàngbàn ẅɛn mɛ̀n, n'ɛnu ɛnhi wúvà lɔ mɛ̀n nɔn.

Bɔ́ mán Ɔwɔ mɛhi Krisì wɔ bɔ̀ angranmɛ̀n

11Bɔ́ nyri eci léyi dú Ɛẅɛnwrɔn wá, kɩ bɔ́ ji ɛyri bɔ̀ crɔn anwrɔnẅì bɔrɛ. Ɔwɔ nyri bɔ̀ anvrɛnvrɛn kɩ mɛ̀n ẅɛn esɛ́ le nyɛ́n dùku ny'ɛnbɔrɛ lɔ mɛ̀n, nyɛ́n mán nyɛ́n nyri mɛ̀n. 12Bɔ́ sɩ́ ji le bɔ́ dùku bɔ̀ vru bɔ̀ bɩ́ bɔ́ edomɛ̀n bɔ́ wá nyɛ̀n antamɛ̀n, tɛ́n bɔ́ cúɛn ɔmu le bɔ̀ hán tán, ô nyɛ́n gbú ɔmùan bɔ́ ɛwú; ɔmu lɔ de, nyɛ lɛ cɔ́ ankà-dɔ́-yri nyɛ́n tán anwrɔn hɔ̀n léyi ke gbú ɔmùan y'ɛntrɛ ci-hán wú, kɩ kè sɩ̀ dù hɩ le dú y'ɛnbɔrɛ lɔ mɛ̀n nɔn. 13Ke dú kɛ annànwɔrɛ mɛ̀n lɔ bɔ̀ dú ɔbrɔ̀sà-bɔ̀ hô, bɔ́ dú nɛ̀n bɔ̀ tán Ɔwɔ; tɛ́n ke dú kɛ bɔ́ dú ankà-nyriemɛ̀n hô, dú nyɛ tɛn. 14Annanwɔrɛ mɛ̀n lɔ, Krisì cüɛ̀n lɔ wi bɔ̀ ɛwú, bɔ́ léyi bɔ́ nyri annanwɔrɛ mɛ̀n le, ɔwrɔn zri wú anwrɔn lɔ fɛn kruhú kɩ, zɛtɛn, yɔ lɔ fɛn yɔ dú n'owù vɔ̀nshɛ́ lɔ mɛ̀n. 15Nɛ̀n wú yɔ lɔ fɛn y'ɛkruhú, ô yɔ léyi yɔ dú ɛwúvà mɛ̀n nɔn, yɔ bɩ́ vru dú ɛwúvà mɛ̀n yɔ tán yɔ mumù, tɛ́n yɔ tán ɔwrɔn léyi wù, kɩ vru vá ɛwúvà-kɔrɛ̀ mɛ̀n y'ɛkruhú nɔn.

16Nyàn eci le kruhú léyi bɔ́ sɩ́ vru ẅɛn ɔwrɔn zriɛmɛ́n anhyɛyì n'ɔwrɔnẅì antà-dùwrú wú nɔn. Kɩ ke dú kɛ, ɛnbìɛhɛ́n vra lɔ, bɔ̀ bɩ́ Krisì bɔ̀ srɔ ɔwrɔnẅì, zɛtɛ̀ lɔ, bɔ́ sɩ́ vru bɩ́ nɛ̀n bɔ́ hán ɔwrɔnẅìɛ. 17Ɛnvra léyi ɔwrɔn tɔ̀n ke dú Krisì bɔ̀sɔ̀ lɔ mɛ̀n, ne dú ɔwrɔn wrù: eci gbànvri lɔ kɛ zrɛ́n, eci wrù lɔ ke dù. 18Eci ndɔ lɔ fɛn dú Ɔwɔ yri và, nɛ́n léyi nɛ̀n wɔ bɔ́ mán nɛ́n mɛhi angranmɛ̀n Krisì mɛ̀n, kɩ nɛ̀n tán bɔ̀ ɔkɔ̀hɔ̀n ndɔ lɔ, ô bɔ̀ wɔ nɛ́n mán anwrɔn nyàntɛn hɔ̀n mɛhi angranmɛ̀n nɔn. 19Ɔmuhi, Krisì mɛ̀n de, Ɔwɔ kɛ hán angranmɛ̀n-wɔ-ci kɛ tán nɛ́n mán anwrɔnẅì lɔ fɛn mɛhi, kɩ nɛ́n sɩ́ crɛ-nyan y'ɛgbàn hɔ̀n lɔ. Kɩ nɛ̀n tán bɔ̀, bɔ̀ dɔ́ angranmɛ̀n-wɔ̀ ndɔ lɔ n'ankà.

20Zɛtɛn bɔ̀ dú ankà-bɔ̀sɔ-bɔ̀ léyi Krisì wá ɔkɔ̀hɔ̀n, kɩ ndù hán le Ɔwɔ dùku de ke bi nyɛ̀n b'ɔmùan wú nɔn: bɔ́ sɛ́n nyɛ̀n Krisì bɩmɛ̀n, nyɛ́n teze ny'edomɛ̀n Ɔwɔ mɛhi angranmɛ̀n kɛ̀ wɔ nyɛ̀n. 21Krisì dú prɔnprɔn mɛ̀n, tɛ́n Ɔwɔ bɩ́ bɔ́ ɛgbàn hɔ̀n lɔ worɔ nɛ̀n, ô n'ɛmɛ̀n lɔ, bɔ̀ cɔ́ ɛwúvà-kɔrɛ̀ léyi Ɔwɔ tán n'ɔkɔ̀hɔ̀n lɔ mɛ̀n nɔn.

Currently Selected:

2 Korɛntɛ̀n anmàn-bɔ̀ 5: ƐAA03

Highlight

Copy