2 Korɛntɛ̀n anmàn-bɔ̀ 10

Pɔlɛ̀n kɛ wá n'ɔkɔ̀hɔ̀n ankà esùva

1Mɛ̀n Pɔlɛ̀n, mɛ́n dùku me bi nyɛ̀n: mɛ̀n léyi mɛ̀n dú, edomɛ̀n-ɛnhi-sɩemɛ̀n ɛnvra léyi me dú nyɛ̀n ɛmɛ̀n, hán ɔmu le yɛ dɔ̀ nɔn, tɛ́n mɛ ẅɛn ɛnkru shishi ɛnvra léyi mɛ́n sɩ́ dú nyɛ̀n ɛmɛ̀n nɔn. Krisì bɔrɛ-wɔ̀ mán n'ɛzrɔ lɔ mɛ̀n, 2mɛ sɛ́n nyɛ̀n: nyɛ́n bɩ́ hán mɛ̀n kèkrèmɛ̀n mɛ́n hán ɛnkru-shishi-ci ɛnvra léyi mɛ lɛ vá ny'edúyri nɔn; ɔmuhi me ji mɛ̀n hán ɛshishi-ci mɛ̀n yé anwrɔn hɔ̀n léyi ke tro le bɔ́ eci-hán dú anwrɔnẅìemɛ̀n tɛ̀kɩ. 3Annanwɔrɛ mɛ̀n lɔ, bɔ̀ dú anwrɔnẅì, tɛ́n bɔ́ sɩ́ kɔ́n anhà kɛ hán anwrɔnẅì hɔ́ kɩ. 4B'anhà-kɔ́n mɛ̀n lɔ, bɔ́ sɩ́ bɩ́ anwrɔnẅìemɛ̀n anhà-kɔ́n-ci: Ɔwɔ kɔrɛ̀-srɔn anhà-kɔ́n-ci hɔ̀n léyi kɛ jrɛ́ ɛbùdrɛn ɛvrivri hɔ̀n nɔn, de bɔ́ bɩ nɔn. Bɔ́ jrɛ́ ɛyɔ̀n-ankà-tro hɔ̀n, 5ɛci hɔ̀n lɔ fɛn léyi tùtre mɛ̀n, kɛ kɛ́n Ɔwɔ nyrì-ankà ezì nɔn, bɔ́ crɛ yɔ cüe, bɔ́ srɔ anwɔn-mɛ̀n-wá-wrɔn, ankà-tro lɔ fɛn, ô bɔ̀ hán nɛ̀n nɛ̀n ẅɛn Krisì wá. 6Kɩ bɔ̀ krɔn kpehɛ́n, ô bɔ̀ kɔrɛ ezìkɛ̀n lɔ fɛn, kɩ ndɔ lɔ, ɛnvra léyi nye le yé ɔwá ci-hán anvrɛnvrɛn nɔn.

7Nyɛ nyan ɛci hɔ̀n kɛ hán ɔmu le yɔ dù nɔn hɔ́. Zɛtɛn, ke dú kɛ ɔwrɔn tɔ̀n ke bú tán le nɛ̀n dú Krisì tɛn, ke ji le nɛ̀n vru nɛ̀n tro ankà ndɔ lɔ: bɔ́ dú Krisì tɛn hán ɔmu le nɛ́n mán nɛ̀n dú Krisì tɛn nɔn hɔ́. 8Ɔmuhi mɛ́n sɩ́ hán anvɛvrà ci, ke dú kɛ mɛ̀n hán ɔmùan-gbú ci ẅiɛ jan Ɛẅɛnwrɔn kɔrɛ̀-levri léyi tán bɔ̀ nɔn hɩ wú, ɛkɔrɛ̀-levri léyi n'eci-hán kɛ lɛ hán nyɛ́n fɛcüè krubɔrɛ kɔ̀hɔ̀n lɔ kɛ nán esù kɛ̀ hɔ́n ezì, kɩ kè sɩ̀ dù hɩ le y'á jrɛ́ nɛ̀n nɔn. 9Mɛ́n sɩ́ ji mɛ̀n cá ɔwrɔn léyi kɛ wá nyɛ̀n ɛnjansù n'ɛwrú merɛ́n mɛ̀n nɔn. 10Annanwɔrɛ mɛ̀n lɔ, nyàn ankà léyi yɛ dɔ̀ nɔn: “Pɔlɛ̀n wrú-merɛ́n hɔ̀n lɔ, sɔ́ kɩ dú ɛshishi; tɛ́n ɛnvra léyi nɛ́n dùku ne dú bɔ̀ ɛmɛ̀n nɔn, nɛ̀n dú ɛjɛ́mɛ̀n kɩ n'ankà-dɔ̀ ẅɛn ɛnhyɔ̀bɔ̀.” 11Ke ji le ɔwrɔn léyi kɛ dɔ́ ankà ɔmu lɔ nɔn, ke nyri anvrɛnvrɛn mɛ̀n le: eci léyi dú bɔ̀, ɛnvra léyi bɔ́ merɛ́n bɔ́ ɛwrú hɔ̀n lɔ esù she mɛ̀n nɔn, bɔ́ le dú eci lɔ mán bɔ́ eci-hán mɛ̀n ɛnvra zri léyi bɔ́ le dú nyɛ̀n ɛmɛ̀n nɔn.

12Annanwɔrɛ mɛ̀n lɔ, bɔ́ sɩ̀ shrì bɔ́ bɩ́ bɔ́ edomɛ̀n bɔ̀ krɔn anwrɔn ndɔ hɔ̀n léyi kɛ ẅɛn ankà-tro vri yɔ dùku y'ɛwú. Yɔ dú ɔbrɔ̀sà-bɔ̀: yɔ hán yɔ dùku y'eci-ẅɔɛn-ci, yɔ bɩ yɔ wɔɛn y'edomɛ̀n, yɔ bɩ́ y'edomɛ̀n yɔ krɔn yɔ mumù. 13Bɔ́ tɛn tɛ́n, bɔ́ sɩ̀ gbú ɔmùan ke fɛ ɛwú; bɔ́ lɛ hán nɛ̀n bɔ̀ cɔ́ ɛkɛ̀tɛ̀ vɔ̀n léyi Ɔwɔ wá ɔkɔ̀hɔ̀n tán bɔ̀, ô kɛ̀ tán bɔ̀ ɛkɔrɛ̀-levri bɔ̀ cɔ́ ny'edúyri nɔn. 14Bɔ́ sɩ́ wi b'ɔvɔ̀n hɔ̀n lɔ, ke le dù kɛ̀ lɛ hán le, bɔ́ sɩ̀ và ny'edúyri; ɔmuhi bɔ́ dú ɛnvrakpà-bɔ̀ léyi vá cɔ́ nyɛ̀n anvrɛnvrɛn mɛ̀n kɩ vá sɩ́ nyɛ̀n Krisì Mɛẅi ankà Ankrankran lɔ nɔn. 15Ɔmu lɔ de, bɔ́ sɩ́ gbú ɔmùan ke fɛ ɛwú kɩ bɔ́ sɩ́ bɩ́ anwrɔn nyàntɛn kɔ̀hɔ̀n bɔ́ srɔ bɔ́ tɛn. Tɛ́n bɔ̀ ẅɛn esɛ́ le ankaẅì-bùtan kɛ lɛ sàn ku nyɛ̀n ɛmɛ̀n kɩ bɔ́ lɛ hán ɔkɔ̀hɔ̀n léyi ẅɛn vɔ̀nshɛ́ anvrɛnvrɛn nɔn ny'ɛmɛ̀n lɔ, tɛ́n bɔ́ lɛ hán nɛ̀n kɛ̀ cɔ́ ɔvɔ̀n hɔ̀n léyi yɛ wá tán bɔ̀ nɔn. 16Zɛtɛn ɛkɔrɛ̀levri ke le dù, bɔ̀ bɩ́ Ɛmɛẅi ankà Ankrankran lɔ bɔ̀ sɩ́ ɔkpɔsɔ hɔ̀n léyi dú ny'edúyri mɛẅi, kɩ bɔ́ sɩ̀ ẅɛ̀n ɔmùan-gbù vɔ̀nshɛ́ léyi anwrɔn nyàntɛn cɔ́ ɔkɔ̀hɔ̀n-hán mɛ̀n yɔ dukù yɔ ɛkɛ̀tɛ̀ kɔ̀hɔ̀n hán lɔ mɛ̀n nɔn, hɩ wú.

17Tɛ́n ye merɛ́n le: “Ke dú kɛ ɔwrɔn tɔ̀n ke ji kè gbú ɔmùan hô, nɛ̀n gbú ɔmùan eci léyi Ɛẅɛnwrɔn hán nɔn hɩ wú.” 18Annanwɔrɛ mɛ̀n lɔ, kè sɩ̀ dù ɔwrɔn léyi ẅɛn ankà-tro vri nɛ́n mumù n'ɛwú nɔn, de yɛ mrɛ́n nɔn, tɛ́n ɔwrɔn léyi Ɛẅɛnwrɔn kɛ mrɛ́n nɔn.

Currently Selected:

2 Korɛntɛ̀n anmàn-bɔ̀ 10: ƐAA03

Highlight

Copy