Zaburey 107
107
CITAABU GUWANTOO
(Zabur 107—150)
Albarka ma bara Irkoy se kaŋ ti feerikaa
1Wa Abadantaa šifa, zama a ga boori,
zama nga borohennataraa si ben abada.
2Yala borey kaŋ Abadantaa nʼi feeri mʼa har,
wey kaŋ a nʼi feeri kʼi kaa torrokaa kaboo ra,
3a nʼi marga ka hun gandawey ra,
waynahunay nda waynakaŋay, hawsa nda gurma!
4I ga windi-windi saajoo ra, labu kogaa ra,
i mana duu fondo ka koy koyra ra ka goro a ra.
5Heray nda jaw duu ey,
biney hun.
6Ngi binemaraa ra i kaati ka Abadantaa cee,
a nʼi feeri ka hun ngi gurzugawey ra.
7A nʼi ka koy fondo šerrante bande
hala i ma koy goro koyra ra.
8I ma Abadantaa šifa nga borohennataraa
nda teegoy kayfantey kaŋ a gʼi tee adamizey se maaganda.
9Zama boraa kaŋ kormollaa kogu, a na nga jawoo kaa,
heraykoynoo a nʼa noo hennayaŋ kaŋ ga wasa a se.
10Borey kaŋ ga goro kubaa nda buuyan biyoo ra,
tee kasa-ize binemarayyan nda guurey se
11zama i nka ture Irkoy meešenney ga,
zama i nka Koy Jerantaa hoyraa kaynandi.
12A na farayan zumandi i ga ka biney zumandi,
i kati ka kaŋ, i mana duu faabakaw.
13Ngi binemaraa ra i kaati ka Abadantaa cee,
a nʼi hallasi ka hun gurzugawey ra.
14A nʼi fattandi ka hun kubaa nda buuyan biyoo ra,
a na ngi šešerey dunbu.
15I ma Abadantaa šifa nga borohennataraa
nda teegoy kayfantey kaŋ a gʼi tee adamizey se maaganda.
16Zama a na alhan ganbuyaŋ say,
a na guuru kufalyaŋ kayri.
17Boroyaŋ i ra, saamataray nʼi ka ture,
ngi laybey na bone kaŋandi i boŋ.
18Biney hun ŋaayan kul se,
i too buuyan mee ga.
19Ngi binemaraa ra i kaati ka Abadantaa cee,
a nʼi hallasi ka hun gurzugawey ra.
20A na nga meešennoo sanba kʼi duubaanandi,
a nʼi kaa ngi saarawey guusey ra.
21I ma Abadantaa šifa nga borohennataraa
nda teegoy kayfantey kaŋ a gʼi tee adamizey se maaganda.
22I ma albarka daŋyan sargari kaa,
i ma nga teegoyey deede nda ɲaali kaatiyaŋ.
23Borey kaŋ ga naaru harihii beeriyaŋ ra teekoo boŋ
ka maamala hari beerey boŋ,
24borey din dii Abadantaa teegoyey
nda nga teegoy kayfantey hari guusaa ra.
25A šelaŋ de a na hew beeri tunandi
kaŋ na bondawey tunandi.
26Hiyey ga žigi ka koy beene,
i ga zunbu ka koy hari guusey ra,
i goo farrati ra.
27I binini, i ga tatanji sanda boro kaŋ sakkar,
dabari kul dere i se.
28Ngi binemaraa ra i kaati ka Abadantaa cee,
a nʼi kaa ngi gurzugawey ra.
29A na hew beeroo kayandi,
bondawey kay.
30A kan i se kaŋ hewoo kay,
a nʼi ka koy hii kaydogoo kaŋ ga kan i se ra.
31I ma Abadantaa šifa nga borohennataraa
nda teegoy kayfantey kaŋ a gʼi tee adamizey se maaganda.
32I ma maaɲoo jer jamaa margaroo ra,
i mʼa saabu boro beerey margaroo ra.
33A ga isawey bere kʼi tee saaji
a ga hari hundogey bere kʼi tee labu kogo,
34ka labu hennaa tee labu ciiri-ciirante
borey kaŋ goo a ra laalaroo maaganda.
35A na saajoo bere kʼa tee hari kaydoo
ka labu kogaa bere kʼa tee hari hundoo,
36a na heraykoyney gorandi a ra.
I na koyra sinji ka goro a ra.
37I na faariyaŋ tee ka alaneb duma
kaŋyaŋ na ize hay.
38A na albarka daŋ i ra, i hanse ka boobo,
a mana naŋ haya ma hun ngi adabbawey ra.
39Affooyaŋ hinnaa kacca, i golbi
kankami, nda bone, nda farayan sabbu se.
40Woo se a na kaynayan daŋ boŋkoyney ga,
a nʼi ka windi-windi saaji ra kaŋ sii nda fattadoo.
41A ga talkaa kaa nga farayanoo ra,
ka nga alaayan beerey boobandi sanda alman kur.
42Boro šerrantey ga dii a, de i ga ɲaali,
amma haya kul kaŋ si šerre miɲoo ga daabandi.
43Boro kaŋ goo nda lakkal ma hayey wey kul daŋ assal,
a ma faham Abadantaa borohennataraa se.
Currently Selected:
Zaburey 107: ses
Highlight
Copy
Compare
Share
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
