Eberewey batagaa 10

1 Ašariyaa manʼti kala haya henney kaŋ goo kaa biyoo, manʼti nga hunday ti hayey din. Abada a si hin ka borey tee boroyaŋ kaŋ tee ka timme kaŋ ga man Irkoy nda sargariyaŋ kaŋ si ben kaŋ i gʼi kaa jiiri kul. 2Nda manʼti woo, borey kaŋ ga Irkoy gana nda takaa woo mma henan cee folloku ngi zunubey ra, i si zunubu maate ngi ga, i si sargari kaa koyne. 3Amma sargarey wey kul kaayanoo mmʼi hongandi jiiri kul ngi zunubey. 4Zama yaaru kuri nda jindaaru kuri si hin ka zunubu kaa.

5Woo maaganda se waatoo kaŋ Almasihu kaa aduɲɲa ra, a nee Irkoy se:

«Nʼsi baa sargari, nʼsi baa nooyan,

gaaham no ni daŋ ay ga.

6 Sargari kukurantey wala zunubu sargarey si kan ma ne.

7Ay nee:

‹Nga ne, agay ne ma kaa ka ni ibaayoo tee, ay Koyoo,

sanda takaa kaŋ nda a hantumandi ay ga Citaabu kunkunantaa ra.›»#10.5–7 Zaburey 40.7–9.

8A nka jin ka nee:

«Nʼsi baa sargari, nda nooyan, nda sargari kukurante, nda zunubu sargari,

i mana kan ma ne.»

Ba kaŋ se hayayaŋ no kaŋ ga nondi ka sawa nda ašariyaa. 9A nee koyne:

«Nga ne, agay ne ma kaa ka ni ibaayoo tee.»

A ga sargari jinaa tuusu ka ihinkantoo gorandi. 10Irkoy ibaayoo woo albarkaa ra ir jisandi jere ga Irkoy se, zama Isa Almasihu na nga kunturoo noo a ma tee sargari cee folloku.

11 Sargari juwalkaw kul mma kay zaari kul ka nga goyoo tee. Cee boobo haya follokey no a gʼi noo sargari kaŋ abada i si hin ka zunubu kaa. 12Amma Almasihu na sargari folloku kaa kaŋ ga zunubu yaafa, woo banda ga, a goro Irkoy kabe gumaa ga hala abada#10.12 Amma Almasihu na sargari folloku kaa kaŋ ga zunubu yaafa, woo banda ga, a goro Irkoy kabe gumaa ga hala abada, Grek šenni ra, almaganaa faa ti Amma Almasihu na sargari folloku kaa zunubey se hala abada, woo banda ga, a goro Irkoy kabe gumaa ga.. 13Sohõ a ga batu hala waati kaŋ ra a na nga iberey tee nga cee-jisidogoo. 14Zama sargari folloku albarkaa ra a na borey tee timmanteyaŋ hala abada kaŋ ga yeetandi jere ga Irkoy se.

15 Hundi Henanantaa mo na nga seedetaraa tee ir se. Zama waatoo kaŋ a nee:

16«‹Amaanaa kaŋ ay gʼa zaa i se

zaarey wey banda ga›, war Koyoo kʼa har,

‹ay gʼay ašariyawey daŋ biney ra,

ay gʼi hantum lakkaley ra›»,

17a nee koyne: «Ay si yee ka honga ngi zunubey nda ngi teegoy futawey.»#10.16–17 Žeremi 31.33–34. 18Nongu kaŋ ra yaafayan teendi, sargari si yee ka hun zunubu se.

Ir ma man Irkoy

19Woo se, agʼarmey, ir goo nda fondo nda naanay ka huru nongu henanantaa ra Isa kuroo albarkaa ra. 20A na fondo taaga hunante feeri ir se kaŋ ga bisa nda hukkumoo ridowoo, maanaa nga gaahamoo. 21Ir goo nda sargari juwalkaw beeri kaŋ gorandi Irkoy hugoo boŋ. 22Ir ma man Irkoy nda bine kaaray nda naanay timmante, ir ma duu bineyaŋ kaŋ henan ka mooru ifutu kaŋ ir bay ir lakkaley ra kaŋ ir nʼa tee nda gaaham kaŋ ɲumay nda hari henanante. 23Ir ma gaabandi ka gaabu ir naataa haryanoo ga bila binehunay, zama boraa kaŋ na allaahidoo zaa ga laadir. 24Ir ma cere hawgay ka cere gaabandi baji nda teegoy henna ga. 25Ir masʼir margaroo naŋ sanda takaa kaŋ nda boro fooyaŋ ga doona kʼa tee. Ir ma cere bine daŋ, waaniwaani war ga dii ciitoo zaaroo ga baa ka too.

26Nda ir ga muray ka cindi ka zunubu tee, ka gar ir duu cimoo bayraa, sargari sii no koyne kaŋ ga zunubu yaafa. 27Amma haya sii no kala ciitoo batuyanoo kaŋ ga boro hunburandi nda nuune futaa kaŋ ga iberey gon. 28Boro kaŋ na Musa ašariyaa yankar, bila hinnari a ga wiiyandi seede hinka wala ihinza šennoo ga. 29De war ga hongu macin ti zukandoo kaŋ nda boraa ga hima kaŋ na Irkoy Izʼaroo kaynandi, ka amaanaa kuroo kaŋ nʼa henanandi tee yaada, ka Irkoy Hundi tamallantaa wow? 30Zama ir ga boraa bay kaŋ nee: «Agay no ma boro zukandi, agay no ma boro bana.»#10.30 Alhukumoo 32.35. A nee mo: «War Koyoo ga nga jamaa ciiti.»#10.30 Alhukumoo 32.36. 31Almasiiba ti boro ma kaŋ Irkoy hunantaa kaboo ra!

32Wa hongu war zaari jinawey, war lakkaley feeriyanoo banda ga, war na wongu šenda hotta tangam, 33kaŋ cee fooyaŋ i na war wow ka war kabekunafutay borey jine wala mo war tee affoo borey bande kaŋ i gʼi tee takaa woo. 34War zarabi kasa-izey bande#10.34 War zarabi kasa-izey bande, Grek šenni ra, almaganaa faa ti War na hinnari cebe kasa-izey se., war yadda nda ɲaali i ma war almanoo taa war kone, zama war ga bay kaŋ war goo nda alman henna duumante. 35War masi war naanayyanoo fur, a goo nda sufuray beeri. 36War ga too muɲeyan ga hala war ma duu ka Irkoy ibaayoo tee ka duu allaahidoo kaŋ a nʼa zaa. 37Zama Citaaboo nee:

«Ne nda kayna, nda cahãyan,

boraa kaŋ ga hima ka kaa ga kaa,

a si gay.

38Ay boro šerrantaa si huna kala nda naanaa albarkaa#10.38 Ay boro šerrantaa si huna kala nda naanaa albarkaa, Grek šenni ra, almaganaa faa ti Ay boraa kaŋ naanaa nʼa tee boro šerrante, ga huna..

Amma nda a yee nda banda, ay binoo si bagʼa.»#10.38 Habaku 2.3–4.

39Amma ir, ir sii borey ra kaŋ ga yee banda ka halaci. Ir sii kala borey ra kaŋ ga naanay ka ngi hundey hallasi.

Currently Selected:

Eberewey batagaa 10: ses

Highlight

Copy

Compare