Bangandiroo 12

Woyoo nda dragoŋoo šennoo

1Tammaasa beeri foo bangay beenaa ra. Woy foo kaŋ waynaa ga tee a se darbay, handoo goo cewey cire, kokoy fuula kaŋ handaray woy cindi hinka (12) goo a ga goo boŋoo ra. 2A ga tee alhaamidu, a ga kaati nda taamari, nda kuubi, a ga baa ka hay.

3Tammaasa tana bangay beenaa ra, nga ne, a manʼti kala ganjihooga ciray beeri kaŋ se i ga nee dragoŋ. Boŋ iyye nda hilli woy (10) bara a se, boŋey, kokoy fuula kaccu iyye goo i ga. 4Nsunfaa na beenaa handarawey zamna ihinzaa affoo haabu nga bande kʼi warra laboo ga. Dragoŋoo ga kay woyoo jine kaŋ ga hima ka hay hala nga ma zankaa gon za a hayandi. 5Woyoo na ize daŋ aduɲɲa ra, aru no, nga no ma hima ka gandawey kul kur nda guuru gobu. Izoo zandi ka koy Irkoy jere nda nga kokoy gorodogoo jere. 6Woyoo hunday zuru ka koy saajoo ra. No din no Irkoy na nongu hanse a se hala i ma duu kʼa noo ŋaayan jirbi zenber foo nda zangu hinka nda woydu (1.260).

7Wongu tee beenaa ra, almalaykaa kaŋ se i ga nee Minkaylu nda nga almalaykey na dragoŋoo wongu. Dragoŋoo mo ga wongu, nga nda nga almalaykey. 8Amma dragoŋoo mana hin ey, nga nda nga almalaykey mana yee ka duu doo beenaa ra. 9Dragoŋ beeroo kaŋ ti zaman jinaa gondoo kaŋ se i ga nee Ibilisi nda Šaytan, nga kaŋ ga aduɲɲa kul derandi, warrandi ganda. I nʼa warra laboo ga, nga almalaykey mo warrandi ganda a bande.

10Woo banda ga, ay maa jinde beeri foo beenaa ra kaŋ ga nee:

«Sohõ hallasiroo, nda gaaboo, nda ir Irkoy Laamaa,

nda nga Almasihu hinoo waatoo too,

zama ir armey wurrukaa,

kaŋ gʼi wurru ir Irkoy jine cijin nda zaari, warrandi ganda.

11Ngi, i hin a Feeji-izoo kuroo albarkaa ra,

nda ngi seedetaraa šennoo maaganda.

I na ngi hundoo fur kʼa noo buuyan se.

12Woo maaganda se beenawey, war ma ɲaali,

war nda wey kaŋ ga goro war ra.

Laboo nda teekoo, war bone,

zama Ibilisi zunbu war ga, a ga futu,

a ga bay kaŋ nga sii nda waati kuku.»

13Waatoo kaŋ dragoŋoo bay kaŋ nga nka warrandi laboo ga, a na woyoo gaarandi kaŋ na zankaaroo hay. 14Dutal beeri fata hinkaa nondi woyoo se hala a ma deeši ka koy saajoo ra, nongoo kaŋ soolandi a se, i gʼa ŋandi no din jiiri hinza nda jere, nga nda gondoo ga mooru cere. 15Gondoo ga hari firši kʼa kaa nga miɲoo ra, a ga tee ma nee isa hala nga ma bondaa ka woyoo zaa. 16Amma laboo na woyoo faaba, a na nga boŋ feeri, de a na isaa gon kaŋ dragoŋoo nʼa firši kʼa kaa nga miɲoo ra. 17Dragoŋoo futu woyoo ga, a koy woyoo hayrey cindoo wongu, wey kaŋ ga Irkoy yaamarey dii, de i ga Isa seedetaraa too. 18Dragoŋoo kay teekoo guraa labutaasoo ga.

Currently Selected:

Bangandiroo 12: ses

Highlight

Copy

Compare