Fattaroo 15
15
Musa nda Izirayel borey doonoo
1Waati follokaa ra Musa nda Izirayel borey na doonoo woo don Abadantaa maaɲoo ga. I nee:
«Ay ga don Abadantaa maaɲoo ga,
zama a na nga hinoo cebe, baryoo nda kaarukaa,
a nʼi warra teekoo ra.
2Abadantaa ti ay gaaboo nda ay doonoo addaliloo.
A tee ya ne hallasiyan. Nga ti ay Koyoo, ay gʼa saabu.
Nga ti ay baabaa Koyoo, ay ga maaɲoo jer.
3Abadantaa manʼti kala wongaari.
Abadantaa ti maaɲoo.
4A na Firawuuna bari torkawey nda nga wongu-izey warra haroo ra.
Wongu-ize jalakoyni suubantey yoole Kakaarey teekoo ra.
5Haroo bondawey nʼi daabu,
i dere hari guusey ra ma nee tondiyaŋ.
6Abadantaa, ni kabe gumaa na ni hinoo cebe.
Abadantaa, ni kabe gumaa ka iberoo motti.
7Ni kokoytaraa beeriyanoo ra nʼga borey warra ganda kaŋ ture ni ga.
Nʼga ni futuyanoo nuunaa sanba kaŋ gʼi ton ma nee subu.
8Ni hunsaroo gaaboo na haroo marga.
Bondawey kay ma nee lalaba.
Hari guusey kay teekoo gamoo ra.
9Iberoo nee: ‹Ay gʼi gaarandi, ay ga duu ey,
ay ga alganiimaa zamna,
ay gʼa tee woo kaŋ ay baa,
ay gʼay takubaa hoobu,
ay kaboo gʼi halaci.›#15.9 ay kaboo gʼi halaci, Ebere šenni ra, almaganaa faa ti ay ga kabey koonandi.
10Nʼna ni hewoo funsu,
teekoo daabu i ga.
I sundu ma nee badila
hari beerey ra.
11Koyey ra, may ti ni cine koy, Abadantaa?
May no ma too ni henanyan ra?
May ka si hunbur ni?
May no ma too ni beeray ra?
May no ma too ni kayfi teeyan ra?
12Nʼna ni kabe gumaa šerre,
laboo nʼi gon.
13Ni arrahamaa nda nʼna ni jamaa gongu,
jamaa kaŋ nʼnʼa feeri.
Ni hinoo ra, nʼga huru i jine ka koy nda ey ni gorodoo henanantaa ra.
14Jamawey maarʼa, i jijiri.
Hunburay duu Filisti gandaa borey.
15Waatoo din Edom boŋkoyney zalba.
Mowab alwakiiley, jijiriyan duu ey.
Kanaŋ gandaa gorokey kul biney hasara.
16Jitiyan nda hunburay kaŋ i boŋ.
Ni kabe gaabantaa jine i tee suk ma nee tondi,
i si hin ka šelaŋ hala waati kaŋ ni jamaa ga dira ka bisa, Abadantaa,
hala waati kaŋ ni jamaa kaŋ nʼnʼa sawal, dira ka bisa.
17Nʼga huru i jine kʼi gorandi tondi hondoo boŋ kaŋ ti ni wane,
nongoo kaŋ ni, Abadantaa nʼa hanse a ma tee ni gorodogoo,
a ma tee ni nongu henanantaa
kaŋ ni, ir Koyoo, ni kaboo nʼa gorandi.
18Abadantaa, nʼga laama waati kul hala abada.»
19Waatoo kaŋ Firawuuna baryey, nda nga torkawey, nda nga bari kaarukey huru teekoo ra, Abadantaa na teekoo haroo yee katandi kʼa gum i boŋ. Amma Izirayel borey bisa teekoo gamoo ra labu kogaa ga.
Maryama baytoo
20Annabi Maryama kaŋ ti Haruna woymaa na dunduŋoo zaa, woyey kul fatta ka hanga a, i ga hooray nda dunduŋoo, i ga gan. 21Maryama ga tuuru ka nee i se:
«Wa don Abadantaa maaɲoo ga,
a na nga hinoo cebe.
Baryoo nda nga kaarukaa, a nʼi warra teekoo ra.»
Mara hari hottaa
22Musa na Izirayel ka hun Kakaarey teekoo do ka koy Šur saajoo ra. I dira jirbi hinza saajoo ra i mana duu hari. 23I too Mara, amma i mana hin ka Mara haroo haŋ, zama a mma hottu. Woo se i na nongoo maaɲoo daŋ Mara (maanaa «hottay»). 24Jamaa ŋuunuŋuunu Musa ga ka nee: «Macin no ir gʼa haŋ?» 25A kaati ka Abadantaa cee, Abadantaa na bundu dumi cebe a se. Musa nʼa warra haroo ra, haroo bere ka tee haya kaŋ si hottu. No din ra a na ašariyayaŋ nda yaamaryaŋ gorandi jamaa se. No din da ra a nʼi sii. 26A nee: «Nda nʼga haŋajer ka boori Abadantaa, ni Koyoo šennoo se, nda nʼga haya tee kaŋ ga henan a jine, nda nʼga haŋajer nga ašariyawey, nda nʼga nga yaamarey kul dii, wircey kaŋ ay nʼi daŋ Misira borey ra, ba affoo si duu ni, zama agay ti Abadantaa kaŋ ga ni noo gaaham baani.»
27Izirayel borey too Elim, no din ra hariɲaa woy cindi hinka (12) goo, nda teenayɲaa woyye (70). I goro no din haroo jeroo ga.
Currently Selected:
Fattaroo 15: ses
Highlight
Copy
Compare
Share
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
